Te Tia Kakoaua ae Onoti E Kakoaua te Kristo ae Maiu
Membwa n te Moan Beretitentii ao te Kooram n Abotoro n te Tengaun ma Uoman bon burabeti, taan mamata, ao taan kaotioti n taai aikai ake a tei bwa “taan kakoaua n aran te Kristo ni kabuta te aonaaba” (tara D&C 107:23). Ibukin anne, iai tabeia ni kaota aia koaua iaon aron Iesu Kristo n Atua ao n Ana mition bwa te Tia Kamaiu ao te tia Kabooi maiuia kaain aonaaba.
N ni kiibu ake imwiina, mwaane aika a rineaki ao n taekinaki a tibwaua aia koaua n Ana Mwakuri ni Kamaiu te Tia Kamaiu, te Mangauti, ao koauan maiuna.
Iesu Bon Te Tia Kabooi Maiura
“Ma nanou ni kabane ao nanon tamneiu ae korakora, I tabekarake bwanaau bwa te tia kakoaua n te koaua ae onoti ao ni katanoata bwa e maiu te Atua. Iesu bon Natina, ti Ana Riki Temanna te Atua n te rabwata. Ngaia bon te Tia Kabooi Maiura; Ngaia bon ara Tia Raoi ma te Tama. Boni Ngaia are e mate iaon te kaibangaki ni kamaiura man ara bure. E riki bwa te moa n uaa n te Mangauti. Bukina bwa E mate, a na bane ni manga uti. O, ai kakukureira te rongorongo ae reke: ‘I ataia bwa e maiu au Tia Kamaiu!’” [“I Ataia Bwa E maiu Au Tia Kamaiu,” Anene, nambwa 136].”
Beretitenti Thomas S. Monson, “I Know That My Redeemer Lives!” Liahona, Meei 2007, 25.
Ngai Te Tia Kakoaua
“Ngai te tia kakoaua ni Manga Utin te Uea ae koaua raoi n aron are I mena ikekei n te tairiki ma ana reirei ake uoman n ana auti iaon te kawai are Emauti. I ataia bwa E maiu n aron naba Iotebwa Timiti ngke e noora te Tama ao te Nati n te ota ae raneanea n te ingabong n te buakonikai i Palmyra. …
“… I kakoaua ngkai te tia kakoaua ibukin te Tia Kamaiu ae uti ao Te Tia Kabooi Maiura.”
Beretitenti Henry B. Eyring, Te Moan ni Kauntira n te Moan Beretitentii, “Come unto Me,” Liahona, Meei 2013, 25.
Te Mwakuri ni Kamaiu ao te Kamaiuaki
“Te Atua te Tama boni ngaia are e korea te euangkerio; boni mwakoron ana baaire ni kamaiu te Atua ae kakawaki, ke te baire ibukin kaboan maiura, E atongaki bwa ana euangkerio Iesu Kristo bukina bwa ana Mwakuri ni Kamaiu Iesu Kristo are e karaoa kaboan maiura ao te kamaiuaki bwa e na kona ni karaoaki. Rinanon te Mwakuri ni Kamaiu ni kabane mwaane, aine, ao ataei a bane ni kamaiuaki man te mate n rabwata, ao ana bane ni kamaiuaki man oin aia bure ti ngkana a kariaia ao a ongotaeka nakon ana euangkerio Iesu Kristo… .
“N aei ao I kaota au koaua ma nanou ao au iango ni kabane.”
Beretitenti Dieter F. Uchtdorf, Kauoman ni Kauntira n te Moan Beretitentii, “Have We Not Reason to Rejoice?” Liahona, Nobembwa 2007, 19, 21.
Iesu Bon te Kristo
“I ataia bwa te Atua bon Tamara. E kabwarabwara Ana Rikitemanna, Iesu Kristo, nakon Iotebwa Timiti. I taekinna nakoimi bwa I ataia bwa Iesu bon te Kristo. I ataia bwa E maiu. E bungiaki n te kabanea n tai. E reireia Ana euangkerio ao e kataaki. E korakai ao e tauraki ao ni mangauti n te kateniua ni bong. Ngaia n aron Tamana, iai rabwatana n iriko ao n rii. E karaoa Ana Mwakuri ni Kamaiu. I kaota au koaua Ibukina. Ngai bon te tia kakoaua Ibukina.”
