Burabeti n te OTetemanti

Moote

“Ae korakora boni Moote bwa e kabwarabwaraki Kristo bwa te Burabeti n aron te tia kairiri n ana taanga ni buaka ngkoa Iteraera.”¹ —Unimwaane Bruce R. McConkie (1915–85) man te Kooram n Abotoro n te Tengaun ma Uoman

I bungiaki i Aikubita n te tai are ngke au botanaomata, kaain Iteraera, a bane ni mena iaan te tautoronaki. Ni maaka rikiraken mwaitia toro aika kaain Iteraera, e anga ana kaetieti Barao bwa a na bane n tiringaki naati mwaane aika kaain Iteraera inanon bungiakiia. Ni kamanoai, e karabaai tinau inanon teniua namwakaina imwiin bungiakiu imwain ae e nneai inanon te abein ibuakon maunein te karanaga ae te Naire. Natin Barao te aine e kuneai ao e kaikawai bwa natina te mwaane.²

Ngke I a ikawai, I kitana Aikubita ao I maeka n te aba are Mirian. Ikanne ao I karekea te kimwareirei ma Ietero, te tia kawakin tiibu ao te ibonga, ao n iein ma natina te aine Tibora. I karekea te Nakoanibonga ae te Merekitereka mairoun Ietero.³

N te bong teuana ngke I kawakin ana nanai n tiibu Ietero, e kaoti nakoiu te Uea n te buakonikai ae ura ao e weteai bwa n na kainaomataia natin Iteraera man te tautoronaki.⁴

I oki nako Aikubita man tuanga Barao bwa e na kainaomataia ana aomata te Uea, ma irarikina e karikirakea aia mwakuri. Te Uea e kanakoi rekenikai nako aoia kain Aikubita, ma Barao e teimatoa n rawa ni kainaomataia kain Iteraera. Te kabanea n rekenikai bon te anera ni kamaunananko are e tiringia moan n nati ni mwaane man utu ni kabane iaon Aikubita. A kawakinaki Ieraera mairoun te anera ni kamaunanako man kawawanakoan raraan te tiibu te teei ae moan raoiroi iaon aia mataroa ao n nikiran mataroa inanona. Rinanou, te Uea e karika te Toa are te Riao bwa kanga te otenanti ni buokia Iteraera ni kauringa te kakai aei ni katoa ririki.⁵

Te kabanea n rekenikai are e a karika Barao bwa e na taenikai ao ni kainaomataia kain Iteraera. Ma imwiina Barao e kamatoa nanona ao e kanakoia ana taanga ni buaka n rimwiia kain Iteraera ake a nako. E kakabwaiai te Uea ma te mwaaka ni katabwena Tari ae Uraura, ao ti kamaiuaki iaon te tano ae mau ngke taari e bwaro nako aoia ana taanga ni buaka Barao.⁶

Te Uea e kairiira rinanon te rereua n te nang n te ngaina ao te boua ae te ai n te bong. E kateimatoaira ma te ran, te berena, ao te man ni kiba ae te kuere.⁷

I tamwarakea te Maunga ae Tinai, ike I tiku iai 40 te bong ao ni karekei Tua ake Tebwina mairoun te Uea. Ngke I oki man te maunga, a tia Iteraera n aki butimwaea te Atua ao ni karaoa katotongan te kao ae karaoaki man te koora n taromauria. Aki manga tau ni karekea ana tua te Atua ae e a tia n anganai, ngaia ae I a urui mwaae aika inanona. I oki nakon te maunga, ike e anganai te Uea te tua ae uarereke riki are e aranaki n arau—ana tua Mote.⁸

N te rereua ao te Uea e kaota nakoiu te baire ni katea te tabaenako, ke te tembora ae kona ni uouotaki. Ti uouota te tabaenako inanon mwanangara n te aro bwa ti na nebonebo inanona. Inanon te tabaenako, aomata a karekei otenanti ao I taetae nakon te Uea “ni kaitara ma ngaia, n ai aron te aomata ae taetae nakon raona.”⁹ Te Uea e kaota naba nakoiu aron karaoan te ati ni berita, te bwai ae kakawaki ae tabu are e katokaki raoi inanon mwakoron te tabaenako ae te kabanea n tabu, te Tabo ae moaniban te Tabu.¹⁰

Ngke e kanakoia “naeta aika tiritiri” te Uea bwa a na katuaia Iteraera, I tuangaki bwa n na karaoa te naeta man te buraati ao ni karieta n te boua n te aro bwa nake a tenaaki irouia naeta a na kona n taraia ao ni kamaiuaki. Ma ibukin aia kainikatonga ao bebeten te mwakuri, a mwaiti aika aki taraia ao n tokina a mate.¹¹

Te Uea e katiotioia tenaan Iteraera i nanon te rereua 40 te ririki imwain are e kariaia bwa a na rin n te aba ni berita.¹² I aki rin ma I “uotaki rake iroun te Tamnei” nakon te Uea.¹³

Bwai aika a na taraki

1. Bruce R. McConkie, Mormon Doctrine, 2nd ed. (1966), 515; tara naba Te Tua Kaua 18:15–19.

2. Tara Te Otinako 1; 2:1–10.

3. Tara Te Otinako 2:11–22; Doctrine ao Covenants 84:6.

4. Tara Te Otinako 3; 4:1–17.

5. Tara Te Otinako 5–12; Etekiera 45:21.

6. Tara Te Otinako 14.

7. Tara Te Otinako 13:21–22; 15:22–27; 16; 17:1–7.

8. Tara Te Otinako 24:18; 31:18; 32; 34.

9. Te Otinako 33:11

10. Tara Te Otinako 25–29; 40:21.

11. Tara Warekaia Iteraera 21:6–9; 1 Nibwaai 17:41; Aramwa 33:19–20.

12. Tara Warekaia Iteraera 14:33–34.

13. Aramwa 45:19.

Bwaokin te Koaua: Moses

Ana Koroboki Moote: N ikotaki ma ana boki Moote n te Pearl of Great Price, Moote e koroi moan boki ake nimaua n te Baibara: Karikani Bwai, Te Otinako, Nakoaia Ibonga, Warekaia Iteraera, ao Te Tua Kaua.

Tabera imwain te maiu ae mamate aei: e rineaki bwa e na kairiiri ni boong aikai (tara Abraham 3:22–23)

Tabera n te maiu ae mamate aei: e kairia kain Iteraera bwa ana otinako mai i Aikubita; karekea te tua iaon te Maunga are Tinai (tara Te Otinako 12; 20)

Tabera imwin te maiu aei: e kaoti iaon te Maunga te Bitaki, n anga kingin te nakoanibonga nakon Betero, Iakobo, ao Ioana (tara te Kairi nakon Booki Aika Tabu, “Transfiguration,” scriptures.lds.org); e kaoti n te Kirtland Tembora i Ohio, USA, n Eberi 3, 1836, kaokakin kiing n ikotakin Iteraera nakon Ioteba Timiti (tara D&C 110:11)