Filifili e Aua le Faitatala
O le tusitala e nofo i Uosigitone, ISA.
I lou tausaga lona lua i le aoga maualuga, sa ou volenitia ai e avea o se tasi o le vaega faatekinolosi e tuufaatasia le polokalama faamusika faaletausaga a la matou aoga maualuga. O lea aafiaga sa avea ma se tasi o mea ou te manatuaina e sili ona ou fiafia i ai o le tausaga, ona sa faafiafiaina ma na ou aoao ai le tele o mea a o faatinoina. Sa ou fiafia foi e galulue faatasi ma tagata na ou feiloai i ai.
Ae o le mea aupito sili ona taua na ou aoaoina sa le o se mea na ou faamoemoeina.
Ina ia mafai ona fesootai ma le filemu le vaega faatekinolosi i le tasi ma le isi, matou te faaaogaina mea faalogo faauaealesi. Sa matou faaaogaina foi e faamatala ai tala malie, fai ai talanoaga, pe pese atu ai le tasi i le isi e faafiafia ai i matou lava i le taimi umi o faataitaiga.
Ae o le taimi muamua lava na matou faaaogaina ai mea faalogo sa lei lelei tele mo au. I le taimi muamua sa matuai ou fiafia lava i ai. Ona amata lea e nisi tagata ona faitatala e uiga i tagata autu o loo faia faataitaiga i luga o le tulaga. Sa ou taumafai ia le amanaiaina ia faamatalaga faatiga ma tala le migao, ae a o faateteleina ia talanoaga, sa faasolo ina leaga tele le faitatala ma sili atu ona faatiga.
Sa ou lagona le inoino i le faalogo atu i nisi o faamatalaga, ae sa ou fefe e tu atu faasaga i au uo fou. Sa ou momoo maimau pe ana ou fai atu se tala, ona a o ou faalogo i a latou tala malie, sa faaosoosoina lava au e ata ma fai atu foi ni au faamatalaga. Sa amata ona ou feetuuna’ia le mafuaaga o le a lelei ai. E leai se tasi ae na o le vaega faatekinolosi e ono lagonaina mai au, ma sa ou manao ia au faatasi ma tagata o loo siomia au.
I lona faigata sa i ai, sa ou iloaina o le fai o tala lē lelei o i latou i luga o le tulaga sa le sa’o, ma na ou filifili ia le faitala.
Ina ua uma le faataitaiga na matou iloa ai o tala uma na matou tautatala ai i luga o mea faalogo na faasalalauina i tua atu o le tulaga. Sa faalogo uma lava le 60 pe a o tagata o le tala ia i matou o talanoa. Sa feitai nisi, le fiafia, pe maasiasi foi. E leai ma se tasi na fiafia.
Mulimuli ane, a o ma talanoa ma se tasi o au uo i le mea na tupu, sa ia fai mai, “Ua iloa uma e tagata e te lei tautala lava i se mea faapena.” Sa faateia au i lana faamatalaga, ma ou iloa ai le taua o le filifiliga na ou faia. Ana faapea ou te filifili e auai i le au faitatala, o le a se mea o le a faamatalaina ai au e lena mea? O le a se mea o le a faamatalaina ai le Ekalesia e lena mea?
Ou te faafetai mo le filifiliga na ou faia i lena tamai fale faafiafia pogisa, e oo lava i taimi sa ou mafaufau ai e le iloaina e isi, ona ua tatalaina ai faamanuiaga o faigauo, filemu, ma le talitonuga semanu ou te maimaua pe ana ou filifili e faitala.