Wanem Nao I Kam afta long Seminari?
Seminari graduesen i no en blong ol stadi blong yu long saed blong relijin. Wan gudfala samting moa blong yu i stap.
Long seminari, yu stadi long ol skripja mo ating yu stap mit oltaem wetem ol narafalawan we oli gat sem yia olsem yu. Yu filim se yu welkam, mo yu save filim Spirit. Mekem se, taem yu finisim seminari, yu ting se ol eksperiens ia oli finis? No, nogat nao.
Program blong Jos blong institiut i nekis step, mo bae yu laekem. Sapos yu go long hae skul o no, yu save gohed blong lanem abaot gospel, rere blong go long wan misin mo mared long tempol, mo serem ol eksperiens wetem ol narafala we oli gat sem yia olsem yu.
Hemia sam ansa long sam besik kwestin abaot institiut. Yu save faenem moa long institute.lds.org.
Wanem nao hem i institiut?
Insaed long institiut i gat ol gospel stadi klas. I gat ol klas long saed blong ol skripja, ol tijing blong ol profet, mo klas blong rere blong go long wan misin mo klas blong rere blong go mared long tempol. Long sam klas blong institiut, yu save jusum fulap klas blong go long hem.
Huia i save go?
Oli leftemap tingting blong evri yang singgel adalt blong go long institiut klas. Eniwan—we i mared o singgel—bitwin 18 yia mo 30 i save go long klas ia.
Weaples mi save faenem institiut?
Sam eria oli gat ol bilding blong institiut kolosap long skul mo yunivesiti. Long ol nara ples, oli stap holem ol klas long ol bilding blong Jos mo ol narafala ples bakegen. Kontaktem bisop o branj presiden blong yu blong lanem abaot institiut program long eria blong yu, o go long institute.lds.org blong faenem ples blong institiut kolosap long eria blong yu.
From wanem mi mas go long ol klas blong institiut?
Presiden Tomas S. Monson i bin talem: “Mekem se yu mas tekempat long institiut. Mekem hemia i kam faswan. … Tingbaot hemia. Bae yu mekem ol niu fren, bae yu filim Spirit, mo fet blong yu bae i kam strong moa. Mi promes se taem yu tekempat long institiut mo stadi wetem strong tingting long ol skripja, bae paoa blong yu blong stap longwe long temtesen mo paoa blong yu blong kasem daereksen long Tabu Spirit long evri samting we yu stap mekem, bae i kam antap” (institute.lds.org, 21 Epril 2009).
Foto pikja i kam long Media Services