Fesili & Tali

E faapefea ona ou “tu i nofoaga paia” pe afai e matua tele ni mea le paia o loo siomiaina au, e pei o le a’oga?

Ina ia saunia i tatou mo taimi faigata, ua poloai mai le Alii ia i tatou ia “tutu i nofoaga paia” (MF&F 45:32; tagai foi MF&F 87:8). Ina ia faia lena mea, e manaomia ona tatou ola agavaa ma maua le Agaga Paia e faatasi ma i tatou. O le a fesoasoani le Agaga ia i tatou e faatoilalo faaosoosoga ma uunaiga le lelei. O nisi nei o auala e valaaulia ai le Agaga i lou olaga:

• Tatalo. Amata lou aso i le tatalo, ma ia tatalo faapitoa i le taimi o le aso lea e te i ai ai i faatosinaga lē paia i le aoga po o se isi lava nofoaga.

• Auai i le seminare ma suesue i tusitusiga paia i aso taitasi. O le suesueina o aoaoga faavae o loo aoao mai i totonu o tusitusiga paia o le a fesoasoani lea ia te oe ia faatumuina i le malamalama ma le upumoni—“malamalama ma le upumoni e lafoai i le toatasi leaga lena” (MF&F 93:37).

• Taumafa i le faamanatuga i vaiaso taitasi. A e faafouina ma le anoa au feagaiga e ola i le talalelei, e te mauaina le folafolaga a le Alii ia maua Lona Agaga e faatasi ma oe.

• Ola i tulaga faatonuina o loo taua i le tusi Mo Le Malosi o le Autalavou. O le a fesoasoani nei tulaga faatonuina ia te oe e tu atu ai mo le paia.

• Ia e latalata i ou matua. O le autalavou e lelei o latou sootaga ma o latou matua e sili atu ona malolosi i tulaga faigata.

O nei fesili o le a faamalosia ai oe faaleagaga. O le a fesoasoani ia te oe pe a e iloaina ua e i ai i se tulaga le paia lea e lemaalofiaina, e pei o le aoga. Ae e sili lava pe afai e mafai ona e aloese mai tulaga le paia i soo se taimi e mafai ai.

Faatumauina se Uiga o le Migao

Ua ou aoao e mafai ona e faia ia nofoaga o siomia ai oe ia paia, ona o tagata e i ai i tatou e sili atu ona taua nai lo nofoaga tatou te i ai. O loo i ai le tele o faaosoosoga i le aoga, ae o le mea e taua moni lava o le maua lea o se uiga o le migao i le Tama Faalelagi ma le tauivi e tauave i ou luga le suafa o Keriso. I lea ala, o le a mafai ai ona e faia lau aoga o se nofoaga paia mo oe ona o le a e manatua ai le Tama Faalelagi ma lo tatou Faaola.

Elder Ojeda, 21 tausaga, Misiona a Colombia Bogotá North

Filifili le Lelei, Aloese mai le Leaga

Ou te taumafai e aloese mai nofoaga i lau aoga lea ou te iloa e masani lava ona faia ai e isi tagata ni mea sese. Ou te filifili foi ma le faaeteete po o ai ma te nonofo faatasi i le vasega po o le taimi o le malologa ona e i ai lava so latou aafiaga i le auala ou te mafaufau ai ma faatino. Ae pe o le a lava lo tatou faaeteete e i ai, tatou te vaaia lava pe faalogoina foi mai lea taimi i lea taimi ni mea le paia. Pe a tupu lea mea ia te au, e vave lava ona ou tepa ese ma usu se viiga i lou mafaufau e faamama ai lou mafaufau. Ma le isi, o le faitauina o tusitusiga paia ma le talanoa atu i uo faagaeetia ua fesoasoani foi ia te au. E le mafai ona tatou filifilia i taimi uma ni o tatou siosiomaga, ae e mafai ona tatou filifili i le auala e tali atu ai ia i latou.

Eliza A., 14 tausaga, Iuta, ISA

Tu Atu mo Lou Faatuatuaga

Fai le nofoaga o siomia oe ia paia. Siomia oe lava i uo e tausisia fautuaga o loo i totonu o le Mo le Malosi o le Autalavou. Faailoa atu i isi ou tulaga faatonuina ma talosagaina i latou e tuu ia talanoaga le talafeagai pe tape ni musika leaga pe a e i ai. Aua nei e fefe e tu atu mo lou faatuatuaga.

