O Upu e Fa e Taiala ai Oe
Mai le saunoaga i se faigalotu a le Iunivesite o Polika Iaga i le aso 16 o Ianuari, 1973.
O le a taialaina oe e le Atua i lou naunautaiga e auauna atu ia te Ia ma tausi Ana poloaiga ao e faalogo, ao e aoao, ao e galue, ma ao e alofa atu.
Sa ou faia ni nai tali mautu ou te fia faasoaina atu ia te outou, ma le faamoemoe o le a outou auai foi i le faia o ia lava filifiliga e tasi. Muamua, O le a ou faalogo. Lona lua, O le a ou aoao. Lona tolu, O le a ou galue. Ma le lona fa, O le a ou alofa. O nei upu e fa e mafai ona fuafua lelei ai lo tatou taunuuga.
Faalogo
Ou te faamoemoe o le a outou faalogo i o outou tina ma faalogo i o outou tama, o i laua taitoatasi e tootuli lava i ona tuli i taeao uma ma afiafi taitasi, ma tatalo mo outou, ma ole atu i lo tatou Tama Faalelagi ia leoleo ia te outou ma ia taiala outou i a outou filifiliga, ma ina ia outou faaeteete foi i a outou amioga. Ou te talitonu pe a tatou faamamaluina o tatou matua ma le mea moni o loo latou popole mo outou ma au, ona tatou ava lea ia i latou, ma maua ai se uiga patino o upu na fetalaia i le Mauga o Sinai: “Ia e ava i lou tama ma lou tina” (Esoto 20:12).
Ou te talitonu o le a tatou faalogo atu i upu a perofeta. Ou te faamoemoe foi o le a tatou faalogo i musumusuga a le Agaga Paia. Ou te folafola atu ia te outou afai tatou te maua se taliga e faalogo i le Agaga Paia, afai o loo i ai se manao mo le amiotonu i totonu o o tatou loto, ma ua atagia mai i a tatou amioga lena manao, o le a taialaina i tatou e lena Agaga Paia.
Ou te faamoemoe o le a tatou faalogo pea mo musumusuga a lena Agaga Paia, lea o le a mafai ai e oe ma au ona maua le avanoa i aso taitasi o le tausaga e tali atu ai i nei uunaiga ma le aafiaga taialaina a lo tatou Tama Faalelagi. O le mea lea, ou te folafola atu ai e faalogo.
Aoao
Lona lua, O le a ou aoao. E le lava le tau ina faalogo pe afai tatou te le aoao. Ua ou faia se tautoga o le a ou aoao atili mai tusitusiga paia ma, faamoemoe, o le a outou maua foi lena avanoa. Pe le ofoofogia ea pe afai tatou te molioo i o tatou loto lena fautuaga mai le Alii, “Ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi” (MF&F 88:118). Ia tatou aoao mai tusi faavae, ae ia tatou aoao foi mai olaga o taitai o le Ekalesia ma olaga o i latou e sili ona latalata mai ia i tatou.
Mo se faataitaiga, ou te talitonu e mafai ona ou aoaoina le onosai e ala i le suesueina atili o le soifuaga o lo tatou Alii ma le Faaola. E mafai ona e vaai faalemafaufau i le le fiafia atonu na Ia lagonaina, i le silafiaina na ia te Ia ki i le ola e faavavau, i le silafiaina na ia te Ia le ala mo oe ma au e mafai ona ulufale atu ai i le malo selesitila o le Atua, a o Ia avatua Lana talalelei i na tagata i le taulotoaiga o taimi ma vaaia lo latou teenaina o Ia ma le teenaina o Lana savali? Ae sa ia faaalia lava le onosai. Sa Ia taliaina Lona tiutetauave i le olaga, e oo lava i le satauro, ma le Faatoaga o Ketesemane lea na muamua ai. Ou te faamoemoe e aoao le onosai mai le Alii.
Ou te uunaia outou e aufaatasi ma au i se tautoga, O le a ou aoao.
Galue
Ona sosoo lea ma le lona tolu, O le a ou galue. E le lava le tau ina moomoo, e le lava le tau ina moemiti, e le lava le tau ina folafola. E tatau ona tatou faia. Sa fetalai mai le Alii, “O ia o le e sasau atu lana selesaito ma lona malosi … ua na faaputu ma teu ina ia le fano o ia” (MF&F 4:4; faaopoopo le faamamafa). Ma na tautino mai e Nifae, “O le a ou alu ma fai mea ua poloaiina e le Alii” (1 Nifae 3:7). O Iakopo na aoteleina le lesona lenei: “Ia fai outou ma e anaana i le upu, ae aua le na ona faalogologo i ai, o faaseseina ai outou e outou” (Iakopo 1:22).
