Kamaenakoa te “Anua n Roro” Ae Aki Raoiroi
Mwaninga are e taekinna te aonaaba. E kanga aron taraakim iroun te Tama are i Karawa? Ko kona ni maiu nakon Ana taratara am konabwai.
E mwaiti ana taeka te aonaaba n taekaia rooro ake tebwi tabun te ririki n te bong aei. Ko na ataia kanga ai aroia tabeman ake a katautau ke ko a tia n ongo tabeman ni ngurengureakini “aroia kairake ni bong aikai.” A mwaiti kamatebwai ao tauan mwiin waare ibukimi—ami katei ni bobotaki ni kareke rongorongo, bwaai ake kam kabooi, riki uarereken anakin nanom are e kona n reke.
Beretitenti Russell M. Nelson, Beretitenti n te Kooram n Abotoro n te Tengaun ma Uoman, e taku bwa e “aki mweengaraoi,” ngke e ongo n aia kabwarabwara taan kakae n aia kamatebwai n taekaia aomata aika kairake. “Ma ae koaua riki,“ e taku, “E aki anaaki nanou n aia kukune taan rabakau are a tia n taekinna ibukimi nakon are e a tia te Uea n tuangai ibukim,”1
Te Uea e aki kainnanoa te kamatebwai ke te katautau ni karekea kinaakim, E aki iangoia roro aika kairake n riki bwa mwakoron tauan mwiin waare ke n aroia tabeman n uotaki rikaaki n aron “te aonaaba” ni kataia ni kabwarabwarako.
“E tangiriko tiaki ibukina bwa antai ngkoe n te bong aei ma ibukina naba te aomata ae mimitong ao te ota are e anganiko te konabwai ao nanom ae kona ni karekea.” e taku Beretitenti Dieter F. Uchtdorf, Kauoman Kauntira n te Moan Beretitentii.2
Te Atua e aki tii nooriko; E tangiriko.
Ko tangiria n riki ni kaokoro mairouia aomata tabeman n te aonaaba? Moana taraakim n ana kawai te Tama i Karawa ao aia taratara Ana toro aika a rineaki n nooriko. Ko tangiria ni kan kakoaua bwa taian katautau a kaairua? Aio ngkai te tai n kakamwakuri ao katabeko ni karaoa te mwakuri. Ngke 12-ana-ririki, Kristo e kauringiia Ana karo iaon te aba bwa E riai bwa “N na kumea [Ana] bwai Tamau” (Ruka 2:49).
E aki rang uarereke, ao ai arom naba. Ngaia te titiraki are imwina bon aio: Ko na kanga n riki ni kumea ana bwai te Tama i Karawa?
Ana “bwai” bon taekan karekean te maiu ae aki mamate ao maiuiia aomata ae akea tokina (Moses 1:39), ngaia are ko kona ni kumea ana bwai man karaoan am kabanea n tamaroa ni karekea am konabwai ao man riki bwa temanna are e buokiia tabeman ni karekei naba aia konabwai.
Aio ngkai te tai n anaa te mwiokoaki anne ibukin taai aika a na roko. Tera are ko kona ni karaoia n te tai aei ni kakoaua bwa ko a riki n aron are e ataia te Tama i Karawa bwa ko kona ni karekea, tiaki tii n te maiu are akea tokina ma inanon naba te maiu aio?
Ko tangiria ni mare n te tembora? Iangoia ngkai kona itiaki n am iango, am taetae, ao am mwakuri. Ko baireia ni kan kamatebwai n te uniwetiri? Karikirakea kamatebwaian atatai aika a tamaroa ngkai. Ko tangiria ni beku n te mition? Karina Preach My Gospel nakon am kamatebwai n te euangkerio (riki mwakoro 3) Ko tangiria ni katauraoi bwaai ibukiia am utu? Reiakinna bwa ko na kanga ni karaoa te kataumwane ngkai.
Ko kona n tarai naba bwaai ake a na anganiko te kukurei ngkai. Ko tatangira te numera? Ko katanga biano? Ko koro karaki? Reitinako ni karaoia! Tarai kawai ake ko kona ni karikirakei: kiraati n te reirei, tutorio iaon te rain, kauaaba, wekitiaobu, ao a bati riki.
Bita anuan te roro ae aki raoiroi ao totokoi riribai! Tabeakina arom nakon taai aika a na roko. Tera ae ko na karaoia bwa kona riki bwa te kabanea n tamaroa? Kaongoira n te emeeri liahona@ldschurch.org ke katuka am rongorongo iaon ana iteraniba te LDS Youth Facebook ke Instagram.