Usiusitai: O Le Elemene Taua o le Faatuatua
Ina tatou taumafai ia e ola i le usiusitai i poloaiga, mulimuli i le taitaiga faalelagi mai auauna filifilia a le Alii ma maua ai faamanuiaga folafolaina mai Lona aao.
O le usiusitai i tulafono ma poloaiga a le Atua e taua ma o le a taua pea mo i latou e saili ia avea ma ē mauaina faamanuiaga folafolaina a le Faaola.
Ia Me i le 1833, na maua ai e le Perofeta o Iosefa Samita se faaaliga lea na folafola mai ai e le Alii:
“O le upu moni o le iloa lea o mea e pei ona i ai, ma e pei ona sa i ai, ma e pei ona o le a oo mai. …
“E leai se tagata na te mauaina le atoatoaga vagana ai ua ia tausi i poloaiga [a le Atua].
“O ia o le e tausia ana poloaiga, e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma” (MF&F 93:24, 27–28; ua faaopoopo le faamamafa).
O le suesue ma usiusitai i upumoni o loo maua i tulafono ma sauniga o le talalelei, tatou te aoao i ai ma mauaina faamanuiaga folafolaina o le talalelei. E tusa ai ma le poto o le Tama Faalelagi ma Lana taimi, ua avanoa ai nei upumoni o loo taialaina ai le Au Paia o Aso e Gata Ai mo fanau uma a le Atua. Aua, e pei ona tautino mai o Ia, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39).
Ua fautua mai lo tatou perofeta pele, o Peresitene Thomas S. Monson: “Usitai i tulafono a le Atua. Ua tuuina mai ia i tatou e se Tama Faalelagi alofa. A usitaia, o le a atili faamalieina ai o tatou olaga, ma faaitiitia ai le lavelave. O le a faigofie atu ona onosaia o tatou luitau ma faafitauli. O le a tatou maua faamanuiaga folafolaina a le Alii. Na Ia saunoa, ‘E manaomia e le Alii le loto ma se mafaufau naunautai; ma o le a aai i latou e naunautai ma usiusitai i le tamaoaiga o le laueleele o Siona i nei aso e gata ai.’”1
E talitutusa lava le saunoaga a Peresitene Monson ma ni upu i se taimi na muamua atu, lea na tautino atu e Nifae i lona tama, “O le a ou alu ma fai mea ua poloaiina e le Alii, aua ua ou iloa e le tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou” (1 Nifae 3:7).
E i ai se viiga a tamaiti e faamanatu mai ai ia i tatou lo tatou tiute ma le taitaiga:
Ou te alu; e fai mea ua poloai mai ai le Alii.
Ou te iloa e saunia e le Alii se ala; e manao o ia ou te usitai.2
A tatou manatua le fautuaga a lo tatou perofeta ina ia tausia ma le faamaoni poloaiga, ma a tatou manatua le tali a Nifae i lona tama, o le a avea i tatou ma tagata faamanuiaina.
O le mulimuli ai i le taitaiga mai le agelu o Moronae, na tau atu ai e le Perofeta o Iosefa i lona tama faalelalolagi mea na faaali atu [ia te ia]. I le iloaina ai e le tama o Iosefa Samita o le a tuuina atu i lona atalii ia papatusi auro, sa ia faapea atu ai “ua mai le Atua, ma fai mai ia te au ou te alu ma fai e pei ona poloaiina ai e le avefeau” (Iosefa Smaita—Talafaasolopito 1:50). Soo se mea lava e le usitai ai i le fautuaga na maua e Iosefa mai le lagi atoa ma le lalolagi sa ono suia ai le ala o le talafaasolopito.
O Afea e Mafai ai Ona Matou Papatiso?
E tatalo o tatou faifeautalai ona ō lea ma fai, i le faatuatuaina o le a le tuuina mai e le Alii se poloaiga ia i latou sei vagana ua Ia saunia se ala e mafai ai ona faamanuiaina i latou e ala i lo latou usiusitai ma le naunautai e auauna atu. Ua latou faatuatuaina Lana folafolaga: “Ma ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e a’u agelu, e sapasapai outou i luga” (MF&F 84:88).
E toatele tagata o e saili ma le naunautai i le upumoni, e mulimuli i aoaoga a a tatou faifeautalai. E tele taimi, o i latou e mananao e faitaulia faatasi ma e talitonu, ua i ai se manao e avea ma e mulimuli ma le usitai i le upumoni. Ua faapena foi ona latou naunau e ō ma faia.
