Agai i Luma

Steven Scott Stokes, North Carolina, ISA

A o lumanai ai le faauuina o au mai le kolisi, sa ma mafaufau loloto ai ma lo’u toalua i ni fesili se lua: o afea e tatau ona amata ai ona fai se fanau ma o fea ma te o i ai pe a uma le faauuga. E tele itula sa ma faaaluina e talanoa ai e uiga i nei faafitauli taufaamatau ae ma te lei maua lava ni faaiuga.

I se tasi Aso Sa patino, sa faasolosolo malie ai lava ona oo le ma talanoaga i se finauga, lea na faateteleina i se feeseeseaiga. I lena taimi, na tatagi ai le logo o le faitotoa. Sa faateia i maua i le tutu mai o ma faiaoga o aiga i le faitotoa.

Sa ma valaaulia i laua e susu mai i totonu ma faalogologo atu i le la savali. Sa amata ona talanoa le tasi o ma faiaoga o aiga e uiga ia Mose ma le fanauga a Isaraelu i la latou solaaga mai Aikupito. Ina ua taunuu le fanauga a Isaraelu i le matafaga o le Sami Ulaula, sa le mafai ona latou o, ma ua vave foi ona latalata atu Aikupito. O loo tau mai i tusitusiga paia e faapea sa “matua matatau lava” le fanauga a Isaraelu (Esoto 14:10). Ina ua tatalo Mose mo se taitaiga, na tali mai le Alii, “Se a le mea ua e alaga mai ai ia te au? fai atu i le fanauga a Isaraelu, ia latou o atu pea” (Esoto 14:15).

I le taimi lava na faitauina ai e le ma faiaoga o aiga lena mau, sa mou ese atu lagona o le le fiafia ma le fefe. Sa ma iloaina ma lou toalua o lea sa ma saofafai i auvai o le Sami Ulaula ma tau mafaufau le mea e fai ae ina ia mafai ona “vaaia le faaolataga a le Alii” (Esoto 14:13), e ao ona ma o atu i luma.

I lo ma tulaga, o le o atu i luma o lona uiga o le faia lea o se faaiuga atamai, galulue ma le filiga, ma faalagolago i le Alii. Sa ao ona tuu lo ma fefinauai ma amata ona faatino i le faatuatua. Ina ua ma mulimuli i le taitaiga a le Alii, sa vaeluaina le sami o filifiliga lea sa i o ma luma, ma sa mafai ai ona ma savavali atu ma le saogalemu. Ma te faafetai lava mo faamanuiaga na ma mauaina mai le agai atu i luma i le faatuatua atoa ai ma faiaoga o aiga ia na musuia i ma’ua ia faia le laasaga muamua.