Tokoniʻi ʻo e Ngāue Fakafaifekaú

ʻI he māhina ʻe ono kuoʻosí, naʻe fakahoko ai ʻe he Siasí ha ngaahi ngāue ki hono tokoniʻi ʻo e ngāue fakafaifekaú.

Ngaahi fehuʻi paú. Naʻe fakafeʻiloaki ʻe he Kau Palesitenisī ʻUluakí ha ngaahi fehuʻi pau ke ngāue ʻaki ʻe he kau pīsopé mo e kau palesiteni fakasiteikí ʻi hono ʻinitaviu ʻo e kau teuteu faifekau taimi kakató. ʻOku nau poupouʻi e kau takí, mātuʻá mo e toʻu tupú ke nau maheni mo e ngaahi fehuʻí.

ʻOku ʻikai liliu pe tānaki ʻe he ngaahi tuʻunga ʻoku hāsino ʻi he ngaahi fehuʻí ʻa e ngaahi fie maʻu ki he ngāue fakafaifekau taimi kakató, ka ʻi hono toutou vakaiʻi kinautolú ʻe lava ai ʻe he tokotaha teuteu faifekaú mo ʻene mātuʻá ke ako e ngaahi tefitoʻi moʻoní mo ʻilo e ngaahi meʻa ʻe fie maʻu ke fakatupulaki mo toe mateuteu ange aí.

Fakaʻaongaʻi ʻo e tekinolosiá. Kuo hiki hake e fika ʻo e ngaahi misiona ʻoku nau ngāue ʻaki e ngaahi naunau fakatekinolosia toʻotoʻó mei he 87 ki he 162, pea ʻoku fetongi ʻe he telefoni toʻotoʻo (smartphones) ʻa e ngaahi tablet. ʻE tokoni e ngaahi telefoni toʻotoʻó ki he kau faifekaú ʻi heʻenau akó, kumí mo e akoʻí.

ʻOku ngāue ʻaki foki e tekinolosiá ke maʻu ha ngaahi fakamatala mei he ʻinitaneti maʻá e kakai ʻoku nau kumi ha ngaahi tali ki ha ngaahi fehuʻi fakalotu. Naʻe kamata ngāue ʻaki ʻe he Siasí ʻa e ngaahi senitā ako ʻinitānetí he taʻu ʻe ono kuohilí pea ʻi he ʻaho ní kuo ʻi ai ha senitā ako ʻinitāneti ʻe 20 ʻi he māmaní.

Fakamālō koeʻuhi ko e tekinolosiá, ʻoku lava ai e kau mēmipa naʻa nau ʻave honau ngaahi kaungāmeʻá ki he kau faifekaú ʻo fetuʻutaki mo e kau faifekau ʻoku nau akoʻi honau ngaahi kaungāmeʻá. Te nau lava ke aleaʻi e ngaahi fie maʻú mo e kau feifekaú pea kau foki ʻi he ngaah lēsoní ʻo fakafou ʻi he ʻinitanetí. Fekumi ki he foungá ʻi he lds.org/referrals.

Feau e ngaahi fie maʻu lolotongá. ʻE kamata ʻi Siulai ʻo e 2018, hono toe fokotuʻutuʻu ʻe he Siasí e ngaahi ngataʻanga ki ha ngaahi misiona ʻe 19, mo fokotuʻu ha misiona foʻou ʻe 5. ʻE liliu ʻe he meʻá ni ʻa e lahi ʻo e ngaahi misioná mei he 421 ki he 407. Ko e ngaahi misiona foʻoú ko Brazil Rio de Janeiro South, Cote d’Ivoire Yamoussoukro, Nigeria Ibadan, Philippines Cabanatuan, mo Zimbabwe Bulawayo. ʻE toki fakaikiiki mai e ngaahi liliu ko ʻeni ʻo e ngaahi misioná ʻi he kahaʻú mei he kau palesiteni fakamisioná ki he mātuʻa ʻo e kau faifekau ʻoku liliu honau misioná.

Talu mei hono fanongonongo e liliu ʻi he taʻu motuʻa ki he ngāue fakafaifekáu ʻi he 2012, kuo fokotuʻu ai ʻe he Siasí ha ngaahi misiona foʻou ʻe 76 ke feau e tupulaki lahi ʻo e kau faifekaú mei he toko 58,000 ki he toko 88,000. Kuo holo e tokolahi ʻo e kau faifekaú talu mei ai, ʻo hangē ko ʻetau ʻamanakí, pea ʻoku lolotonga ngāue ha kau faifekau ʻe toko 68,000. ʻOku ʻuhinga ʻeni, ko ha ngaahi misiona siʻisiʻi pē ʻoku fie maʻu, he lolotonga ní. Ka ʻoku toe ʻuhinga foki ia ʻoku fie maʻu ha tokanga makehe ki hono tufa ʻo e kau faifekaú ki he ngaahi ʻēlia ʻoku fie maʻu lahi taha ai kinautolu ʻi he māmaní.

Ngaahi senitā akoʻanga fakafaifekaú. Kuo fakalahi mo fakatapui ʻa e Senitā Akoʻanga Fakafaifekau ʻi Polovo, ʻIutā, USA mo e MTC ʻi he ʻOtu Filipainí, pea kuo fakatapui foki mo e senitā akoʻanga fakafaifekau foʻou ʻi Kaná. ʻE tāpuni e ongo senitā akoʻanga ʻi Sipeini mo Sileí ʻi Sanuali ʻo e 2019, pea ʻe akoʻi e kau faifekau ne totonu ke nau hū ki he ongo senitā ko ʻení ʻi ha taha ʻo e ngaahi senitā akoʻanga fakafaifekau ʻe 13 ʻi he māmaní.