Ti Taekina Taekan Kristo
E Tuai n Rimwi ibukin te Kauatai
E maeka te tia koro karaki i Virginia, USA.
Taman temanna au ataei ae kekeiaki e tuanga natina te aine, “E tuai oimwii iroum bwa kona tokanikai.” Te Uea e anganiira te rongorongo ae aron naba aei.
Kamataata n te Tamnei iroun Kelley McMorris
Sandra bon ataein te reirei n au kiraati n te tatae n Ingiriti are iaona riki. Tabeua te wiiki inanon te ririki, akea ana bwainreirei n te mweenga ke te karikirake ae a tia ni karaoia. E tekateka iaon ana kaintekateka kanga ai aron ae mi. E karaoa ana ekitikiuti bwa bukin tera a tuai n tia ana bwai n reirei, ao akea te anua ke te mwakuri ae karaoia ae tau bwa e na tokanikai n te kiraaati ae bati te mwakuri iai.
I iangoia ma ana kauntira bwa tina kabaea te maungatabu ma Sandra, tamana, ao tabeman ana tia reirei ake tabeman n iangoia bwa tera te kawai ae riai n anaia: e na katikui ana kooti ake iaona riki ao n anai aika a bon tau? Te kabanea ni kakawaki ni bwai ae ti bane n iangoia: ti kona ni kakaea te kawai ni buoka Sandra bwa e aongnga n tokanikai?
Kakouaan ae e a tia Sandra n anganaki ana tai ae mwaiti bwa e na bwaati ma e a tia n rineia bwa e na aki bwaati, i nakon te bootaki ma te bwarannano. Au kantaninga ae raba bwa e raoiroi riki ae na aki ira au kiraati bwa I iaonga n aki manga tabetabe irouna. I namakinna bwa I a tia ni karaoa ae I kona ibukina ma are e a oimwi.
N tain te bootaki, e kaotia Sandra n tein ana taetae bwa e nanououa naba n aron ana konabwai. E bobaraki n taraa te taibora ngke I wareki mwaitin a na aki bwaati n ana kiraati n te taetae n Ingiriti. Ngke e kamatata naba ana tia reirei n te history bwa e aki bwaati naba Sandra n ana kiraati, rabwatana e bwaka rikaaki iaan riki ana kaintekateka ao N noori rannimata mai ubuna.
Noorakin tabeaiangana, I kabwarabwara nakoina ao tamana bwa ngkana e tangiria Sandra bwa e na bwaati n taian kooti aikai, e na riai ni bita kateina are ngaia are e a kitana iai te ekaretia ao ni kona n rangin ni matoatoa.
Te Rongorongo mairoun Tamana
Imwiina e rairaki te kauntira nakon taman Sandra, te mwaane ae karako ana reirei are e taraa n aki mweengaraoi ma aron te waaki n te reirei. E titirakinna te kauntira ngkana iai ana titiraki nakoia taan reirei. E taku bwa akea ao e kaitauira ibukin te bwai are ti a tia ni karaoia ibukin Sandra. Ma imwiina e taku bwa iai te bwai ae kan taekinna nakon natina te aine.
Iai te raraoma irou. I a tia n iira aia maungatabu kaaro ma taan reirei ike a tia kaaro n taetae n aki akaaka ibukiia natiia imataia taan reirei ao kauntira, ni kauringiia ibukin taningarotiia, aki rorokoia, ao akean te kaungannano. I katauraoai bwa n na ongora riki.
Tera ae I ongo ae I kubanako iai. Taman Sandra ae nanorinano e rairaki nakon natina te aine ae 16-ana ririki ae tang are e rootaki n te maama ao te nanokawaki ao n taku nakoina, “E tuai n rangi n oimwii. E tuai rangin n oimwi ibukim bwa ko na kona n tokanikai. E bon tuai raoi n rangin n oimwii.”
I kitana te bootaki arei ma te kakaitau ibukin ana mwakuri n tangira ao ana tabeaianga ao e kaunga bwa akea te bwai ae e ataia ae e na kiannanoaki ibukin natina te aine bwa e na kona ni karekea ana bwii n te kiraati ae bwaati n te tai aei. E taraa ni kaangaanga. I kaongoaki imwiina bwa e a tia ni kaaki ana kiraati n te history ma tiaki au kiraati n te Ingiriti.
Imwiin te bong anne ngke I katorobubua n tataro, n iangoi kabwakau ao n tuanga Tamau are i Karawa ibukin kabwaraan au bure, I ataia bwa e mwaiti ae n na kona n reiakinna mairoun taman Sandra. Te aki mwengaraoi ao namakinan te aki tau e a tia n taai akekei n oin maiu n anganai te aki koaua ngkana I tau ke n tau ibukin te kauoua n tai. N taai aikanne, te Uea, n aron taman Sandra, e rineia bwa e na aki taetae n aki akaka nakoiu ma e na kaungaai: “E tuai n oimwi, natiu. E Tuai n oimwi.”
Rongorongon te Euangkerio
Maanra ae ti a tia ni kakoaua ana rongorongo te tia kakaitara ae akea te kaantaninga ibukira? Ma e tuangira te burabeti. E katanoata Itaia, “Ke e okira Iehova, ao ane E na nanoangaia iai; ao ke e okira Atuara, ba E na kaabaka kabaran ana bure” (Itaia 55:7). E karina ana kakoaua Moomon, “Ma ngkana aki toki n rairinanoia ma n ukoukora kabwaraan aia bure, ma nanoia ni koaua,a bon kabwaraaki aia bure” (Moroni 6:8). Kakimwareirein te euangkerio bwa e aki kona n oimwi. Bukina bwa n tainako ngkana ti ukoukora kabwaraan ara bure, ana kantaninga te Uea ni kamaiu e na kariaia bwa ti na manga moanna riki.
Nanon Sandra, ae korakora ni manga waaki riki, e kawaeremweaki ma bitaki aika kakawaki. Te bitaki e aki beebete—e kainnanoa te kekeiaki ni katoabong n tokanikai man kateina aika buakaka—ma e noora kaniwangan ana kekeiaki ngke e a moanna n raoiroi ana bwi.
Man ana taratara te euangkerio, ara kabanea ni bwi e na aki rootaki man maanraa ae ti a tia ni kairua iai ke maanra ae ti a tia ni bwaka iai man te Ekaretia. Irarikina, te Uea e na bairei maiura ni kaineti ma te kawai are ti toua, ti kanga n rairinanora, ao e kanga aron ara onimaki n ana Mwakuri ni kamaiu te Uea.
N au atatai ae aki tau, I a tia n raraoma n ana konabwai Sandra ni kona n tokanikai iaon ana kairua n taai aika nako. Ni kaitaraana, e aki kona Tamara are i Karawa ni bwara nanona n aia konabwai Natina ni karekea te kamaiuaki ni kororaoi iroun Kristo. E aki tabe bwa manraa ae ti a tia ni bua iai; E na teimatoa n ukoukoriia n tatabemaniia. Te Uea e bubutiira bwa ti na aki manga riki bwa aomata aika bua n te bure ma ti na Ukoukoria n te kaantaninga ao ni kakukureira ni kakabwaia n Ana Mwakuri ni kamaiu ae akea tokina. Ni koauana, e aki kona n oimwi.