E Faafofoga ma Tali Mai le Tama Faalelagi i Au Tatalo.

E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.

Pe sa i ai ea ia te oe se faafitauli na e lagonaina ai le popole tele? Sa i ai ia Alema ma ana soa faifeautalai. Sa latou taumafai e aoao atu tagata sa Sorama e uiga ia Iesu Keriso, ae sa le talitonu sa Sorama ia i latou. Na manatu sa Sorama e sili atu i latou nai lo isi tagata. A latou tatalo i le lotu, sa latou o atu i se tulaga maualuga na taua o le Rameutoma ma fai lava le tatalo e tasi i taimi uma.

Sa tonu ia Alema e tatalo atu mo se fesoasoani. Sa ia tau atu i le Tama Faalelagi lona faanoanoa ona o le faamaualuga ma le le talitonu o sa Sorama. Sa ia ole atu i le Tama Faalelagi e faamafanafana o ia ma ana soa ma tuu mai ia i latou le malosi i la latou galuega faigata faafaifeautalai.

Sa tali mai le Tama Faalelagi i le tatalo a Alema. Sa ia faamafanafana ia Alema ma ana soa ma fesoasoani ia i latou ia lagonaina le malosi. (Tagai Alema 31.)

E faafofogaina e le Tama Faalelagi a tatou tatalo i taimi uma, ma e tali mai o Ia ia i tatou i auala eseese. O Ana tali atonu e le vave oo mai po o le auala foi o loo tatou faamoemoe i ai, ae e tali mai lava o Ia i taimi uma ia i tatou ona e alofa o Ia ia i tatou.

O Tatalo o i totonu o Tusitusiga Paia

O lalo ifo o loo i ai nisi o faataitaiga o tagata mai tusitusiga paia na tatalo mo se fesoasoani i ni faafitauli eseese ma maua ai ni tali. Sue ia pusa e tutusa ma koluma taitasi. Faaaoga mau faasino i talaane o ata taitasi e fesoasoani ai ia te oe.

O Ai na Tatalo	Aisea na Ia Tatalo ai	O Le A le Mea na Tupu
Masiofo Eseta (Eseta 4–7)	Sa latou fefefe ina nei suia la latou gagana ona le mafai ai lea ona latou malamalama i le tasi ma le isi.	Sa fetalai atu le Tama Faalelagi ia te ia e fai ni mea faigaluega ma fau ai se vaa.
Nifae (1 Nifae 17:7–17; 18:1–4)	Sa ia fia iloaina po o le fea o lotu e tatau ona ia auai.	Sa faasao lona ola e le tupu, ma sa ia faatauanau ia te ia e laveai lona nuu.
Iosefa Samita (Iosefa Samita—Talafaasolopito 1:10–19)	Sa manaomia ona ia faatauanauina le tupu e puipui lona nuu mai le faaumatiaina, ae sa ono fasiotia ai o ia i lona alu atu i le tupu e aunoa ma le valaauliaina.	Sa alofa mutimutivale le Alii ia i latou ma sa lei suia ai la latou gagana.
O le uso o Iareto ma lona aiga (Eteru 1:33–37)	Sa ia manaomia ona fauina se vaa e ave ai lona aiga i se nuu fou, ae sa ia le iloaina le auala e fausia ai se vaa ma sa leai ni meafaigaluega na ia moomia.	Sa faaali atu le Tama Faalelagi ma Iesu Keriso ia te ia ma tau atu ia te ia e aua nei auai i soo se lotu.