Sarah ao te MRI
E maeka te tia korokaraki i Colorado, USA.
Tao e kona te Tamnei ae Raoiroi ni buoka Sarah bwa e na aki rangin ni maaku.
“Ngke e mena Kristo iaon te aba, E berita bwa E na kanakoa te Tamnei ae Raoiroi bwa e na kamwengaraoira, raoraora ni koaua, ae akea tokina” (Aia Boki n Anene Ataei, 105).
“E taraa n ae e na kainnanoa te MRI i nukana,” e taku Dr. Frank. E ngare nakon Sarah. “N na kabaea te MRI nakon te ingabong. I a manga oki inanon tabeua te miniti.”
E a tia ni maraki nuukan Sarah tabeua te tai. Ngke e uti n te ingabong anne, e rangin ni maraki are e a kaangaanga irouna bwa e na kaetia n tei, ao n aki konaa n nakonako. Sarah ao Tinana a tia n nako ni kawara Dr. Frank ni kakaea bwa tera te bwai ae riki.
“Manga te MRI riki?” e titiraki Sarah, n taraa Tinana. E a tia ni karekea ana MRI mai imwaina. E uringnga aron maakuna are e a tia n namakinna inanon te bwaibu ae bubura are e rawea tamnein nanon rabwatana.
“Kabwara au bure, Sarah,” e taku Tinana. “Ma tamnei a na buoka Dr. Frank n reiakinna bwa tera ae riki i nuukam. I ataia ko kona ni karaoia. Ao n na mena irarikim ikekei.” Tinana e koona bain Sarah.
“Ma ko aki kona n rin ma ngai,” e taku Sarah. E rara rikaaki atuuna, ao ni waanako rannimatana mai tabana. E kona Tinana n rin ma ngaia inanon te ruu, ma n te tai are e nang rin Sarah inanon ruun te mitiin, e na bon tiku n tingaia.
E katoka baina Tinana iaon Sarah. “E koaua anne, ma ko ataia bwa antai ae kona ni mena ikekei ni karaua nanom?”
E uringa te ara Sarah are e a tia n ongo ibukin te Tamnei ae Raoiroi: te Tia Karaunano. Tao e kona te Tamnei ae Raoiroi ni buokia n aki namakina te maaku.
“Te Tamnei ae Raoiroi?” Sarah e titiraki.
E katoutoua atuuna Tinana. “Eti anne. Ko kona n tataro ibukin te Tamnei ae Raoiroi bwa e na buokiko. Tamam ao Ngai ti na tataro naba ibukim.”
Anne are e angan Sarah te iango ae tamaroa. “I kona ni butiia Tamau ibukin te kakabwaia?”
E wiingare Tinana. “Ngaia anne. I ataia bwa e na tangiria ni karaoa anne.”
Te tairiki anne e katoka baina Tamau iaon atuun Sarah ao n anganna te kakabwaia n te nakoanibonga. Ngke e kakabwaia Sarah ao e kakabwaia bwa e na karauaki nanona iroun te Tamnei ae Raoiroi, e kaonaki rabwatana n te tangira. E tiku te namakin irouna ni kabutaa te tairiki anne.
Te bong are imwiina e wene Sarah iaon te kaintekateka are e na butinako inanon te ooti ae bubura nakon te MRI mitiin. E kaokiokia n atuuna taeka ake e kabonganai Tamana n ana tai ni kakabwaiaaki: Te Tamnei ae Raoiroi e na karaua nanom. E koona bain Tinana ni kamatoa Sarah. Ngkanne te neeti e kararikia nakon te ooti.
Te mitiin ae te MRI e karaoa te karongoa ae kamanga ngke e tabe n rawea tamnein akuuna. E wene Sarah n aki kakamwakuri bwa e aonga te tamnei n aki mabubu. E nakonanona tabeua te miniti, ma imwina e a manga namakina naba te namakin n tangira anne. Ti tebo ma namakinan ana irabwati Tinana. Ke te burangketi ae aabue. E ataia bwa ana bane n nakoraoi bwaai ni kabane. Imwain are e ataia, e toki te MRI!
Inanon ana aobiti Dr. Frank, e kaotia nakon Sarah ao Tinana tamnein nuukan Sarah. “Ko a tia ni karaoa te mwakuri ae tamaroa ni wene n aki kakamwakuri,” Dr. Frank e tuanga Sarah ngke e katarobubua irarikina. “Tamnein nuukam aikai a kaotia bwa ko na kainnanoa te korokoro bwa e na buokiko riki ni kanakoraoa riki nakonakom.”
E oonga bawarena Sarah.
“Ti tangiria ni karaoa te korokoro ni waekoa,” e taku Dr. Frank, n tararake n taraa tinan Sarah. Ngkanne e rairaki nakon Sarah. “E na bae n anai tabeua wiiki imwiina ao kona konaa n namakinna ae ai arom ngkoa mai maina, ma imwiin norakim n te bong aei, I ataia bwa e na tamaroa ibukim.”
E kataia n iangoia Sarah bwaai aika e na riai ni karaoia imwiin ae karaoa nuukana Dr. Frank. N na kona ni biri ao n uaua ao ni kiba inanon te bwarikoriko ni baanikai. E tang nanona bwa e tuai man karaoi bwaai aikai ni kabane. Ma te korokoro e a rangin ni kakamaaku riki nakon te MRI! Ngkanne e uringa ana tataro ao ana kakabwaia aika onoti Sarah. E a tia te Tama are i Karawa ni kanakoa nakoina te Tia Karaunano. E na manga buokia riki.
E taraa Dr. Frank. “I a kona ngkanne ni kiba nako aon bwariko ni baan kaai aika bubura?” e titiraki.
E ngare. “Ngkanne ko a kona ni kiba nako aon bwariko ni baan kaai aika a bubura.”