Irarikin te tataro ao kamatebwaian booki aika tabu, tera te kawai ae tamaroa ni kakorakora au koaua?
October 2017
Titiraki & Kaekaaia
“Irarikin te tataro ao kamatebwaian booki aika tabu, tera te kawai ae tamaroa ni kakorakora au koaua?”
Am koaua e aki kaoti n tii tetaina. E na rikirake teuana te atatai n tamnei n te tai ae kaokoro—n aron ae taekinaki ni koroboki aika tabu, “teuana imwiin teuana, te reirei teuana imwiin teuana” (2 Nibwaai 28:30). Ko riai ngkanne ni kamwarakea ao ni kakorakora am koaua, n ai aron te koraa ae rikirake (taraa Aramwa 32:28–43). Ao n aron te aroka ae e aki kona n tii maiu n te ran, akea teuana te kawai ae “tamaroa” ni kakorakora am koaua. Ko kainnanoi kawai aika a irengan.
Te tataro ao te kamatebwai ni booki aika tabu bon kawai aika tamaroa ni kamwarakea am koaua. Ngkai ko kamatebwaia te euangkerio ao n tataro ma te nano ae koaua n ataa te bwai ae koaua, e na buokiko te Tamnei ae Raoiroi n namakina koauan te euangkerio (taraa Moronaai 10:4–5).
Ko kona naba ni kakorakora am koaua man kawakinan tuua. Ngkana ko maiuakina reirein te euangkerio—n aron te aki mamatam, ni kawakina te bong ae te Tabati n tabuia, ke ni kana te toa—ko a moanna ni karekea am koaua bwa e kanga ao bukin tera e koaua, n oneamwiin tii ngkai e koaua. E taku Iesu bwa ngkana ko rineia ni “karaoa ana kantaninga,” ko na “ata te reirei” (Ioane 7:17).
Te kawai riki teuana ni kamwarakea am koaua bon tibwauakina. Beretitenti Boyd K. Packer (1924–2015), te Beretitenti n te Kooram n Abotoro n te Tengaun ma Uoman, e taku, “Te koaua e riai ni kuneaki inanon uotakina n taekinna!” (“The Candle of the Lord,” Ensign, Tianuare 1983, 54; Tambuli, Turai 1983, 34). Ko kona n tibwaua am koaua n te taromauri ao n te tieminari, n te mweenga, ao ma raoraom. Ngkana ko karaoia, e kona te Tamnei ae Raoiroi ni kaotia nakoim bwa te bwai are ko taekinna e bon koaua.
N aron kakorakoraan am koaua ni mwaitin kawai aika kakaokoro, e na rikirake ao ni korakora, ao ko na namakina te rau ao te kimwareirei.