ប្រឹក្សារួមគ្នាជារឿយៗ ៖ក្រុមប្រឹក្សាគ្រួសារសម្រាប់ភរិយា និងស្វាមី
អ្នកនិពន្ធរស់នៅក្នុងរដ្ឋ យូថាហ៍ ស.រ.អា. ។
ក្រុមគ្រួសារទាំងឡាយជួបប្រទះនឹងបញ្ហា ហើយនិងការសម្រេចចិត្តជាច្រើន ។ គោលការណ៍ស្ដីពីក្រុមប្រឹក្សាគ្រួសារទាំងប្រាំមួយនេះអាចជួយអ្នកបាន ។
ក្រុមប្រឹក្សាក្នុងសាសនាចក្រធ្វើតាមគំរូដ៏ទេវភាពនៅគ្រប់កម្រិតចាប់តាំងពីក្រុមប្រឹក្សានៃគណៈប្រធានទីមួយ និង កូរ៉ុមនៃពួកសាវកដប់ពីរនាក់រហូតដល់ស្តេក វួដ សាខា កូរ៉ុម និង ក្រុមប្រឹក្សាថ្នាក់ដឹកនាំដទៃទៀតដែរ ។ ប្រធាន ស្ពែនស៊ើរ ដបុលយូ ឃឹមបឹល ( 1895–1985 ) បានថ្លែងថា « ក្រុមប្រឹក្សាដ៏សំខាន់បំផុតរបស់សាសនាចក្រ » គឺជាក្រុមប្រឹក្សាគ្រួសារ ។1
អែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានបង្រៀនថា « ក្រុមប្រឹក្សាគ្រួសារគឺការប្រជុំដ៏ល្អបំផុតដើម្បីធ្វើឲ្យទំនាក់ទំនងដ៏មានប្រសិទ្ធភាពកើតឡើង » ។2លោកបានពន្យល់ថា វាគឺជាឱកាសមួយដើម្បី « និយាយអំពីសេចក្ដីត្រូវការរបស់គ្រួសារ និង សេចក្ដីត្រូវការរបស់សមាជិកគ្រួសារម្នាក់ៗ … ដោះស្រាយបញ្ហា ធ្វើការសម្រេចចិត្តជាគ្រួសារ [ និង ] ដាក់ផែនការប្រចាំថ្ងៃ ព្រមទាំងសកម្មភាព និង គោលដៅរយៈពេលយូររបស់គ្រួសារផងដែរ » ។3
ប្រសិនបើអ្នកពុំទាន់មានក្រុមប្រឹក្សាគ្រួសារនៅឡើយ អ្នកអាចចាប់ផ្ដើមវានៅថ្ងៃនេះ ។ ប្រសិនបើអ្នកមានកូនរស់នៅជាមួយនឹងអ្នក អ្នកអាចរាប់បញ្ចូលពួកគេផងដែរ ។ ប៉ុន្តែ វាក៏ជាកត្តាដ៏សំខាន់ផងដែរ ដែលស្វាមី និង ភរិយាមានក្រុមប្រឹក្សាគ្រួសារដាច់ដោយឡែកមួយ ជាពេលដែលពួកគេអាចពិភាក្សាពីបញ្ហាគ្រួសារ និង បញ្ហាផ្ទាល់ខ្លួនតែពីរនាក់ ។
នេះគឺជាគោលការណ៍ និង សេចក្ដីណែនាំដ៏មានប្រយោជន៍មួយចំនួន ដែលអ្នកអាចអនុវត្តនៅក្នុងការប្រឹក្សាគ្រួសាររបស់អ្នករវាងស្វាមី និង ភរិយា ។
ចាប់ផ្ដើមដោយការអធិស្ឋាន
« នៅពេលទំនាក់ទំនងជាមួយនឹងព្រះវរបិតាសួគ៌ក្លាយទៅជាអសារឥតការ នោះទំនាក់ទំនងរវាងស្វាមី និងភរិយាក៏ឥតបានប្រយោជន៍ផងដែរ » ។4
