Uotakin ana Kakabwaia te Nakoanibonga nakon Mweengam
Ngkai ko kawakin am berita aika tabu, ko kabanea nanom nakon mwaakan te nakoanibonga ni kakabwaia mweengam ao am utu.
Kamataata iroun Sudi McCollum
Ko na kanga ngkoe ae te kairake n ataeinimwaane ke te kairake n ataeinaine, n aki ongeia bwa tera am kaangaanga n am utu, ni kabanea nanom ni mwaakan am berita aika tabu n te nakoanibongaa ake ko karaoi n am tai ni bwabetito ni kakorakora mweengam ao am utu? Ataakin te beku ao kakawakia ara utu n ana babaire te Uea e kona ni kaungaira bwa tina karinei berita ake ti karaoi ao n taraia raoi bwa ara kabanea n tamaroa ao ingaingan nanora n ibuobuoki e karaoaki inanon oin mweengara. Ti na tarai tabeua kawai ake ti kabanei nanora iai nakon mwaakan ara berita aika tabu ni kakorakora ao ni buokia naake a rang ni kakawaki riki nakoira.
Ko na Kanga ni Kaeka?
Bon tairikin te Moanibong, ao e koro tiran am bwai n reirei ae ko na karaoi ni mweengam. Ko ongo bwanaan tamam ni weteia am utu bwa a na ikotaki ibukin te botaki n utu n te tairiki. Tera ae ko karaoia?
Rinerine A: Ko kaeka, “A, Tamau, E aki reke au tai ibukin te tairiki anne! I riai ni kamatebwai!”
Rinerine B: Ko waekoa n ikotiia tarim ma mwaanem ao ni kukurei n ira waakin te tataro, anene, ao te reirei.
Ngkana Iai te Kairiri n te Nakoanibonga n te Mweenga
Ni boutoka am karo man am anganano n ira waakin am botaki n utu n te tairiki, kainutu, ao ana kamatebwai te utu ni booki aika tabu boni kawai ni kakorakora te kairiri n te nakoanibonga inanon mweengam. A mwaiti riki tabeua kawai, n aron:
-
Tataro ibukiia Am Karo. (A na bon tatataro ibukim ni katoa bong.)
-
Boutokaia am karo n nakoaia n te Ekaretia ao anga am ibuobuoki ni karaoi mwakuri n te mweenga, ai moarara riki ngkana a bon rang tabetabe n aron mwiokoia aika kakawaki.
-
Buokia am karo ni butimwaaia am tia reirei n te mweenga ngkana a roko, ao ngkanne kakauongo raoi nakon aia rongorongo.
-
Ngkana iai te tembora n am aono, anga am ibuobuoki n tobwaia tarim ma mwaanem aika uarereke n te aro bwa aonga ni kona n nako n te tembora am karo ao n iri waakin otenanti n te nakoanibonga.
Uringnga bwa tiaki tii kaaro aika a katabeaki n kaoan ao kateimatoan te Tamnei inanon mweengam. E mwaiti riki ae ko kona ni karaoia ni kaoa te Tamnei rinanon am mwakuri ao kateim?
Ngkana Akea te Nakoa ni Kairiri n te Nakoanibonga n te Mweenga
Uutu a aki tara ke ni mwakuri n te kawai ae ti te arona. Ko kona ni mena n ana utu am karo ae akea buuna ke akea kaain te nakoanibonga iai are e tararua inanon mweengam. Iai kawai riki aika mwaiti ni kaoa mwaakan te nakoanibonga ni kakorakorako ao am utu. Aikai bwaai ake ti na karaoi, n aki ongeia bwa tera ara kaangaanga:
-
Karaoa am tataro i bon iroum, kamatebwai booki aika tabu, ao te aki mamatam. Kekeiaki aikai a na buokiko ni kamatoatoako n te maiu n tamnei ao ni kaoa te Tamnei nako nanon maium ao nakon taabo ake iai kaungakim iai.
-
Karekea raoi am tai ibukin nakoam ke mwiokoam n te Ekaretia ao n tauraoi ibukin taian reirei n te Tabati. Karaoan aei e na buokiko n iai onimakinam i bon iroum ao ni kaota am boutoka n ana burokuraem te nakoanibonga.
-
Kaota am karinerine nakoia kaain am utu ao ni boutokai aia waaki ni kakukurei aika iai mwiia aika raoiroi. Rinerine aikai a kakorakora te utu ae bwanin.
-
Tibwauai ma am utu bwai ake ko reiakin ao ni karaoi n am kiraati n te Ekaretia ao n taian kooram. Bon te kawai are ngaia are e na uoti reirein te euangkerio nakon mweengam.
-
Kakaei kawai ni beku ibukia aomata ake ko reitaki ma ngaiia rinanon mwakuri n akoi aika a bebete.
-
Ibuobuoki ni katobibia te auti man karaoan mwakuri ke ni buoka tarim ke mwanem.
-
Kaota aron ana tangira Kristo nakoia am utu—e na bon korakora mwina ni katean aan ana reitaki te utu ae matoatoa nakon bwai riki tabeua ake ko kona ni karaoi.
Karinei Am Berita aika Tabu
Ni karaoan te beku, n tangira, ao ni kakorakora ara utu, ti na bon koaua raoi nakon ara berita aika tabu ake ti karaoi n te bwabetito n tei bwa taan kakoaua ngaira ibukin Iesu Kristo, ni kawakin Ana tua, ao ni kakorakoraia naake irarikira. Ti kona ni barea raoi korakoran berita aika tabu n te nakoanibonga ni karaoia bwa te kakabwaia nakon ao te buoka inanon mweengara ma ara utu. Nakoanibonga, mwakuri n ibuobuoki, ao mweenga bon taeka ake a riai n toma ma ara iango n tainako. Kaain ara utu boni ngaiia moa aika a ria ni moanibwai ngkai ti kakaei kawai n ira waakin te mwakuri ni kamaiu. Ngkana ti kakorakora ara utu, ti kakorakora naba te Ekaretia, ara kawa, ao te aonaba.