Katotonga te Burabeti
Man te taromauri are e karaoia te Church Educational System n te Brigham Young University–Idaho n Meei 5, 2013. Ibukin te atureti ae bwanin, nakon lds.org/broadcasts.
Ngkana ti katotonga Beretitenti Monson ao ni kataia n riki n ai arona, ti na karekea te tokanikai n riki bwa ana reirei aika kakaonimaki te Uea Iesu Kristo.
Tabeua te ririki n nako, bon imwain te maungatabu ni kabuta, Beretitenti Thomas S. Monson e anga te reirei ae moan te tikiraoi. N te tai aei ao bon te tai ni botiia Mataniwi ni Kabuta ake a tia ni mwananga nakon te Kawa ae Salt Lake, a mwaiti ake a roko man tabo nako n te aonaaba ake a beku iai bwa Beretitentii n te Aono. Ti a roko ni botaki bwa ti na reireiaki irouia kaain te Moan Beretitentii ao Abotoro ake Tengaun ma Uoman.
Ngke e a roko te tai ni bowi, ni kabane a tara ni bane n roko ma ti Beretitenti Monson. Tabeua te miniti imwain wakin te bowi, e toki ara maroro n tatabemaniira ao ti tekateka ma te karinerine n ongora nakon te katangitang n te moan kaukuki, ni kantaninga te burabeti bwa e na roko.
Ti tataninga ma te taotaonnanano ngke e a boo 9:00 n te ingabong ao n nako imwiina. Temanna e otinako n te mataroa n iteran te ruu teuana—ae ataaki n nooria ngkana e kainnanoaki te ibuobuoki. Ngke e oki, e taku “Beretitenti Monson e na raoni ngkami n te tai ae kimototo.”
Tao 15 te miniti imwiina, Beretitenti Monson e rinnako n te ruu. Ma te karinerine, ti teirake ngke e rin. Ti bon kukurei n noria ao ni kukurei n taraana ae marurung. Bon akea bukina ae otara bwa bukin tera e na rimwi.
Beretitenti Monson e kaineta te bwabete ao n taku, Tariu, I karautaeka n te rimwi, ma kainnabau e kainnanoai n te ingabong aei.”
E bon rang katikaki nanou ma te nanorinano, ao I aki toki n iangoa ana taeka.
Aio bon te bowi ae moan te kakawaki. Ni kabane aika taui nakoa n te Ekaretia aika rietata a ikotaki, ma Beretitenti Monson e katea te banna ni katoto nakoira ni kabane. Kainnabana e kainnanoia, ao e taua te tai ni karaoa tabena ibukina. Bon te reirei ae korakora. I aki uringii riki ake a taekinaki n te bong anne, ma I uringnga te reirei bwa: “Kainnabau e kainnanoai.”
Katotonga ana Banna te Burabeti
I tangiria ni kan anga nimaua kawai ake ti kona iai n katotonga ana banna Beretitenti Monson.
1. Ti kona n taekina te koaua, ao ti kona ni kukurei.
Inanon te Pearl of Great Price, te Burabeti Iotebwa Timiti e kabwarabwara “anuana ni kukurei” (Joseph Smith—History 1:28). “Kukurei” e kabwarabwara naba Beretitenti Monson.
N te tai teuana ao Beretitenti Monson e taku: “Ti … kona n rineia ni karekea te anua ae raoiroi. Ti aki kona ni kaira te ang, ma ti kona ni kaeti taian ie. N taekana teuana, ti kona n rineia ni kukurei ao n taekina te koaua, n aki taraia bwa tera are e roko iaon kawaira.”1
N te bong teuana I tataninga i tinanikun ana ruu ni bowi te Moan Beretitentii. I a tia ni kaoaki nako ikekei bwa N na ira te bowi ni maroroakini bwain te tembora. I tekateka ni kainabwabu i tinanikun te ruu, n tii ngai. I taku bwa a tia ni waakina te boowi te Moan Beretitentii ao N na karinaki n raoniia inanon tabeua te miniti.
