ʻEletā Carlos A. Godoy
Kau Palesitenisī ʻo e Kau Fitungofulú
ʻI he konga kimui ʻo e 1980, naʻe toki tukuange pē ʻa ʻEletā Carlos A. Godoy ko ha pīsope. Naʻá ne fakaʻosi ako foki mei ha kolisi, ngāue ki ha kautaha tuʻukimuʻa, peá ne pehē he ʻikai toe ʻi ai ha meʻa ʻe lelei ange ʻi he moʻuí—kae tālunga ha ʻaʻahi atu ki ai hano kaungāmeʻa motuʻa.
Naʻe fakamonūʻiaʻi ia ʻe hono kaungāmeʻa ka naʻá ne ʻeke ange ha fehuʻi naʻá ne hohaʻa ai: “Kapau te ke hokohoko atu ke moʻui ʻi he tuʻunga ʻokú ke ʻi aí, ʻe fakakakato nai ai e ngaahi tāpuaki ʻoku talaʻofa mai ʻi ho tāpuaki fakapēteliaké?”
Naʻe ʻiloʻi ʻe ʻEletā Godoy ʻoku fie maʻu ke ne fakahoko ha ngaahi liliu kapau ʻokú ne fie maʻu ke maʻu kotoa e ngaahi tāpuaki kuo talaʻofa maʻaná. Neongo ʻene fiemālie peé, naʻá ne fili ke ako hono mataʻitohi M.A. Naʻá ne fakafisi mei heʻene ngāué, fakatau atu e meʻa kotoa pē naʻá ne maʻú, peá ne liʻaki mo hono fāmilí ʻa e tuʻunga angamaheni ʻo Palāsilá ke ne ʻalu ʻo ako ʻi he ʻIunaiteti Siteití.
Naʻe pehē ʻe ʻEletā Godoy, naʻe ui ki he Kau Palesitenisī ʻo e Kau Fitungofulú ʻi he ʻaho 31 ʻo Māʻasi, 2018, naʻe akoʻi lahi ia ʻe he aʻusia ko ʻení fekauʻaki mo e falala ki he palani ʻa e ʻEikí mo maʻu ha loto fiemālie ke liʻaki hono ʻātakai fiemālié.
Naʻá ne fakamoʻoni ʻi he konifelenisi lahi ʻi ʻOkatopa 2014, “ʻOku ou ʻilo ʻoku ʻi ai ha palani ʻa e ʻEikí maʻatautolu ʻi he moʻuí ni. ʻOkú Ne ʻafioʻi kitautolu. ʻOkú Ne fie maʻu ʻa e lelei tahá maʻatautolu. ʻOku ʻikai ʻuhinga e lele lelei meʻa kotoa pē ia heʻetau moʻuí ke pehē ʻoku ʻikai totonu ke ʻai mo tau kiʻi fakakaukau naʻa ʻoku ʻi ai ha meʻa ʻe toe lelei ange.”
Naʻe hikinimaʻi ʻa ʻEletā Godoy ko ha Fitungofulu Taki Māʻolunga ʻi he ʻaho 5 ʻo ʻEpeleli, 2008. ʻOkú ne lolotonga hoko ko ha Palesiteni ʻo e ʻĒlia ʻAmelika Saute Tokelau-hihifó pea te ne kamata ngāue ʻi he Kau Palesitenisī ʻo e Kau Fitungofulú ʻi he ʻaho 1 ʻo ʻAokosi, 2018.
Kimuʻa pea ui ʻa ʻEletā Godoy ki he Kau Fitungofulú, naá ne lolotonga hoko ko ha pule ʻi he vaʻa tokoni fakaetangatá ki ha ongo kautaha lalahi ʻe ua kimuʻa peá ne fokotuʻu ʻene kautaha fai faleʻí. Naʻá ne maʻu hono mataʻitohi B.A. ʻi he ʻekonōmiká mo e politikalé mei he ʻUnivēsiti Sao Paulo Ponitifikolo ʻa e Katoliká ʻi he 1987 mo ha mataʻitohi M.A. ʻi he ngāue fakakautahá mei he ʻUnivēsiti Pilikihami ʻIongí ʻi he 1994.
Kuo hoko ʻa ʻEletā Godoy ko ha faifekau taimi kakato ʻi he Misiona Brazil São Paulo South, hoko ko ha pīsope, aleaʻanga māʻolunga, fakafofonga uelofea fakaʻēlia, Fitungofulu Fakaʻēlia, mo ha palesiteni ʻi he Misiona Brazil Belém.
Naʻe fāʻeleʻi ia ʻi Poto ʻAlekele, Palāsila, ʻi he ʻaho 4 ʻo Fēpueli, 1961. Naʻá ne mali mo Mônica Soares Brandao ʻi Māʻasi ʻo e 1984, pea ʻokú na maʻu ha fānau ʻe toko fā.