E Le o le Mea Lena Sa Aoaoina ai Au
Irene Taniegra, Filipaina
I se tasi aso i le falefaigaluega, sa tatau ona ou tuua mo ni nai itula e faataunuu ni feau taua mo lou tina. Sa ou alu atu i le ofisa i le taeao ma tau atu i se uo o le a ou le faigaluega i le aoauli. I le taimi o se malologa sa ia musumusu mai ia te au, “E mafai ona ou fesoasoani ia te oe e saini lou taimi.”
“Leai, faafetai,” sa ou fai atu ai.
A o ou tuua le ofisa e pue le pasi, sa tau mulimuli mai lau uo ia te au e agai atu i le uati e saini ai le taimi. Sa ia fai mai lemu, “Aisea e te le saini ai mo le taimi o le aoauli, ona ou oomiina lea o lau kata o le taimi faigaluega pe a ou alu i le fale?”
A o lei mafai ona ou fai atua se upu, sa ia toe faapea mai, “Vaai, o o tatou totogi e maualalo ifo ma le totogi amata, o lea e le afaina ai le fai o lena mea. Ua na o sina tamai tupe lava. Ma le isi, e le na o i ta’ua tagata o loo faia.”
Sa amata ona ou mafaufau i le mea sa ia fai mai ai. Sa lelei nisi o ona manatu, ma sa ou iloa sa lelei foi ona faamoemoega. Ae e le o le mea lenei sa aoaoina ai au i le Ekalesia.
I le tuufaatasia o lo’u malosi atoa ma le naunautaiga, sa ou faapea lemu atu ai ia te ia, “Lau uo e, e lelei le Alii, ma afai Na te faamanuiaina i tatou, e mafai ona tatou mauaina mai ia te Ia ni mea e sili atu i lena aofaiga.”
Sa ia alu ese atu ma sa fai si ona le fiafia ia te au mo le teenaina o lana ofo. A o ou savali atu i le fale faatali pasi, sa ou popole i le laitiiti o lou totogi o le a i ai. Sa ou iloa o le a i ai nisi meaai o le a le mafai ona faatauina i le masina o le a sosoo ai.
A o ou savali pea, sa ou manatuaina upu o se tasi o viiga: “Ma e faamaoni pea; E te maua ai manuia, Mai le Atua le Tama.”1 Sa oo mai foi se fasifuaitau mai se isi viiga i lou mafaufau: “Filifili tau o mea tonu! E te manuia ai e faavavau.”2
O nei laina na faamalosia ai lau faaiuga ia le lolo atu i faaosoosoga ae ia faalagolago i folafolaga a le Alii.
Ua tolu tausaga talu ona mavae atu lena faafitauli, ma o lea ua i ai nei sa’u galuega fou. Ua mautinoa lava le faamanuiaina o au e le Alii. Sa alu ai le taimi, ae o folafolaga o viiga sa faataunuuina moni lava, ma ua mafai ona ou lagonaina o le a faaauau pea ona oo mai faamanuiaga e tele ia te au pe a ou faaauau pea ona ou filifili le mea tonu. Ou te faafetai mo ia viiga, ia na aumaia ia te au le lototele e tumau ai i lena mea tonu i le silafaga a le Atua.