Ngke I tekateka ikekei, I kona n ongo ana kanimomoi temanna n ruo n rianna n te ruu are bubura. I iango ibon irou, “Iai ae e aki ota n te bwai ae e kakaraoaki ae riai. Ko na aki n ririaki ni kanimomoi i tinanikun ana aobiti te Beretitenti n te Ekaretia.”
Te miniti are imwiina te tia kanimomoi e rairaki n te koona—bon Beretitenti Monson. E bon kukurei, ao e taekina te koaua. E kamaurai ma te akoi man taku, “I taku bwa ti nang waakina te bowi inanon tabeua te miniti.”
E ngae ngke iai tibwangana ae rawawata n te Ekaretia ae bwanin, bon ngaia te banna ni katoto n te kukurei ao e kukurei anuana n tainako. Ti riai ni karaoa ae aron anne.
2. Ti riai n akoi ao n tangira nakoia natira.
E aki toki Iesu n tataekiniia ataei. Ana burabeti, ae Beretitenti Monson, e tataekiniia naba ataei. I a tia n nonoria, riki n tain katabu n tembora, arona n tangiriia ataei ao, man ana banna ni katoto, e reireiniira arora ae ti na karaoi nakoia. Ni katoa te katabu n te tembora e boboto iaoia ataei ana taratara. E tatangiria ni kariniia ni kaota tian te kateitei ao n tainako e kaoia bwa a na katuka te moota n atibun te maninganinga ni kanikinaea tian te tembora. E karaoia bwa a na kukurei iai. E karaoia bwa a na ururingnga. E bubura ana momoangare n tainako nakoia. E kaungaia ao e kamoamoaia. Bon te bwai ae tamaroa noorakina.
Ana kamauri n tangira n tainako e airi ma te kabooi bai, karurua taningana, ao te kaunganano ni karaoan te mwakuri ni mitinare ao te mare n te tembora.
Tabeua te ririki n nako e baireaki Beretitenti Monson bwa e na katabua te Tembora are te Oquirrh Mountain i Utah n ana rekenibong. N rokona n te tembora ao e a kaineta matan te mataroa n te tembora, te kurubu ni kairake a kaman ikotaki. A bon ataia bwa ana rekenibong Beretitenti Monson ibukina bwa a waaki n anenea “Kona Tekeraoi n am bonginibung” nakoina. E tei ao e kaitaraia ma te moangare ae bubura iaon moana. E kateitea naba baina are angkoa e kaira aia anene. N tokina a karina taekana “Ao a mwaiti riki.” E taku nakoiu, “Anne te mwakoro ae I tatangiria.”
Ataei ao kairake n te Ekaretia a tatangiria, ao akea te nanououa irouia bwa e tatangiriia naba!
3. Ti kona n ira ana wirikiriki te Tamnei.
E taekina tabena Beretitenti Monson ni kabaeaki nakon te Uea ao katabeana n ira ana wirikiriki te Tamnei ma taeka aikai: “Te bwai ae karewe are I a tia n rinanona I ataia inanon te maiu bon namakinan te wirikiriki ao karaoana ao imwina kuneakin are bon te kakokoroan nanon ana tataro temanna ke kainnanon temanna. Ao I tangiria bwa e na ataia te Uea bwa ngkana E kainnanoa karaoan te mwakuri, Tom Monson e na karaoa te tabe anne Ibukina.”2
Anne te banna are ngaira n tatabemaniira ti tangiria ni katotonga.
4. Ti kona n tangira te tembora.
E kinaaki Beretitenti Monson n rongorongon tai aika a nako bwa temanna te tia katea te tembora ae korakora n ongorongon te Ekaretia. Man te tai are e riki bwa te Beretitenti n te Ekaretia ni Beberuare 2008, e a tia n reitanako te mwakuri ae korakora ni katean taian tembora. N te kaonoua n ririki n nakoana ni burabeti, Beretitenti Monson e katanoatai babaire ni katean 33 tembora aika a boou.