E faapena le tulaga o tagata e 42 sa auai i se konafesi faaleitu i Kananga, Ripapelika Temokarasi i Congo. Na latou o mai ma le naunautai ona sa latou faitau ma faalogo i upumoni o le Toefuataiga, sa amata ona latou ola i mataupu faavae o le talalelei, ma sa latou mananao e avea ma tagata o Le Ekalesia a Iesu Keriso o le Au Paia o Aso e Gata Ai.3
O le usiusitai i uunaiga a le Agaga ma faatasi ai ma le faatuatua i laa taitasi, sa latou savavali ai i aso e ono ina ia mafai ai ona latou auai i le konafesi. O la latou fesili muamua lava i le na pulefaamalumalu ina ua taunuu o le, “O afea e mafai ai ona matou papatiso?”
Sa latou malamalama o le a iu lava ina faia e le Alii ia mafai ona aoaoina i latou e faifeautalai i o latou fale ma aumaia ia i latou le upumoni ua leva ona latou sailia. Pe tusa ma le 200 isi sa le gafatia le malaga e ono-aso, ae sa latou faatalitali mo se upu faapea e le o toe mamao ae saili atu i latou e faifeautalai.
O Se Tatalo o le Faatuatua
I se nuu lata ane o Angola, sa taufaamata’u le fili ina ia taofia le manao o le Au Paia faatuatua ma le usiusitai ia vaai ua mauaa le talalelei i lo latou laueleele. Na auina atu e le Alii Ana auauna e tatala faitotoa mo le galuega faafaifeautalai, peitai i le po o le aso na tuu e malaga ai, e lei maua atu lava o latou visa. Ina ua asiasi atu sui o le Ekalesia i le ofisa o femalagaaiga pe ua tuai i se a, ae sa lei taliaina i latou.
Faatasi ai ma le faatagaga mai le Au Peresitene Sili e faapaia Angola mo le galuega faafaifeautalai, na faatalitali ai Elder D. Todd Christofferson o le Korama a Aposetolo e Toasefululua ma isi i Johannesburg, Aferika i Saute mo se upu. O le taimi foi lea, sa taumafai ai se tagata lotu o Paulina Lassalete da Cunha Gonçalves e tatala le mea sa foliga mai o se faitotoa na tapunia. Sa faamoemoe o ia e maua mai ni tusi o le valaaulia o le a maua ai se faatagaga mo le aumalaga a le Ekalesia e ulufale atu ai i Angola. O le taimi lava e i ai iina, ona mafai loa lea ona maua o latou visa talafeagai.
Sa na o ni nai minute ona tapunia lea o ofisa o le malo i Angola, sa faapotopoto ai Elder Christofferson ma i latou sa faatalitali i ofisa o le Eria a Aferika Sautesasae. Ona latou tootutuli lea e tatalo, sa ia ole atu ai i le Tama Faalelagi ina ia faasalavei mai. I lena lava itula, ina ua faatoa maea lana tatalo o le faatuatua, sa sainia ai tusi o le valaaulia. Sa saunia e se Tama Faalelagi alofa le ala mo le aso o le faapaiaga. I le talosaga a Elder Christofferson, sa tuuina atu ai se tatalo faamaualalo o le faafetai mo le vavega na toina mai.4
Na tatagi mai le manaia ma le le sese o upu o se pese a le Peraimeri:
Tama Faalelagi, pe o e i ai moni ea iina?
Pe e te faafofoga ma tali mai i tatalo?5
Ioe, o loo i ai o Ia iina, ioe foi, Na te tali mai i tatalo a Ana fanau usiusitai.
O le usiusitai o se itu taua lea i perofeta, ma o loo avanoa lenei punavai o le malosiaga faaleagaga mo tagata uma o e mulimuli ma le faatuatua i auauna a le Atua. Na faamamafa mai e Peresitene Monson i le Au Paia le manaomia o le usiusitai i poloaiga, aua “o loo i ai le saogalemu iina; o loo i ai foi le filemu.”6
Ina tatou taumafai ia e ola i le usiusitai i poloaiga, mulimuli i le taitaiga faalelagi mai auauna filifilia a le Alii ma maua ai faamanuiaga folafolaina mai Lona aao.