Naʻa Mou Hiva mei Homou Lotó
Tefinī ʻAnalia Lomelo ti Tau, Misionesi, ʻĀsenitina
Naʻe teuteu ʻemau kuaea fakasiteikí ʻi Tīsema ʻo e 2000 ke tokangaʻi ha fakaʻaliʻali hiva ʻe fai. Naʻe ʻi ai ha ngaahi kuaea ʻiloa ʻi he kolo ko Posatasi, ʻi ʻĀsenitiná, naʻa nau ʻosi fakapapauʻi te nau kau mai ki ai, pea ʻe tokolahi mo e kakai te nau haʻu ki aí. Naʻa mau ʻamanaki te mau fakahā ʻemau fakamoʻoni ki he ʻaloʻi ʻo e Fakamoʻuí ʻi heʻemau hivá.
Naʻá ku ongoʻi ʻoku hohaʻa hoku lotó he ko e talēkita au ʻo e kuaeá. Naʻe ʻāsinga ʻeku hohaʻá he ko hoku māhina valu ʻeni pea ko e māhanga. Naʻá ku ongoʻi ʻa e langa ʻi heʻemau ako hiva fakaʻosí ʻi ha uike ʻe taha kimuʻa pea fai ʻa e konisetí, ko ia naʻá ku tangutu pē ʻo tā hiva mei ai.
Naʻe ʻikai te u toe lava ʻo tuʻu ʻi he taimi naʻe ʻosi ai ʻa e ako hivá. Naʻe faingāue mai leva hoku husepāniti ko Kālosí pea mo ʻeku tamaí kiate au. Naʻe leleakiʻi leva au ʻe Kālosi ki he fale mahakí, pea naʻe tala mai ai ʻe he kau toketaá te u fāʻele ʻi he ʻaho ko iá. Naʻá ku manavahē, ka naʻe talamai ʻe Kālosi ke u falala pē ki he ʻEikí.
Naʻe ʻikai fuoloa kuo ongona ʻi he lokí kotoa ʻa e tangi ʻa ha pēpē toki fāʻeleʻi, ka naʻe ʻunuʻunu mai ʻa e toketaá ʻo ne pehē mai, “Ko Keila ʻena ʻoku tangí, ka naʻe siʻi mālōlō ʻa ʻEpeleli.”
ʻOku ʻikai te u maʻu ha lea feʻunga ke fakamatalaʻi ʻaki ʻa e ngaahi ongo naʻe haʻu kiate aú. Naʻe ʻikai fuoloa kuo hiki au ki ha loki ʻe taha, ʻa ia naʻe talitali mei ai hoku husepānití kiate au. Naʻá ma feʻiloaki peá ma tangi.
Naʻe pehē mai ʻe Kālosi, “ʻE Tefinī, ʻoku ʻikai te ta ʻiloʻi ʻa e ngaahi taumuʻa ʻa e ʻEikí ki Heʻene ʻave ʻa ʻEpeleli kiate Iá. Ka kuo pau ke ta lotomālohi pē, mo tali Hono finangaló, pea ta laka atu kimuʻa ʻi he tui.”
Naʻe ʻikai fuoloa mei ai, ne hapahapai ʻe Kālosi ʻa e kiʻi sino ʻo Keilá ʻo tāpuakiʻi ia ke ne moʻui. Naʻá ne moʻui, ka naʻe tuku ia ʻi fale mahaki ʻi he ʻaho ʻe 10 naʻe hokó koeʻuhi ko ha ngaahi palopalema.
Naʻe fakaʻatā au ʻi he uike naʻe hokó. Ka naʻe ʻikai te u toe fakakaukau ki he kuaeá, koeʻuhi ko ʻeku toutou ʻalu ki he fale mahakí ʻo vakai mo fafanga ʻa Keilá. Naʻe fehuʻi mai ʻe heʻeku tamaí ʻi he pō kimuʻa pea fai ʻa e fakaʻaliʻali hivá pe kuó u fakakaukau ke u tataki ʻa e kuaeá pe ʻikai. Naʻá ne pehē mai, “ʻE Tefinī, lotu ʻo kau ki ai, pea neongo pe ko e hā haʻo fakakaukau ʻe faí, ʻe tonu pē ia.”
Naʻá ku fakakaukau kia Keila, ʻa ia ʻoku kei tokoto ʻi he falemahakí. Naʻá ku fakakaukau ki he kau mēmipa ʻo e kuaeá, ʻa ia naʻa nau ngāue mālohi ke teuteu ki he konisetí. Naʻá ku fakakaukau ki he Fakamoʻuí mo Hono ʻaloʻí, mo ʻEne moʻuí, mo e feilaulaú. Naʻá ku ʻiloʻi ai ʻa e meʻa ʻoku fie maʻu ke u faí.
Naʻe ongo moʻoni ki homau lotó ʻa e ngaahi ʻofa naʻe fakahā mai ki homau fāmilí ʻi he efiafi hono hokó, mei he kau mēmipa ʻo e kuaeá, pea naʻe hanga ʻe he laumālie ʻo e faaitaha naʻa nau maʻú ʻo fokotuʻu ʻi homau lotó ha holi moʻoni ke mau ueʻi hake ʻa e loto ʻo kinautolu kotoa pē te nau haʻu ki he konisetí.
Naʻe pau ke hiva fakamuimui ʻa ʻemau kuaea fakasiteikí koeʻuhi he ko kimautolu naʻa mau talitali ʻa e ngaahi kuaeá. Naʻe tafe noa pē hoku loʻimatá ʻi he tā ʻe he pianó mo e vaioliní ʻa e talateu ki he “Hiva ʻa e Kau ʻĀngeló.” Naʻe lōmekina hoku lotó kotoa ʻi he hiva fakatahaʻa e kuaeá mo e meʻaleá, peá u ongoʻi ʻoku ou ʻi ha feituʻu fakaʻofoʻofa moʻoni.
Naʻá ku tafoki ʻi he ʻosi ʻemau hivá, ʻo u vakai atu naʻe tō ʻa e loʻimata ʻo e tokolahi ʻo e kau fanongó. Mahalo naʻe ongoʻi ʻe he kakai ko ia kuo teʻeki ai ke nau fanongo ki he pōpoaki ʻo e melino mo e ʻofa ʻa e ongoongoleleí, naʻa nau fanongo ʻi heʻemau hivá ʻa hono fakaʻofoʻofa mo hono fakaofo ʻo e ʻaloʻi mai e ʻAlo ʻo e ʻOtuá.
Naʻe pehē mai kiate kimautolu kimui ʻe he talēkita ʻo ha taha ʻo e ngaahi kuaeá, “Naʻe lelei ʻemau foungá, ka naʻa mou hiva mei homou lotó.”
Naʻa ku fakafetaʻi mo hoku husepānití ʻi he Efiafi kimuʻa ʻi he Kilisimasí koeʻuhi ko ʻEne fekauʻi mai ʻa Keila ki homau ʻapí, pea mo hono fekauʻi mai Hono ʻAló ki he māmaní. Koeʻuhí ko e Fakalelei ʻa e ʻAló pea mo ʻemau sila ʻi he temipalé, ʻoku ma ʻiloʻi ʻe toe hoko ʻa ʻEpeleli ko homa ʻofefine.