ព្រះអម្ចាស់អាចជាអ្នកចូលរួមដ៏សំខាន់នៅក្នុងអាពាហ៍ពិពាហ៍របស់អ្នក ។ នៅក្នុងការអធិស្ឋានរបស់អ្នក អ្នកអាចថ្លែងអំណរគុណដល់ព្រះវរបិតាសួគ៌សម្រាប់ពរជ័យជាច្រើនរបស់អ្នក រួមទាំងស្វាមី ឬភរិយារបស់អ្នកផងដែរ ហើយទូលសូមឲ្យព្រះវិញ្ញាណទ្រង់បានគង់នៅក្នុងការសន្ទនារបស់អ្នក ។ ព្រះវិញ្ញាណទ្រង់អាចដឹកនាំការពិភាក្សារបស់អ្នក ហើយជួយបង្កើតនូវអារម្មណ៍ និង ទំនាក់ទំនងល្អៗ ។
សម្រេចចិត្តរួមគ្នា
« ការព្រមព្រៀងរបស់សមាជិកក្នុងការប្រឹក្សានេះត្រូវតែមាន តាមរយៈការអធិស្ឋាន និង ការពិភាក្សា ដើម្បីឲ្យមានសាមគ្គីភាពដែលជាតម្រូវការពីមុនទទួលបានជំនួយរបស់ព្រះអម្ចាស់ » ។5
អ្នក និង ស្វាមី ឬភរិយារបស់អ្នកត្រូវតែធ្វើការសម្រេចចិត្តដ៏សំខាន់ ដូចជាថាតើគួរទទួលយកការងារដែលបានផ្ដល់ឲ្យ ឬមិនគួរ ត្រូវចូលរៀនសាលាមួយណា ត្រូវមានកូននៅពេលណា ឬរបៀបបែងចែកការងារផ្ទះ ។ ស្វាមី និង ភរិយាអាចដាក់ស្នើនូវដំណោះស្រាយល្អៗសម្រាប់បញ្ហានានា ហើយពិភាក្សាវា ។ សូមស្ដាប់ដោយរាបសាចំពោះគំនិតរបស់ស្វាមី ឬភរិយារបស់អ្នក ។ ការណ៍នេះអាចជួយអ្នកឲ្យយល់ពីទស្សនៈរបស់អ្នកដទៃ ហើយនឹងរំឭកស្វាមី ឬភរិយារបស់អ្នកថា អ្នកឲ្យតម្លៃទៅលើទស្សនៈរបស់គាត់ ។
នៅក្នុងក្រុមប្រឹក្សាគ្រួសារ យើងត្រូវតែឈានទៅដល់ការសម្រេចចិត្តដ៏សំខាន់របស់យើង « ដោយការព្រមព្រៀងដ៏ទេវភាព ពុំមែនដោយការសម្រុះសម្រួលគ្នានោះទេ » ។6 អ្នកប្រហែលជាមិនអាចទទួលបាននូវសាមគ្គីភាពនេះភា្លមៗនៅគ្រប់បញ្ហាបានឡើយ ។ ការសម្រេចចិត្តអាចតម្រូវឲ្យមានក្រុមប្រឹក្សាជាច្រើនដង និង ការអធិស្ឋានដោយស្មោះ — ទាំងដោយរៀងៗខ្លួន និងជាមួយស្វាមី ឬភរិយា — ដើម្បីយល់ស្របចំពោះការសម្រេចចិត្តមួយ ។ ប៉ុន្តែ « ប្រសិនបើអ្នកនឹងពិភាក្សាក្នុងក្រុមប្រឹក្សាដូចដែលអ្នកត្រូវបានរំពឹងទុកឲ្យធ្វើ នោះព្រះនឹងប្រទានដំណោះស្រាយដល់អ្នកនៅរាល់បញ្ហាដែលរារាំងអ្នក » ។7
វាក៏ជាការល្អផងដែរ ដើម្បីសម្រេចចិត្តទុកជាមុនពីប្រធានបទសម្រាប់ក្រុមប្រឹក្សាគ្រួសារ ។ ការណ៍នេះនឹងផ្ដល់ពេលឲ្យអ្នករិះគិតពីប្រធានបទនោះ ដើម្បីអ្នក និង ស្វាមី ឬភរិយាអ្នកអាចត្រៀមអារម្មណ៍ដើម្បីបញ្ចេញគំនិតរបស់អ្នក ។
វាយតម្លៃខ្លួនឯង
