Becky Craven
Tokoni Ua ʻi he Kau Palesitenisī Lahi ʻo e Kau Finemuí
ʻOku ʻi ai ha kupuʻi lea ne faʻa vahevahe ʻe Sisitā Becky Craven ʻi heʻene kei hoko ko ha faifekaú: “ʻI he taimi ʻokú ke ʻiloʻi ai koé, ʻe kehe leva hoʻo angafaí.”
Naʻe pehē ʻe Sisitā Craven, ʻa ia naʻá na ngāue mo hono hoá, Ronald L. Craven, lolotonga ʻene tokangaʻi ʻa e Misiona North Carolina Charlotte mei he 2012 ki he 2015, “Pea ʻe hoko ia ʻi he tūkunga kotoa pē—kau ai hoʻo teuteú, founga hoʻo leá, anga hoʻo fakafōtungá, mo e ngaahi ʻekitivitī ʻokú ke kau aí.”
Naʻe hikinimaʻi ʻa Sisitā Craven ko e Tokoni Ua ʻi he Kau Palesitenisī Lahi ʻo e Kau Finemuí ʻi he ʻaho 31 ʻo Māʻasi, 2018. Naʻá ne pehē, “ʻI he taimi ʻe kamata ai ke vakai e kau finemuí ki honau tuʻunga ʻi he palani ʻo e fakamoʻuí, te nau lava ai ʻo sio ki ha vīsone maʻanautolu.” “Kuo pau ke ke maʻu ha vīsone. Kapau he ʻikai ke ke maʻu ha vīsone, he ʻikai te ke ʻilo e feituʻu ʻokú ke fononga ki aí pea he ʻikai te ke ʻilo e meʻa ke fai ke ke tūʻuta ai ki aí.”
Naʻe fāʻeleʻi ʻa Rebecca Lynn Craven ʻi he ʻaho 26 ʻo ʻOkatopa, 1959, ʻi Sātoni, ʻOhaiō, USA, kia Corless Walter Mitchell mo Linda Louise Kazsuk Mitchell. ʻOkú ne laukau ʻaki hono ui ia ko ha “kiʻi sōtiá,” naʻá ne tupu hake ʻi Tekisisi, USA ʻa ia naʻe kau ai hono fāmilí ki he Siasí; Siamane, ko e taimi ia naʻe silaʻi ai honau fāmilí ʻi he Temipale Swiss; ʻIngilani; ʻIutā, USA, ʻa ia naʻe papitaiso ai ia ʻi he fuofua ʻaʻahi ʻene tangataʻeikí ki Vietinamí; pea mo Melilani, Kenitaki, Mīsuli mo Kenisisi.
Ne mali ʻa e ongo Cravens ʻi he ʻaho 5 ʻo ʻAokosi, 1980, ʻi he Temipale Salt Lake; pea ko ha mātuʻa kinaua ki ha fānau ʻe toko nima.
Kimuʻa pea hikinimaʻi ia ʻi hono fatongia foʻoú, naʻá ne lolotonga hoko ko ha tokoni ʻi ha kau palesitenisī Fineʻofa fakauooti mo hoko ko ha tokotaha ngāue fai ouau ʻi he Temipale Bountiful Utah. Kuó ne hoko foki ko ha palesiteni ʻo e Kau Finemui ʻi he uōtí, mēmipa ʻo e poate ʻo e Kau Fineʻofa ʻi he siteikí, faifekau fakasiteiki mo ha taki sikauti.
Kuo maʻu ʻe Sisitā Craven ha mataʻitohi B.A. ʻi he teuteu fakatisainí mei he ʻUnivēsiti Pilikihami ʻIongí, ʻa ia naʻá ne ngāue ai he kōmiti faleʻi fakaʻatelitá. Naʻá ne hoko foki ko ha mēmipa pule ʻo e poate CHOICE Humanitarian, ko ha kautaha ngāue tokoni fakavahaʻapuleʻanga naʻe tuʻu ʻi ʻIutā.
ʻOkú ne manako ʻi he kaka moʻungá, ngaahi sipoti ʻi he vaí, fononga mamaʻo ʻi he sinoú, folau ʻeveʻevá, tā valivalí, tuituí mo e ngaahi keimi mo e ʻekitivitī mo hono fāmilí.