E taku Beretitenti Monson bwa ti kona ngaira n tatabemaniira nako ni maiuakin maiu aika tau, ni baai ao naano aika itiaki, bwa e aonga te tembora n riingi maiura ao ara utu nako.3
E a tia naba n anganiira te berita ae tamaroa aio: “Ngkai ti tangira te tembora, riinga te tembora, ao n iri tetere n te tembora, maiura a na kaota ara onimaki. Ngkai ti roko n ana auti te Atua aika tabu, ngkai ti uringii ara berita aika tabu ake ti karaoi inanona, ti na kona n uoti kataaki nako ao n tokanikai iaon kariiri.”4
Ti na katotonga te banna are te burabeti e a tia ni kateia ibukira n tangiran te tembora.
5. Ti kona n akoini mwamwannano, ao n tangira.
Beretitenti Monson bon te banna ae moan te tamaroa n tangiraia tabeman. Ana reirei ni kabane a tia ni kaonaki ni kawaran mweenga, katokabai n anga kakabwaia; maroro iaon tareboon aika aki kantaningaaki n anga te kamanomano ao kaunganano: kanakoan reta ni kaunganano, kamoamoa, ao kakaitau; kawarii onaoraki ao taabo n tararua; ao ni karekean taai n irii taunimate ao n noora rabwatan te mate n aki ongea tabena aika bati.
N aron are e na karaoia te Tia Kamaiu, Thomas Monson e a tia ni kakaraoi bwai aika raraoi (tara Makuri 10:38) ao ni kakabwaia ao tangiriia tabeman; aio e a tia n riki bwa te bwai ni kaunganano inanon maiuna.
Te banna ae rangi n tamaroa n ana akoi Beretitenti Monson e riki inanon 2012. Ngke e a kan tia te Tembora n te Kawa ae Brigham City Utah, I kaitibo ma te Moan Beretitentii ni maroroakin babaire ibukin te katabu. Ngkai Brigham City bon tii teuana te aoa kaeana i meangin Salt Lake City, e na rangi ni bebete iroun Beretitenti Monson ni mwananga nako ikekei ibukin te katabu.
Ma, Beretitenti Monson e taku, “Brigham City bon mweengan Beretitenti Boyd K. Packer, aio te Abotoro ae kakannato are ea tia n tekateka irarikiu inanon ririki aika mwaiti n te Tengaun ma Uoman. I tangiria bwa e na karekea te karineaki ni kakabwaia katabuan te tembora ae mena n oin ana kawa. N na kararoai, ao N na katabea Beretitenti Packer bwa e na katabua te Brigham City Tembora. I tangiria bwa e na riki bwa te bong ae kakawaki irouna.”
Bon te bong ae moan te kakukurei iroun Beretitenti Packer ao Titita Packer, are e ikawairake naba i Brigham City. I bon rang n riingaki iroun Beretitenti Monson n ana akoi ni kaotan ana mwamwannano nakon ana Abotoro. Ti kona n tibwauaia ao n akoi ao n iango riki nakoia ake irarikira.
Ana Baeten te Burabeti
E a tia n reireiniira Beretitenti Monson te kawai ni maiuakin maiura ma ana rongorongo aika tamaroa ao n riinga te nano ni maungatabu ni kabuta. E a tia n reireiniira arora ni katotonga Iesu Kristo man ana banna ni katoto aika rianako. Ma te koaua te Uea e a tia n anganiira te baeten ni bwaai ni kabane, ao teuana ana baeten ti riai n ukoukoria ni katotonga ara burabeti ae tangiraki.
I kakoaua bwa iai te Atua i karawa are e ataira ao e tangiriira. E a tia n anganiira te burabeti—bwa e na kairiira, n reireiniira, ao ni kairiira ni bong aika kaitira. I kakoaua te Uea bwa e kantaningaia bwa ti na tangira te burabeti, ni kamatoa, ao ni katotonga bannana.
I iangoia bwa te kakabwaia ae korakora ni maiu n te tai are maiu iai Thomas S. Monson bwa ana burabeti te Uea. Ngkai ti katotonga ao ni kataia n riki bwa ngaia, ti na bon karekea te tokanikai n riki bwa ana reirei te Uea Iesu Kristo aika kakaonimaki.