Ni Karokoa Ae Ti A Manga Kaitiboaki
Kunean te Kantaninga inanon Taai aika a na roko
E maeka te tia koro karaki i Washington, USA.
Aang aika titabo are a oro ao ni kakamaku bwa a na konaira n ai aron naba katauraoan taai aika angaraoi ibukin te bitaki ao te rikirake.
N Tebetembwa 12, 2001, kainabau te aine ao ngai ti nakonako iaon ana burooa te onaoraki i Tucson, Arizona, USA, ni kabanei aoa aika a kaingainga n tataninga bungiakin natira te mwaane. Man ara terewitin ao ni kabane terewitin inanon te onaoraki, ti a noorii tamnein te bong are mai imwaaina ni Kawan New York—tamnein taua ake uoua are a tia n riki bwa angka n tamnein karawa n te kaawa anne, a bwaka n riki bwa maange ao ni bubu n tano. Tamneina, a katanoataaki inanon aoa aika bati, a katikuira ma namakinan te bwarannano. E taraa n ae te kabanea ni buakaka n tai ae riki ni uota te ataei nakon te aonaaba—te aonaaba ae taraa n rangi n rotongitong ao ni kakamaaku.
Ni moantain te ingabong are imwiina e a bungiaki natira te mwaane ae uarereke. Ngke I taua natira ae uarereke, I iangoa buakakan bwaai are a riki inanon tabeua te bong n nako, taai akanne are e kaoka au ururing nakon te urarake i Yellowstone National Park inanon 1988. Te ai e a tia n uruaka te buakonikai ae kaania 800,000 te eeka (323,750 ha) n te buakonikai. Uruakan te bwaki (park) e a tara ni bane. Tamnei man te niuti a tii kaota te tano ae mautengetenge ao te bubu ae mateten ae roro i karawa. Akea mwaitin ana kekeiaki te aomata ae kona ni kaoka are e a tia ni bua n te tai ae waekoa. E tara n ae kaokan karikan aroka man ana mwakuri te aonaaba ae e aki totoki e bon aki kona ni kaitara mwaakan te ai n urubwai.
Man te tai anne ni karokoa te tiburing are imwiina e a riki te kakai ae rau—aroka ma uee aika uarereke a moanna ni maiu rinanon te tano ae roro imwiin te bue. Ni karaurau, e a rikirake mwaitin taian uee ao kaai aika rinano ao aika rietata a maiu man te tano. Manga bungian te bwaaki e karaurau ao ni kaonaki ma taraana ae uarereke, ni mimitong, ao imwiin te tai te bwai ae e riki e rangi ni katika te mata.
Inanon taai ni maaku are e taraa n urui arora kanga ai aron uran te ai are i Yellowstone, ngkana ara onimaki ao kantaninga a roko n tokiia, ti riai n uringnga bwa iai teuana ae e aki kakarongoaa, aara ae e aki mwainging ae e mena i aara, e na rangi ni mwakaroiroi nakon korakoran te buakaka are ti na kaitibo ma ngaia. Ereman e kabwarabwaraa bwa aara aio bon “te bwa are ara Tia Kaboomwi, are Kristo, Natin te Atua.” Ngkana ti karaoia bwa angkaan maiura, ngkanne “bwa ngkana te riaboro e kanakoa te ang mairouna ae korakora, eng, ana kanoa ibuakon te ukeuke n anti, eng, ngkana ni kabane te atibu ae bwaka mai karawa ao te angibuaka ae korakora a bwaka iaomi, bon akea korakoraia iaomi ni katiki ngkami nakon marawan te nanokawaki ao te maraia ae aki toki, ibukin te bwa are ko kateaki iaona, are bon aan te kateitei ni koaua, aan te kateitei are ngkana aomata a kateitei iaona ao aki kona ni bwaka” (Ereman 5:12).
Imwiin korakoran ana mwakuri te buakaka ao te kariiri n te aonaaba, ti kona n iangoia bwa ana mwakuri ae uarereke man bebete te euangkerio e aki tau man konaki. Ti kona n namakina te nanououa ao te bwarannano ngkai ti tataninga ma te matebuaka ibukin kairua bwa a na kaetaki, te maraki bwa e na katokaki, ao titiraki bwa a na kaekaaki. Ang akanne ake a oreira, e ngae n anne, katauraoi taai aika angaraoi ibukin te bitaki ao te rikirake, ao mwaakan te euangkerio ae e rangi ni bati e mwakuri n aki kakarongoaa iaan te tano man rikina man te aba, ni katauraoi ngaa koraa aika uarereke ibukin te kantaninga ao te maiu.