O Lau Tatalo Aupito Sili Ona Faamaoni

Jaimee Lynn Chidester, Iuta, ISA

Ina ua ou faatoa ulufale atu i le kolisi, sa i ai sau galuega faavaitaimi i se faleoloa lata ane i se tamai taulaga. Sa ou i ai i le sifi lea e tapunia le faleoloa, lea e manava i le 11 i le po. E ui i le saogalemu o le nuu, ae sa ou popole lava i le tele o taimi pe a ou tapunia le faleoloa na o au.

I se tasi po sa ou lagona patino ai le atuatuvale. Ina ua maea ona ou faamamaina le faleoloa ma ou agai atu loa e tape le masini tupe, sa oo mai i ou luga se lagona o le fefe. Sa lei i ai ia te au se mafuaaga tonu e ala ai ona fefe tele, ae sa le mafai ona ou aveesea lou popole. Sa ou le manao e soona faia se mea i le valaauina o leoleo, ae sa ou manao foi ina ia malupuipuia au pe afai o i ai moni lava se tulaga lamatia.

Mulimuli ane, sa ou tootuli ma tatalo. Sa ou tau atu i le Tama Faalelagi lou fefe ma lē iloa po o le a le mea e fai. O le tatalo aupito sili lea ona faamaoni sa ou faia.

Ina ua ou tu ae i luga, sa vave ona ou iloa atua se taavale ua sosolo mai i le pamu penisini e latalata tele mai i le faleoloa. I lou tei ai ma le maua o se toomaga, o ia o se alii leoleo. A o ia to mai i fafo lana kata tupe e faatumu lana taavale tiute i le penisini, sa vave loa ona amata fai ou tiute mo le tapunia o le faleoloa. Sa ou manao e faaaoga le avanoa lea o lana puipuiga a o i ai ma faia le tele o mea e mafai ona ou faia a o lei alu ese o ia mai le pamu. Ina ua uma ona utu lana penisini, sa fai sana valaau i lana telefoni feaveai ma saofai ai i lana taavale ma talanoa. Sa i ai pea o ia iina i le taimi na ou lokaina ai le fale ma ou oso i totonu o lau taavale. Sa ma taufai o ese uma mai le faleoloa i le taimi lava e tasi.

A o ou agai atu i le fale, sa ou maofa i le vave ona tali mai o lau tatalo. Sa ou faafetai atu ma le lotomaualalo i le Tama Faalelagi mo le faafofoga mai ia te au. Sa aoaoina lava au e faapea o au o se afafine o le Atua, ae o lena po sa ou lagonaina ai le matuai latalata mai o Lona alofa mo au pe matuai moni foi. E le mafai e upu ona faamatalaina le filemu sa ou lagonaina i lou loto. Ou te iloa o le a faamanuiaina au e le Alii pe afai ou te maua le faatuatua ma ole atu mo Lana fesoasoani.