Thomas S., 15 tausaga, Georgia, ISA

Ia Malosi ma Lototoa

E tatau ona tatou malolosi ma lotototoa. E tatau ona tatou filifili le mea sao. O nisi taimi e faigata tele, ae afai o le a tatou faia lena mea, o le a tatou fiafia. Pe a talosagaina i tatou e tagata ia inupia pe ulaula ma i latou, e manaomia ona tatou lotototoa ma fai atu leai. E mafai ona tatou faamalamalama atu ia i latou tatou te mananao e filifili le mea sao, o lea tatou te le faia ai na mea.

Anastasia N., 20 tausaga, Ivano-Frankivsk, Iukureini

Saili atu i le Agaga

Tatou te fetaiai ma tagata i le aoga e le tutusa o tatou tulaga faatonuina. Ae, faatasi ai ma le Agaga Paia o loo taialaina lo tatou ala, o le a mafai ona tatou faia ni filifiliga sao ma seti se faataitaiga lelei mo i latou. E taua mo i tatou le “tutu i nofoaga paia” i taimi uma ina ia mafai ai ona lagonaina le alofa o le Tama Faalelagi. O le tasi ala e faia ai lena mea o le saili atu lea i le mafutaga ma le Agaga Paia. Pe a tatou filifili ia i ai i le siosiomaga o le alofa o le Atua, o le a i ai le olioli tele i o tatou loto, i le iloaina o loo fiafia le Tama Faalelagi i a tatou amioga.

Genzen N., 18 tausaga, Zamboanga, Filipaina

Aua Lava Nei Fetuunaia

I ni nai tausaga talu ai, o au o se tasi o ni nai tagata o le Ekalesia i lau vasega. Sa manatu tagata sa ese lava au ona sa ou tuuto atu i le ola ai i tulaga faatonuina uma a le Ekalesia. O le tasi la aso sa tonu ai ia te au e mafai ona ou fetuunaia teisi ou tulaga faatonuina. Ina ua ou faia, sa ou matauina ua gauai tele mai isi ia te au. Ae ina ua mavae ni nai vaiaso, sa ou lagona le tausalaina ma liliu atu ai i le Alii mo le salamo. Sa Ia fesoasoani mai ia te au, ma sa tele ni osigataulaga sa ao ona ou faia, ae sa aoga! Sa ou vaaia moni lava faamanuiaga o le ola ai i le talalelei i le aoga. Sa ou le toe maua nisi o uo ma le toe gauai mai isi, ae sa ou maua le faaaloalo ma le fiafia.

Sutton K., 15 tausaga, Texas, ISA

Mafaufau i le Malumalu

O le nofoaga aupito sili ona paia o loo i ai i le lalolagi o le malumalu. O le mafaufau i ai o le a fesoasoani lea ia te oe e fai le mea sao, e tusa lava po o a tulaga atonu e te oo i ai. E mafai foi ona e tuuina i luga se ata o le malumalu i le mea e mafai ona e vaai atu i ai; o le a fesoasoani lenei mea ia te oe ia lagonaina le toamalie ma maua ai le malosi e aua ai nei faalogo atu i mea le paia o loo tutupu i le aoga.

Angel T., 18 tausaga, Ecuador

Mo nisi fautuaga i le auala e tutu ai i nofoaga paia, e mafai ona e iloiloina nei lauga mai le konafesi aoao o Aperila 2013: Dallin H. Oaks, “Soo o Keriso” ma Robert D. Hales, “Tutu Malolosi i Nofoaga Paia,” o loo maua i le conference.lds.org.

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Lau Lava Filifiliga

Peresitene Siaosi Alapati Samita

“Tatou te filifilia le mea o le a tatou i ai. Ua tuuina mai e le Atua ia te i tatou le faitalia. O le a Ia le aveesea lava mai ia te i tatou, ma afai ou te faia le mea sese ma ou alu ai i le itu a le tiapolo, ou te faia aua ua ia te au le naunautaiga ma le malosi e fai ai. E le mafai ona ou tuua’ia se isi, ma afai foi ou te filifili e tausi poloaiga a le Atua ma ola e pei ona tatau ona ou ola ai ma tumau i le itu a le Alii, ou te faia aua e tatau ona ou faia, ma o le a ou mauaina o’u faamanuiaga i le faia. O le a le o se taunuuga o mea atonu o fai e se isi tagata.”

Peresitene Siaosi Alapati Samita (1870–1951), Aoaoga a Peresitene o le Ekalesia: Siaosi Alapati Samita (2011), 203.

Fesili o le a Sosoo Mai

“E faigaluega lou tina i le aso atoa. E mafai faapefea ona ou faaleleia le ma sootaga?”

Auina mai lau tali ma se atapue sili ona manino, pe a manaomia, a o lei oo i le aso 15 Setema i le liahona.lds.org, po o le imeli i le [e-mail], po o le meli (tagai i le tuatusi i le itulau e 3).

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.