Toʻu Tupú
Ko e Efiafi Haohaoa Kimuʻa ʻi he Kilisimasí
Ko e taha ʻo e ngaahi meʻa mahuʻinga taha ʻo e taʻu kotoa pē ʻi heʻeku tupu haké, ʻa e ʻAho kimuʻa ʻi he Kilisimasí. Naʻá ku taʻo mo hoku fāmilí ha pisa, pea mau ʻalu ʻo hiva Kilisimasi takai he ngaahi ʻapí, hili ia pea mau foki mai ʻo fai haʻamau fakataha lotu faka-Kilisimasi. Naʻá mau hivaʻi faʻahi fā ʻa ia ne ongo kehe atu pē mo tā leʻo lahi ha ngaahi hiva Kilisimasi ʻaki ʻemau ngaahi meʻaleá. Naʻe fakaʻosi maʻu pē ʻe heʻeku tamaí ʻa e efiafi ko iá ʻaki ha kiʻi poupou fakalaumālie faka-Kilisimasi, pea naʻe faʻa tō maʻu ai pē homau loʻimatá ʻi he fiefia. Naʻe ʻikai ha taimi lelei ange ʻi he moʻuí ka ko e Efiafi kimuʻa ʻi he Kilisimasí.
Naʻe kamata tokangaʻi ʻe heʻeku faʻeé ʻa Keli, ʻi heʻeku lahilahi haké, ko ha kiʻi taʻahine ʻeni ʻa homau kaungāʻapí. Naʻe haʻu ʻa Keli ki homau ʻapí ʻi he ʻaho kotoa pē ʻi he tuku ʻa e akó lolotonga ʻa e ngāue ʻa ʻene faʻē ko Petí. Naʻe muimui holo ʻa Keli ʻiate au he taimi kotoa pē ʻo hangē ha kiʻi kulií—ʻo longoaʻa mo fie maʻu maʻu pē ha meʻa. Ko e meʻa fakafiemālie maʻu pē ʻa e taimi naʻe haʻu ai ʻa Peti ʻo ʻave ʻene taʻahiné pea nonga ai homau ʻapí mo e fāmilí.
Naʻá ku ʻohovale lahi ʻi hono fakaafeʻi ʻe heʻeku faʻeé ʻa Peti mo Keli ʻi Tīsema ke na ō mai ki homau ʻapí ʻi he Efiafi kimuʻa ʻi he Kilisimasí. ʻA hoku Efiafi kimuʻa ʻi he Kilisimasí. Naʻe malimali ʻeku faʻeé mo fakapapauʻi mai kiate au, “ʻE ʻikai liliu ai ha meʻa ia ʻe taha.” Ka naʻá ku ʻiloʻi ʻe au ʻa e meʻa ʻe hokó. Te na kai ʻemau pisá kotoa. ʻE manukiʻi ʻe Keli ʻemau hivá. Ko ia naʻá ku nofo ai ʻo ʻamanaki atu ki he Efiafi kovi taha kimuʻa ʻi he Kilisimasí.
Naʻe aʻu ki he efiafi ko iá, pea haʻu ʻa Peti mo Keli ki homau fāmilí, pea mau talanoa mo kakata mo hiva fakataha. Naʻe moʻoni pē ʻeku faʻeé. Naʻe haohaoa moʻoni ia. Naʻe aʻu ki he tuʻuapoó, peá na fakamālō mai kiate kimautolu, peá na ʻalu taʻe-fie-ʻalu atu mei homau ʻapí. Naʻá ku ʻalu ʻo mohe ʻi he pō ko iá ʻoku fonu hoku lotó ʻi he fiefia. Naʻá ku ʻiloʻi ai ʻoku ʻikai fakasiʻisiʻiʻi ʻa e ngaahi meʻaʻofa Kilisimasi mahuʻinga moʻoni tahá ʻi he taimi ʻoku vahevahe atu ai iá. Ka ʻoku toe lelei ange mo tupulekina lahi ange ia ʻi he taimi ʻoku tau foaki atu aí.