Taua Kamatoa
E maeka te tia korokaraki i Utah, USA.
Rao a karaoa te bitaki ae korakora ni kabebetea aron—ke ni matoan—aron maiuakinan ara kainibaire.
I ikawairake ma raoraou aika kain te Ekaretia, ao I kukurei ni bwabetitoaki n riki naba bwa te membwa ngai. Ngke I a mwaing man te aba nakon te kaoreti, I waaki n anai reirei mairouia mitinare. Ma te kaangaanga, te kairoro mai irouia au roro aika boou e a kaangaanga aron irakin ana kainibaire te euangkerio. Raou ake a boou naba a kabanea aia tai ae mwaiti n irii baka n amwarake ao ni mooi manging. I tuai man momoi mai imwaina, ma raoraou aika a boou a teimatoa ni kairoroai bwa N na nimma.
I ataia bwa te euangkerio e koaua, ma te kariiri mairouia au roro e kaangaanga totokoana irou.
I moanna n tataro nakon Tamara are i Karawa ibukin te korakora bwa N na karaoa te baire ae eti. I tuai ni karinanoa au kainibaire, ma I maaku ngkana e na aki reke te korakora n aki butimwaea te kamanging imwiina ngkana e a manga tibwaaki. I tangiriia raoraou ake titebo au kainibaire ma ngaiia.
N tairikin te Kaonobong teuana I nako ni kaea te bootaki ma kain au auti aika ataein te reirei. N te tai ae waekoa ni kabane raoraou a mooi manging ao a kaungaai bwa N na kataia n temeka te manging n te moan tai.
I a bon kariiriaki. I anaa te mwangko ni biia are I anganaki. I katikia nakon wiiu, n aki mweengaraoi ma I kukurei n tabeaiangaia raoraou. Imwiina Nick, te ataeinimwaane ae tokonono ni mooi, e rianna nakon ara kamronron.
“Ko aki nima te mooi anne, ke ko nimma?” e titiraki.
“I tuai,” I kaeka.
“Ngkana ko nimma,” e taku Nick, “ko na nanokawaaki inanon bongin maium.”
I rangin n tounako. I ataia bwa e bon eti. I aki tangiria ni kan mooi I tangiria ni kaina te Ekaretia. I kaoka te mwangko ao I kiitana te bootaki, ma te kukurei bwa I aki karaoa te baire ae kairua.
Te ingabong are imwiin I nako n taromauri, ikaitibo ma mitinare, ao ti bairea au bong ni bwabetito. Man te bong anne ao I tei raroa man bootaki are iai te kamanging iai. I karekeia raoraou aika a boou n te ekaretia ake titebo arora ao ara kainibaire ma ngaiia. I bon iraorao naba ma kain au auti ni maeka n te reirei, ma I a tia ni kamataata nakoia au kainibaire. Ngke a ataa kakaawakin au kainibaire irou, a karinei ao a toki ni kairoroai. A ataia ao a karinea ngkana I kiitana te ruu ngkana a mataku n tamnei aika aki tau ke n ongora nakon katangitang aika aki tau.
E kakorakoraaki au koaua ngke I rinanon aei, ao N na kataia n aki karinanoa au kainibaire ibukin aia kairoro au roro. I ataia naba bwa te kawai ae tamaroa ni kaitarai babaire aika kaangaanga bon ataakin am kainibaire ao n taua ni kamatoa nakoia mai moana.
I ataia bwa Tamara are i Karawa e kaekai ara tataro ibukin te korakora ni kanakoa te karirii. I kakaitau bwa te Tamnei ae Raoiroi e kaungaai bwa N na karaoa te baire ae eti. I ataia bwa ana kainibaire te Ekaretia a tei ibukin kamanoakira, ao I kakaitau bwa ngke I rineia n irii e buokai n rineia bwa N na kaina te Ekaretia.