Te Mau Lava Fēfē ʻo Fafanga ha Fuʻu Tokolahi Pehē?
Maʻata Fenanitesi Lepolo, Sipeini
Naʻá ku ongoʻi lōmekina ʻaupito ʻi heʻeku hoko ko e palesiteni Fineʻofá, koeʻuhi ko e ngaahi fie maʻú mo e ngaahi faingataʻa ʻoku fehangahangai mo ha ngaahi fāmili ʻe niʻihi ʻi homau koló. Naʻe faingataʻa ʻaupito ʻa e tuʻunga fakaʻekonōmiká, pea naʻe mole e ngāue ʻa e tokolahi ʻo e kāingalotú.
Naʻe hā mahino mai ʻa e lotofoʻí, lotomamahí, mo e mole ʻa e ʻamanakí mei he fofonga ʻo e tokolahi ʻi tuʻa ʻi he Siasí ʻa ia ʻoku nau faingataʻaʻia ʻi hono tauhi honau ngaahi fāmilí. Naʻe aʻu foki ki he fānaú mo e toʻu tupú, ʻene hā meiate kinautolu ʻa e ongoʻi veiveiuá mo e moveuveú.
Naʻe ongoʻi ʻe he kau taki ʻo e koló ʻa e fie maʻu ke fakahā atu ʻa e ʻamanaki lelei mo e ʻofa ki he kakai ʻoku faingataʻaʻia tahá—ha faʻahinga meʻa te ne tokoniʻi ʻa e kakai ʻi homau tukuikoló ke nau ongoʻi ʻoku ʻi ai ha Tamai Hēvani ʻofa ʻokú Ne ʻafioʻi honau ngaahi faingataʻaʻiá pea ʻokú Ne tokangaʻi kinautolu.
Naʻa mau fokotuʻu ai ʻi he ofi ki he Kilisimasí, ke mau fakaafeʻi ʻa e fānau masiva taha ʻi homau tukuikoló ki ha kai efiafi. ʻE fai ʻe he kāingalotu ʻo e koló ha ngaahi feinga paʻanga, pea fakatau mai ʻa e meʻakaí mei he ngaahi fale kaí, pea teuteuʻi mo homau fale lotú ke tali ʻemau kau fakaafé. Naʻe tokoni ki ai ʻa e kāingalotu kotoa pē, kau ai mo e fānau Palaimelí, kau finemuí, mo e kau talavoú.
Naʻa mau aleaʻi ha fale kai ʻe taha ke ne teuteu mai ʻa e meʻakaí, pea mau fetuʻutaki ki he kau ngāue fakasōsiale ki he kakaí ke nau kumi mai ʻa e ngaahi fāmili ʻoku lahi taha ʻenau fie maʻú. Naʻe ʻomi ʻe he kau ngāue ko ʻení ha lisi ʻo e fānau ʻe toko 100, ʻa ia naʻe tokolahi ia ʻi he fika naʻa mau ʻamanaki ki aí. Naʻe ʻikai te mau foʻi ai, ka naʻe taʻeʻamanekina pe ʻe lava ʻo maʻu ha paʻanga feʻunga ke fakatau mai ʻa e meʻakai ki ha fānau tokolahi pehē.
Naʻe aʻu ki he ʻaho ke fai ai ʻemau kaimeʻakaí, naʻe ʻalu atu ai ʻa e palesiteni fakakoló mo ha kau tīkoni ʻe niʻihi, ʻo ʻave ʻa e paʻanga naʻa mau tānakí ki he fale kaí, mo tālafili pē pe ʻe fēfē haʻamau fafangaʻi ha fānau tokolahi pehē ʻaki ʻemau kiʻi paʻanga naʻe maʻú. Naʻa nau lotu pē ʻi heʻenau fonongá, mo nau pehē pe ʻoku totonu pe ā ke fakaafeʻi mai ʻa e fānau iiki tahá, pea vaeua ʻa e ngaahi peleti meʻakai kotoa pē, pe kaniseli fakakātoa ʻa e ʻekitivitií.
Naʻe hili atu ʻe he palesiteni fakakoló ʻa e paʻangá ʻi he funga kānitá ʻi heʻenau aʻu atu ki he fale kaí. Ko e taimi ia naʻe tali ai ʻenau ngaahi lotú.
Naʻe sio mai ʻa e pule ʻo e fale kaí kiate kinautolu, peá ne malimali, mo talaange, ʻe fiefia ʻa e fale kaí ke nau tokoni mai ʻi hano lahi pē ʻo e meʻakai ʻe fie maʻú—taʻetotongi! ʻOku ʻikai te u lava ʻo fakamatala ki he fiefia naʻa mau maʻu ʻi heʻemau fanongo ki he foaki lotoʻofa ko iá, pea naʻe tupu ai haʻamau ʻomi ha tala fakafiefia—mo ha meʻakai lahi—ke fafanga ʻaki ha fānau masiva tokolahi.
ʻOku mau fakamālō ki he fale kaí koeʻuhi ko ʻenau foaki ʻofá, ʻa ia ne mau lava ai ʻo fakaʻaongaʻi ʻa e paʻanga naʻa mau tānakí ke fakatau ʻaki ha meʻakai ʻo faʻo ki ha ngaahi kato meʻakai ʻo foaki maʻá e ngaahi fāmili faingataʻaʻia tahá.
Naʻa mau ako mei he meʻa ko ʻení, ʻoku ʻikai taʻeʻaonga ha ngāue ʻo kapau ʻoku tau fakaʻaongaʻi lelei hotau ngaahi talēnití mo e ngaahi holi leleí ke tokoni ki hotau kāingá. Naʻe fakamālohia ai ʻemau fakamoʻoni ʻoku fakaava mai ʻe he ʻEikí ʻa e ngaahi matapā hili ʻetau fai ʻa e meʻa kotoa pē te tau lava ʻo faí.