I se tasi o taumafanafana i ni tausaga ua mavae, mo se faataitaiga, sa leai ni au mea na faia i le faaiuga o se vaiaso. Ae sa uunaia au e le Agaga e faataunuu se tiutetauave. Sa ou malaga i se vaalele mo Kalefonia. A o ou nofo i lalo, sa avanoa le nofoa na i ou talaane. Peitai, sa mulimuli ane nofo ai i le nofoa se tamaitai talavou sili ona lalelei. Sa ou matauina sa ia faitauina se tusi. E pei lava ona faia e tagata, sa ou autilo atu i le autu. O se tusi a se uso o le Korama a Aposetolo e Toasefululua. Sa ou fai atu ia te ia, “Oi, ai o oe o se Mamona.”
Sa ia tali mai, “Oi, e leai. Aisea ua e fesili ai?”
Sa ou tali atu:“Ia, o loo e faitauina se tusi na tusia e se tagata lauiloa o Le Ekalesia a Iesu Keriso o le Au Paia o Aso e Gata Ai.”
Sa ia fai mai, “Oi, e sa’o? Sa aumai e se uo ia te au, ae e le tele so’u iloa i ai. Peitai, ua faaosofia ai lou fia iloa.”
Ona ou tau mafaufau lea. Pe tatau ea ona ou tuusao atu ma tau atu nisi mea e uiga i le Ekalesia? Ma na oo mai upu a Peteru: “Ia saunia pea” (1 Peteru 3:15). Ma na tonu loa ia te au o le taimi lea e tatau ona tuu atu ai lau molimau. O lou avanoa lea e tali ai ana fesili e faatatau i le Ekalesia—o fesili atamai ia na o mai i se loto sa sailia le upumoni. Sa ou fesili i ai pe mafai ona ou maua le avanoa e tuu atu ai i faifeautalai e valaau atu ia te ia. Sa ou fesili i ai pe fia auai o ia i le tatou paranesi a le au matutua nofofua i San Francisco. Sa mautu ana tali. Ina ua ou foi atu i le fale, sa ou tusi atu i le peresitene o le siteki ma pasi atu ia te ia lea faamatalaga. E mafai ona e mafaufauina lo’u fiafia tele ina ua ou maua mulimuli ane se valaau mai le peresitene o le siteki, lea na ia fai mai ai ua avea nei lea tamaitai ma tagata aupito fou o le Ekalesia. Sa tumu au i le fiafia.
Sa ou iloaina e i ai so’u tiutetauave e galue.
Alofa
Ia ma lena tautoga mulimuli: O le a ou alofa. E te manatuaina le tali lea na tuu atu e le Faaola i le loia na fesili, “Matai e, o le fea poloaiga e sili i le tulafono?”
Ma na ia tali atu, “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i lē lua te tuaoi, ia pei o oe lava ia te oe” (Mataio 22:36–39).
Sa tusia e le tusitala Peretania o William Shakespeare faapea, “O i latou e le faaalia lo latou alolofa, e le alolofa moni lava.”1 E mafai faapefea e oe ma au ona faaalia lo tatou alolofa mo le Atua ma le alofa mo o tatou uso a tagata? E ala i le usiusitai i poloaiga a le Atua ma fautuaga a Ana auauna. Ua tatou maua le avanoa e usiusitai ai i le tulafono o le sefuluai, e usiusitai ai i le tulafono o le ola mama, e usiusitai ai i vaega taitasi o o tatou olaga i le afioga a lo tatou Tama Faalelagi.
E mafai ona talisapaia e lo tatou Tama Faalelagi lo tatou alolofa mo Ia e ala i le lelei o lo tatou auauna atu ia te Ia ma le lelei o lo tatou auauna atu i o tatou uso a tagata.
O Le Filifiliga E Ā Oe
Tautoga e fa: O le a ou faalogo, o le a ou aoao, o le a ou galue, o le a ou alofa. A tatou faataunuuina nei tautoga, e mafai ona tatou mauaina le taitaiga a lo tatou Tama Faalelagi ma lagonaina ai le olioli moni i o tatou lava olaga.
O le filifiliga e a oe, ma o le filifiliga foi e a au lea, ia manatua o a tatou filifiliga, o a tatou faaiuga, e iloa ai lo tatou taunuuga. O le a taialaina oe e le Atua i lou naunautaiga e auauna atu ia te Ia ma tausi Ana poloaiga ao e faalogo, ao e aoao, ao e galue, ma ao e alofa.