ʻOtu Lea ki he ʻOtu Lea
1 Kolinitō 15:20–22
ʻOku fakahā mai ʻe he ʻAposetolo ko Paulá ʻi he ngaahi veesi ko ʻení, ʻoku ʻuhinga ʻa e Toetuʻu ʻa Kalaisí, kuo pau ke toe tuʻu ʻa e kakai kotoa pē.
ʻOkú Ne Moʻui, tā fakatātaaʻi ʻe Simon Dewey
20 Ka ko ʻeni , kuo toe tuʻu ʻa Kalaisi mei he pekiá, pea kuo hoko ia ko e ʻuluaki fua ʻo kinautolu kotoa pē naʻe mohé.
21 He ko e meʻa ʻi he tangatá naʻe hoko ai ʻa e maté, pea ʻe hoko ʻi he tangatá foki ʻa e toetuʻu ʻa e maté.
22 He hangē ʻoku mate kotoa pē ʻia ʻĀtamá, ʻe pehē foki ʻe moʻui kotoa pē ʻia Kalaisi.
Ko ʻEni kuo Toe Tuʻu ʻa Kalaisi mei he Pekiá
ʻOku ʻikai mo ha lea ʻi he maama faka-Kalisitiané ʻe mahuʻingamālie ange kiate au ʻi he ngaahi lea naʻe fai ʻe he ʻāngeló kia Mele Makitaline ʻi heʻene tangí mo e Mele ʻe tahá ʻi heʻena ō atu ki he fonualotó ke teuteuʻi ʻa e sino ʻo hona ʻEikí: “Ko e hā ʻoku mou kumi ai ʻa e moʻuí ʻi he potu ʻo e maté? ʻOku ʻikai ʻi heni ia, ka kuo tuʻu hake” (Luke 24:5–6).
“ʻI he talaki ko ʻení, kuo fakahaofi ai ʻa kinautolu kuo nau moʻui pea maté, ʻa kinautolu ʻoku lolotonga moʻui pea ʻe ʻi ai e ʻaho te nau mate ai, mo kinautolu kuo teʻeki ai fāʻeleʻi pea teʻeki ke maté.
“Te tau toe tuʻu kotoa pē koeʻuhí ko hono ikunaʻi ʻe Kalaisi ʻa faʻitoká. Ko hono huhuʻi ʻeni ʻo e laumālié.”
Palesiteni Thomas S. Monson, “ʻOku ʻIkai ʻi Heni Ia, ka Kuo Toe Tuʻu,” Liahona, ʻEpe. 2011, 4.
Ngaahi ʻUluaki Fua ʻo Kinautolu Naʻe Mohé
Ngaahi ʻUluaki Fuá—ko e ngaahi fuá, vesitapolo, mo e keleni ʻoku motuʻa vave taha ki hono tolí, taʻakí, pe tuʻusí.
Fakatatau ki he fono ʻa Mōsesé, naʻe ʻoatu ʻa e ngaahi ʻuluaki fuá ko ha feilaulau ki heʻEikí ke fakahā ʻa e fakafetaʻi mo e mateaki. Ko ia, koeʻuhi ʻoku hoko ʻa e ngaahi ʻuluaki fuá ko ha fakaʻilonga ia kuo kamata ʻa e utu taʻú pea ʻoku ʻi ai mo ha ngaahi ngoue kehe ʻe hoko mai, ko e meʻa leva ʻoku fakahā mai ʻe he ʻAposetolo ko Paulá, ko Sīsū Kalaisi ʻa e ʻuluaki fua mei he kau pekiá (“ʻo kinautolu naʻe mohé”) te nau toe tuʻu hake pea ʻoku ʻi ai mo e tokolahi kehe te nau toe tuʻu mo kinautolu foki.
Hangē ʻOku Mate Kotoa Pē ʻIa ʻĂtamá
Koeʻuhi ko e hinga ʻa ʻĀtama mo ʻIví, kuo pau ke hoko ki he faʻahinga kotoa ʻo e tangatá ʻa e mate fakasinó (vakai, 2 Nīfai 9:6; Mōsese 6:48).
ʻE Moʻui Kotoa pē ʻIa Kalaisi
“ʻOku ou fifili pe ʻoku tau fakahoungaʻi kakato nai hono fuʻu mahuʻinga lahi ʻo ʻetau tui ki ha toetuʻu moʻoni ʻe tōfuhia ai ʻa e māmani kotoa. ʻOku mahuʻinga ʻa e talaʻofa ʻo e moʻui taʻe-faʻa-maté, ki heʻetau tuí. Naʻe fakahā ʻe he Palōfita ko Siosefa Sāmitá ʻo pehē: …
“ʻI heʻetau fononga taʻengatá ʻoku hoko ai ʻa e toetuʻú ko ha fakaʻilonga ʻi hotau halá, ʻa ia ʻoku fakamahinoʻi mai ai hono ngataʻanga ʻo e moʻui fakamatelié pea mo hono kamataʻanga ʻo e moʻui taʻe-faʻa-maté. … ʻOku tau toe ʻiloʻi foki mei he fakahā ʻo onopōní, kapau ʻeʻikai toe fakatahaʻi hotau laumālié mo hotau sinó ʻi he toetuʻú, ʻe ʻikai te tau lava ʻo maʻu hono “kakato ʻo e fiefiá.” (T&F 93:33–34).”
ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Toetuʻú,” Liahona, Siulai 2000, 17–18