Ua Sosola Ese Alapaka!
Sa lei minoi lava le alapaka mulimuli. O le a se mea na tatau ona ou faia?
“Le Tama Faalelagi, ua ou tatalo atu nei, taitai ma puipui mai au i aso uma” (“Heavenly Father, Now I Pray,” Children’s Songbook, 19).
O le taumafanafana na tea atu nei sa ou faigaluega ai mo lo matou tuaoi. Sa i ai sana lafu alapaka tele e sosoo ma lana togā lama. O alapaka e tai foliga lava i le manu o le lama, ae e laiti ifo.
O lau galuega o le faamama lea o o latou fale i aso uma. Sa ou fiafia i le galuega, e tusa lava pe sa le faigofie.
I se tasi aoauli vevela o le taumafanafana sa ou alu atu ai ae e le o i ai lou tuaoi. E ui i lea, sa le o se faafitauli lena mea. Sa ia tau mai lava ia te au e mafai ona ou faamamaina ia fale o manu i soo se taimi ou te manao ai, e tusa lava pe le o i ai o ia.
A o ou faamamaina, sa taia i lalo e se tasi o alapaka le faitotoa o le pa. I ni nai sekone sa sosola ese uma ai alapaka e 14 ma o atu i le fanua ma le togalaau ‘aina! Sa ou le talitonu i ai! Sa ou matua le fiafia lava. O le a faapefea nei la ona ou toe faafoi maia i latou na o au?
Sa amata ona ou tamoe atu i le saoasaoa ou te mafaia, e tasi’o mai i latou taitasi pe tailua i le taimi. I le sefululima minute mulimuli ane sa matuai tatavale lou fatu mai le tamoe solo, ae sa iu lava ina foi atu i totonu le manu mulimuli i le pa. Oka!
Ona ou faliu atu lea ma vaaia se alapaka e to, o loo taoto mai i lalo o se laau aina e 30 futu le mamao. Oi aue. E toe tasi lea e totoe. Sa ou taumafai e faafefe ina ia alu ai i totonu o le pa, ae sa le minoi. Ona ou taumafai lea e toso mai o ia i se matasele ma se maea na ou mauaina i le faletaavale. E le lelei. Sa ia taoto iina e pei o se faaputuga tele o piliki. Sa ou mapuea i le le fiafia. O le a se isi mea e mafai ona ou faia?
Ona ou manatua lea o loo i ai lava se ala i taimi uma e fesili ai mo se fesoasoani, e tusa lava po o fea o ou i ai. Sa ou tootuli i lalo ma tatalo. I le taimi lava na uma ai lau tatalo, sa ou pupula atu ma na tau le mafai ona talitonuina le mea sa ou vaaia. O loo savali atu le alapaka lava ia e agai atu i le pa manu. Sa ou tatalaina le faitotoa, ma sa ia savali sao i totonu.
Sa ou ataata a o ou tietie atu i lau uila i le fale. Sa ou iloaina na tali mai le Tama Faalelagi i lau tatalo.