Beretitenti Boyd K. Packer, Beretitenti man te Kooram n Abotoro n te Tengaun ma Uoman, “Tengaun ma uoman,” Liahona, Meei 2008, 87.
Te Kamaiu ibukin te Utu
“[Iesu Kristo] bon boton raoi te iango n ana baire te Tama ae akea tokina, te Tia Kamaiu are e katauraoaki bwa e na riki bwa te tia kabooi maiuia aomata. E kanakoa natina ae tangiraki te Atua bwa e na tonakinaki iaon Bwakan Atam ao Ewa. E roko nakon te aonaaba bwa ara Tia Kamaiu ao te Tia Kabooi maiura. E tokanikai iaon kangangan te mate n rabwata man kakean Oin maiuna. Ngke E mate iaon te kaibangaki, ao Tamneina e maenako ma Rabwatana. N te kateniua ni bong ao a manga ikotaki Tamneina ao Rabwatana n akea tokina, n aki kona ni manga raurenako.”
Unmwaane L. Tom Perry man te Kooram n Abotoro n te Tengaun ma Uoman, “The Plan of Salvation,” Liahona, Nobembwa 2006, 71.
Boton te Mwakuri n Rongorongon te Aomata
“Ana Mwakuri ni Kamaiu te [Tia Kamaiu] e riki i Ketetemwane, ike maonona ai aron timtim n raraa aika korakora (tara Ruka 22:44), ao iaon Korokota (ke Te Tabanou), ike E tabekaki rake iai rabwatana iaon te kaibangaki nakon te ‘tabo n tabanou,’ are e kabwarabwara te mate (Mareko 15:22; Mataio 27:33; tara naba 3 Nibwaai 27:14). Te Mwakuri ni kamaiu ae akea tokina aei e na kamaiua te aomata man te mate ae korakora (tara 2 Nibwaai 9:7). Ana Mwakuri ni kamaiu te Tia Kamaiu e na karika te manga uti bwa te bwai ae koaua ao te maiu ae akea tokina ae na riki nakoira ni kabane. Ana mwakuri ni kamaiu e riki bwa boton te mwakuri n rongorongon te aomata.”
Unimwaane Russell M. Nelson man te Kooram n Abotoro n te Tengaun ma Uoman, “The Peace and Joy of Knowing the Savior Lives,” Ensign, Ritembwa 2011, 20; Liahona, Ritembwa 2011, 22.
Te Karea ibukin te Bure
“Iesu Kristo e kaitara ma te rawawata ae akea kabotauana ni Karikia bwa te karea ibukin aia bure ni kabane. Te karea anne e karekea te kabanea n tamaroa—te Tiibu te teei ae akea buakakana ao akea barekana—ibukin ataakin te buakaka—aia bure kaain aonaaba. …
“Te anga karea anne—ana Mwakuri ni Kamaiu Iesu Kristo—boni boton te baire ni kamaiu. …
“I ataia ae Iesu Kristo bon ti Ana Rikitemanna te Atua te Tama ae Akea Tokina. I ataia bwa ibukin Ana anga karea ni kamaiu, iai ara koaua n te aki mamate ao te tai ibukin te maiu are akea tokina. Bon ara Uea, ara Tia Kamaiu, ao ara Tia Kabooi Maiura.”
Unimwaane Dallin H. Oaks man te Kooram n Abotoro n te Tengaun ma Uoman, “Anga Karea,” Liahona, Meei 2012, 19, 22.
E Kaira Ana Ekaretia te Tia Kamaiu n te Bong Aei
“Ana Mwakuri ni Kamaiu Iesu Kristo bon mwakoron ana baire Tamara are i Karawa ae rang ni kakawaki ibukin ana mwakuri n te aonaaba aei ao ibukin kamaiuakira. Ai kukureira ngaira ngkai e aki rinnako Tamara are i Karawa ma e taua arona n Tama ni kamaiua Natina ae Tangiraki. Ibukina Ana tangira ae akea tokina ibukim ao ibukiu, E kariaia Iesu bwa e na katia Ana mition ae a kaman taekinna bwa e na riki bwa te Tia Kabooi Maiura. …
“Iesu Kristo, te Tia Kamaiu ao te Tia Kabooi Maiuia aomata ni kabane, e aki mate. E maiu—Natin te Atua ae a tia ni manga kautaki e maiu—anne au koaua, ao E kaira ana mwakuri Ana Ekaretia n te bong aei.”