« ហេតុអ្វីបានជាអ្នកមើលឃើញកំទេចដែលនៅក្នុងភ្នែករបស់បងប្អូនអ្នក តែមិនឃើញធ្នឹមដែលនៅក្នុងភ្នែករបស់ខ្លួនសោះដូច្នេះ ? » ( ម៉ាថាយ 7:3 ) ។
អ្នកមានអំណាចដើម្បីផ្លាស់ប្ដូរមនុស្សតែម្នាក់គត់ ៖ គឺខ្លួនឯង ។ អ្នកប្រហែលជាត្រូវបានល្បួងឲ្យប្រើក្រុមប្រឹក្សាគ្រួសារបង្ហាញនូវបញ្ជីនៃការរិះគន់ដល់ស្វាមី ឬភរិយារបស់អ្នក ។ ផ្ទុយទៅវិញ ចាប់ផ្ដើមក្រុមប្រឹក្សាទាំងដោយបំណងប្រាថ្នាចង់ធ្វើឲ្យខ្លួនឯងបានប្រសើរឡើង ។ សួរស្វាមី ឬភរិយាអ្នកថា តើមានអ្វីមួយដែលជាបញ្ហា ឬការព្រួយបារម្ភដែលគាត់បានសង្កេតឃើញនៅក្នុងពាក្យសម្ដី ឬឥរិយាបថរបស់អ្នកដែរឬទេ ។ ដាក់គោលដៅសម្រាប់ការកែលម្អផ្ទាល់ខ្លួន ហើយសុំការគាំទ្រពីស្វាមី ឬភរិយារបស់អ្នក កាលអ្នកខិតខំធ្វើការផ្លាស់ប្ដូរ ។ គាំទ្រដល់ស្វាមី ឬភរិយារបស់អ្នកនៅរាល់គោលដៅផ្ទាល់ខ្លួនដែលគាត់ចង់ធ្វើ ។
ពិភាក្សាពីរឿងពិបាក
« គ្រួសារគ្រប់រូបមានបញ្ហា និង ឧបសគ្គ ។ ប៉ុន្តែផ្ទុយទៅវិញក្រុមគ្រួសារដ៏មានជោគជ័យ ព្យាយាមធ្វើការរួមគ្នា ឆ្ពោះទៅរកដំណោះស្រាយនានាជាជាងការងាកទៅរកការរិះគន់ និង ការទាស់ទែងគ្នា » ។8
អាពាហ៍ពិពាហ៍រឹងមាំត្រូវបានស្ថាបនាដោយការយកឈ្នះឧបសគ្គទាំងឡាយ ពុំមែនដោយការគេចវេស ឬជៀសវាងពីវានោះទេ ។ វានឹងកើតមាន កាលដែលបញ្ហាធំៗបានកើតឡើង ដែលតម្រូវឲ្យមានការពិភាក្សាគ្នា ។ ឧទាហរណ៍ អ្នកប្រហែលជាមានការពិបាកដើម្បីយកឈ្នះលើបញ្ហាអំពើបាប និង ការប្រែចិត្ត ឬបន្ទុកផ្នែកហិរញ្ញវត្ថុ ប៉ុន្តែទំនាក់ទំនងដោយបើកទូលាយ និងដោយស្មោះត្រង់របស់ក្រុមប្រឹក្សាគ្រួសារអាចជួយបន្ធូរអារម្មណ៍ដ៏តានតឹងនោះបាន ។ ក្រុមប្រឹក្សាគ្រួសារអាចដើរតួជាការប្រជុំមួយដ៏ល្អដើម្បីលើកឡើងនូវកង្វល់ ឬ សុំជំនួយ ។
ផ្ដោតគំនិតរបស់អ្នកទៅលើដំណោះស្រាយ ដែលអាចកើតមានចំពោះបញ្ហានោះ ហើយចៀសវាងពីការឈ្លោះប្រកែកគ្នា ឬការរិះគន់ ។ ចូរមានចិត្តរាបសា ។ ចែកចាយសេចក្ដីស្រឡាញ់ដល់ស្វាមី ឬភរិយារបស់អ្នក ហើយរំឭកគ្នាទៅវិញទៅមកថា អ្នកទាំងពីរកំពុងធ្វើការរួមគ្នាដើម្បីបង្កើតអាពាហ៍ពិពាហ៍ និង គ្រួសារមួយដ៏រីករាយ និងដ៏នៅអស់កល្បជានិច្ច ។
រក្សាបរិយាកាសល្អជានិច្ច