Unimwaane M. Russell Ballard man te Kooram n Abotoro n te Tengaun ma Uoman, “Te Mwakuri ni Kamaiu ao Kakawakin Temanna te Tamnei,” Liahona, Meei 2004, 85, 86.
Ara Kantaninga, Ara Tia Raoi, Te Tia Kabooi Maiura
“E mena kamanoara iroun [Tamara are i Karawa] ao Natina ae Tangiraki, Iesu Kristo. I ataia bwa e tangiriko te Tia Kamaiu. E na kakoaua am kekeiaki ni kakorakora am koaua n te aro bwa e na riki bwa te mwaaka ae kororaoi ibukin te raoiroi ni maium, te mwaaka are e na kamatoako n taai ni kainnano ao n anganiko te rau ao te aki nanououa n taai n nanououa.
“Ngkai ngaia temanna maibuakoia Ana Abotoro ae kariaiakaki bwa e na kaota ana koaua Ibukina, I kakoaua ma te aki nanokokoraki bwa e maiu te Tia Kamaiu, bwa E a tia ni manga kautaki, te aomata ae kakukureiaki ma te tangira ae kororaoi. Ngaia bon ara kantaninga, ara Tia Raoi, ara Tia Kabooi Maiura.”
Unimwaane Richard G. Scott man te Kooram n Abotoro n te Tengaun ma Uoman, “Mwaakan te Kakoaua ae Korakora,” Ensign, Nobembwa 2001, 89; Riaona, Tianuare 2002, 103.
Nimakin te Mwangko ae Mao
“N te Onaroka are i-Ketetemwane, ara Tia Kamaiu ao Te Tia Kabooi Maiura e aki kerikaki man nimakin te mwangko ae mao n te Mwakuri ni Kamaiu [tara D&C 19:16–19]. Ao iaon te kaibangaki E a manga rootaki riki ni karaoan nanon te Tama, ni karokoa E kona ni kangai, ‘E a tia’ [Ioane 19:30]. E a tia ni keiaki ni karokoa te toki. Ni kaekaan ana ongotaeka ae kororaoi te Tia Kamaiu n tei ni matoatoa, e taekinna Tamara are i Karawa, ‘Nooria natiu ae Moan te Tangiraki, are I kakatonga irouna, are e a tia ni mimitong arau irouna,’ [3 Nibwaai 11:7].
“… Ti a neboa aran te Atua man teira ni matoatoa ma ara Tia Kamaiu, Iesu Kristo. I kaota au koaua ae onoti bwa E maiu.”
Unimwaane Robert D. Hales man te Kooram n Abotoro n te Tengaun ma Uoman, “Teei ni Matoatoa n Taabo aika Tabu,” Liahona, Meei 2013, 51.
Bon Ti Ana Riki Temanna n Nati te Atua ae Kororaoi
“I ataia bwa te Atua e mena n tainako ao ni kawai nako ao ni kanganga ni kabane bon te Tama i Karawa ae tangira, ao ni kakabwara bure. I ataia bwa Iesu bon ti natina ae E kororaoi, are e anganaki maiuna man ana kantaninga te Tama ao te Nati ibukin kaboan maiura ngaira ni kabane aika tiaki kororaoi. I ataia bwa E uti man te mate bwa e na manga maiu, ao bukina bwa E karaoia, ngkoe ao Ngai ti na manga karaoia naba.”
Unimwaane Jeffrey R. Holland man te Kooram n Abotoro n te Tengaun ma Uoman, “Te Uea, I Kakoaua,” Liahona, Meei 2013, 95.