ប្រសិនបើអ្នកគិតថា ក្រុមប្រឹក្សាគ្រួសារគ្រាន់តែជា « ពេលដ៏តានតឹង … ហើយមិនដែលទទួលស្គាល់ … នូវជោគជ័យ ឬកោតសរសើរដល់ [ សមាជិកគ្រួសារអ្នក ] ហើយបង្ហាញសេចក្ដីស្រឡាញ់របស់អ្នកដល់ពួកគេ នោះពួកគេនឹងភ័យខ្លាចចំពោះក្រុមប្រឹក្សាគ្រួសារ » ។9
ពុំមែនរាល់ការប្រជុំក្រុមប្រឹក្សាគ្រួសារត្រូវតែផ្ដោតទៅលើបញ្ហា ឬការសម្រេចចិត្តជានិច្ចនោះទេ ។ អ្នកអាចយកឱកាសនោះដើម្បីចែកចាយពីរឿងល្អៗអំពីភរិយា ឬស្វាមីរបស់អ្នក ឬ ចែកចាយពីពរជ័យនៅក្នុងជីវិតរបស់អ្នក ។ អ្នកអាចអបអរដល់ជោគជ័យផ្ទាល់ខ្លួន ពិភាក្សាពីរបៀបដើម្បីពង្រឹងខាងវិញ្ញាណ ដល់អាពាហ៍ពិពាហ៍ និង គ្រួសាររបស់អ្នក ដាក់គោលដៅរួមគ្នា ឬបង្ហាញអំណរគុណចំពោះភាពរឹងមាំ ឬទង្វើនៃការបម្រើរបស់ស្វាមី ឬភរិយាអ្នក ។ សូមប្រើក្រុមប្រឹក្សាគ្រួសារដើម្បី « បង្កើតទម្លាប់នៃទំនាក់ទំនង និង ការគោរពគ្នាទៅវិញទៅមកដែល … [អ្នក និង ស្វាមី ឬភរិយាអ្នក] អាចពឹងផ្អែក កាលបញ្ហាធំៗ ហើយពិបាកបានកើតឡើង » ។10
តស៊ូ
« ចូរយើងធ្វើឲ្យអស់ពីលទ្ធភាព ហើយព្យាយាមធ្វើឲ្យប្រសើរឡើងជារៀងរាល់ថ្ងៃ ។ កាលភាពទន់ ខ្សោយរបស់យើងបានលេចឡើង យើងអាចខំព្យាយាមកែតម្រូវវា ។ យើងអាចមានការអត់ទោសដល់កំហុសចំពោះខ្លួនឯង និងចំពោះមនុស្សដែលយើងស្រឡាញ់ឲ្យកាន់តែច្រើន » ។11
ជាចុងក្រោយ សូមចងចាំថា ការដាក់ជំនួសទម្លាប់នៃទំនាក់ទំនងមិនល្អជាមួយនឹងគំរូវិជ្ជមានត្រូវការពេលវេលា និង ការអនុវត្ត ។ ក្រុមប្រឹក្សាគ្រួសារដំបូងរបស់អ្នកអាចទំនងជាមានភាពឆ្គាំឆ្គង ឬ គួរឲ្យខ្លាចញញើត ប៉ុន្តែនៅពេលអ្នកព្យាយាមទំនាក់ទំនងជាមួយគ្នាដោយរាបសា ហើយដាក់បញ្ចូលព្រះអម្ចាស់នៅក្នុងការសម្រេចចិត្តរបស់អ្នក អ្នកនឹងយល់ដឹងកាន់តែប្រសើរពីពរជ័យនៃក្រុមប្រឹក្សាគ្រួសារ ។
ព្រះអម្ចាស់មានព្រះទ័យចង់ឲ្យយើងមានសេចក្ដីសុខសាន្តនៅក្នុងផ្ទះ និង ក្នុងទំនាក់ទំនងរបស់យើង ។ ទ្រង់ជួយយើងកាលណាយើងមានកំហុស ហើយប្រទានពរដល់កិច្ចខិតខំរបស់យើង ។ ដោយមានជំនួយរបស់ទ្រង់ យើងអាចថែទាំ « បរិយាកាសនៃការគោរព ការយល់ចិត្ត និង ភាពសុខដុម »12 ដែលនឹងធ្វើឲ្យផ្ទះរបស់យើងប្រៀបបាន « នឹងស្ថានសួគ៌នៅលើផែនដី » ដូចដែលប្រធាន ថូម៉ាស អេស ម៉នសុន បានសន្យា ។13