I Ataia bwa E Maiu Te Tia Kamaiu
“I kaota au kakoaua ao au kakaitau ibukin ana anga karea te Uea Iesu Kristo ae akea tiana ao akea tokina. I ataia bwa e maiu au Tia Kamaiu. I a tia n rinanon mwaakana ni Kabooira ao mwaakana ni kamaiu, ao I kakoaua bwa mwaaka aikai a koaua ao a tauraoi ibukira n tatabemaniira nako. Ni koauana “ni korakoran te Uea” ti kona ni karaoi ao n tokanikai iaon bwaai ni kabane ngkai ti waaki rake inanon mwanangara n te maiu ae mamate.
Unimwaane David A. Bednar man te Kooram n Abotoro n te Tengaun ma Uoman, “The Atonement and the Journey of Mortality,” Ensign, Eberi 2012, 47; Liahona, Eberi 2012, 19.
E Kakoroa Nanon Ana Mwakuri Kristo
“[Te Tia Kamaiu] e katoka Iaona ‘rawawtan aia bure aomata’ ao te ‘kakamaku are e kona Taatan … ni karaoia’ [James E. Talmage, Jesus the Christ, 613]. N te kawai aei E kekeiaki ni kaitarai kataaki aika karioaki aika kewe ao kanganga aika korakora are e a kairia nakon Taurakina. Aio are e a kairia nakon manga utin Kristo n Tabatin te Itita. E kakoroa nanon ana mition ae tabu Kristo bwa te Tia Kamaiu ao te Tia Kabooira. Ti na tia ni manga kautaki man te mate ao ni manga ikotaki tamneira ma rabwatara.…
“I kaota au koaua n abotoro bwa e maiu Iesu Kristo ao bon te Tia Kamaiu ao te Tia Kabooi Maiuia kaain aonaaba. E a tia ni katauraoa te kawai nakon te kukurei ni koaua.”
Unimwaane Quentin L. Cook man te Kooram n Abotoro n te Tengaun ma Uoman, “Ti Irira Iesu Kristo,” Liahona, Meei 2010, 83–84, 86.
E Kaboi Maiura te Tia Kamaiu
“Karawawatakin te Tia Kamaiu i Ketetemwane ao kainnanona iaon te kaibangaki e kaboira man ara bure man kanakoraoan kainnanoan te motiraoi are iaora. E karababa te nanoanga ao ni kabwarai aia bure ake a rairi nanoia. Te mwakuri ni kamaiu e kakeai naba ara bure ake a tia ni motikaki taekara nako iai man te kamaiuaki ao ni buokira ibukin te kammarakaki ae ti teimatoa ni karekea n aki atai. ‘‘Bwa taraia, e a tia ni kammarakaki ibukiia aomata ni kabane aika maiu, n ai aroia mwaane, aine, ma ataei, aika kaain ana utu Atam’ (2 Nibwaai 9:21; tara naba Aramwa 7:11–12). …
“… Kabanean kaboan maiura iroun Iesu Kristo ao Irouna n tingaia. I nanorinano ao ni kakaitau ni kinakina Ngkai Ngaia te Tia Kabooi Maiura.”
Unimwaane D. Todd Christofferson man te Kooram n Abotoro n te Tengaun ma Uoman, “Kaboan Maiura,” Liahona, Meei 2013, 110, 112.
Te Mangauti ao te Maiu
“Ni bwaai ni kabane, ti katanoata ara Tia Kamaiu ao te Tia Kabooi Maiura, Iesu Kristo. Bwaai ni kabane ake iai iroura—bwaai ni kabane ake ti na bwaibwai iai—ti bae Irouna. …
“A kaokiokaki Ana taeka rinanon taian tienture:
“‘Boni Ngai te manga-uti, ao te maiu, ane onimakinai, ngkana tao e boni mate, ao e na manga boni manga maiu:
“‘Ao ane maiu ma n onimakinai ao e na bon aki mate’ (Ioane 11:25–26).
“Tariu ao mwaneu, E maiu, E tia ni manga kautaki. E kaira Ana mwakuri ae tabu iaon te aba.”
Unimwaane Neil L. Andersen man te Kooram n Abotoro n te Tengaun ma Uoman, “Come unto Him,” Liahona, Meei 2009, 80.