Yumi Tokbaot Kraes

Bigfala Gladhat

I kam long Kristen Nikol Kadon

Mi dipen long gladhat blong Jisas Kraes evri dei.

Brigham Yang Yunivesiti relijin tija i talem: “Long ol miting blong Jos, i no oltaem we yumi stap tokbaot gladhat, be yumi, olsem ol memba blong Jos blong Jisas Kraes blong Ol Lata-dei Sent, yumi stap biliv long gladhat.”

I tru. Mi no save tingbaot eni lesen long Yang Woman o Sandei Skul we i tokbaot gladhat, be ol tingting blong mi oli bin gobak long hae skul kwaea blong mi mo singsing ia “Bigfala Gladhat” (Amazing Grace.)

Bigfala gladhat! (O saon bl’hem i swit!)

We i sevem wan lus man olsem mi!

Mi bin lus stret, be nao mi sef;

Bin blaen, be nao mi luk.¹

“Gladhat i paoa blong God we i kamaot long Atonmen blong Jisas Kraes,” tija blong mi i bin eksplenem. “Mi stap serem gladhat long fo paoa: laef bakegen long ded, fasin blong pemaot man, hiling mo mekem man i kam strong moa.” Hem i gohed blong eksplenem wanwan long ol paoa ia, be tingting blong mi i bin gobak long ol memori blong mi.

Wan taem, semfala hae skul kwaea ia i bin travel i go long Kalifonia, YSA, blong kompit long wan miusik festivol. Mi bin sik stret bifo long taem blong aot, mo trot blong mi i soa we i minim se bae mi no save singsing wetem kwaea long festivol ia—o sapos mi mekem, bae mi no singsing gud, mo bae mi harem i soa. Mi bin askem papa blong mi blong givim wan prishud blesing mo mi spendem nekis dei blong prea blong kam gud bakegen.

Ating mi no bin andastanem fulwan tetaem ia, taem mi bin stap singsing “Bigfala Gladhat” wetem wan trot we i kamgud fulwan long festivol, se mi bin stap singsing abaot stret paoa ia we i bin hilim mi jes wan dei bifo. Atonmen blong Sevya i bin blesem mi long dei ia; gladhat blong Hem i bin stamba blong hiling blong mi.

“Mo [Jisas] bae i go aot, i harem nogud long ol soa blong bodi mo fulap hadtaem mo temtesen blong evri kaen; mo samting ia bae i mekem profesi i hapen we i talem se, bae hem i tekem long hem ol soa blong bodi mo ol siknes blong ol pipol blong hem. (Alma 7:11)

Afta long hae skul, olsem plante we i stat long skul, mi bin sapraes tumas long hevi wok blong skul mo ol jalenj we oli kam wetem fasin blong laef longwe long hom, be tu, blong laef wetem faef fren we i serem rum wetem mi.

Tetaem ia, i bin taem we mi bin lanem blong andastanem paoa blong gladhat blong Kraes, we i save mekem wan i kam strong moa. Mi bin spendem ol dei blong mi blong wok mo stadi, be mi bin dipen long ol prea blong mi evri dei we mi bin stap askem Papa long Heven blong gat paoa blong save finisim evri wok we i nid blong finisim. Taem skul yia i stap pas, mi faenem, wetem glad, se wetem paoa blong Atonmen blong Kraes we i mekem mi kam strong moa mo i helpem mi blong mekem samting, mi bin save mekem ol samting i gud, be i no hemia nomo, mi no bin gat hadtaem.

“Mi save mekem evri samting long paoa blong Kraes ya we i stap mekem mi mi strong” (Filipae 4:13).

Nomata we mi mas gat eksperiens yet long tu saed blong gladhat blong Hem—we i laef bakegen long ded mo ful fasin blong pemaot man—mi stap dipen yet long Atonmen blong Jisas Kraes evri dei. Gladhat, paoa blong God we i kam tru long Atonmen blong Jisas Kraes, i bin mekem mi kamgud bakegen mo i bin mekem mi kam strong moa. Taem mi bin stap traehad blong obei long ol komanmen blong God mo stap folem tingting blong Hem, mi bin kasem help we i kam long heven we i bigwan i bitim paoa blong miwan.

“Hem i tru long gladhat we mifala i sev, afta evri samting [we] mifala i save mekem” (2 Nifae 25:23).

Not

1. John Newton, “Amazing Grace,” Olney Hymns (1779), no. 41.

Wetem Paoa blong Lod

Presiden Hawod W. Hanta

“Wetem fet long Lod, Jisas Kraes, mo fasin blong stap obei long gospel blong Hem, wan step afta long narawan, mo kam antap taem yumi stap wokbaot i go, mo askem blong kasem paoa, kam antap long ol fasin blong yumi mo ol samting we yumi wantem long fiuja, bae yumi faenem se yumi gat sakses long grup blong Gudfala Man blong Lukaot long Sipsip. Hemia i nidim blong yumi gat disiplin mo trening, mo hadwok mo paoa. Be olsem we Aposol Pol i bin talem, ‘Mi save mekem evri samting long paoa blong Kraes ya we i stap mekem mi mi strong.’ (Filipae 4:13).”

Presiden Howod W. Hanta (1907–95), “Developing Spirituality,” Ensign, Mei 1979, 26.

Olsem Wanem Nao Gladhat blong Lod I Tajem Laef blong Yumi?

Elda Deved A. Bedna blong Kworom blong Olgeta Twelef Aposol i helpem yumi blong ansarem kwestin ia insaed long toktok ia “Atonmen mo Rod blong Laef long Wol Ia” we i stap insaed long magasin ia long pej 12:

• “Lod i wantem, tru long Atonmen blong Hem, mo tru long paoa blong Tabu Spirit, blong laefinsaed long yumi—i no blong stap lidim yumi nomo, be tu, blong givim paoa long yumi.”

• “Tingting blong wanwan long yumi we i wantem mekem samting, tingting blong yumiwan we i strong mo i pusum yumi blong mekem samting, gudfala fasin blong mekem plan mo putum gol, oli ol samting we i nid blong gat, be oli no inaf blong yumi gat viktri blong kasem en blong rod blong laef long wol ia. I tru. Yumi mas kam blong stap dipen long ‘ol gudfala wok, mo sore, mo gladhat blong Tabu Mesaea’ (2 Nifae 2:8).”

• “Paoa blong Atonmen we i stap givhan long yumi, i mekem yumi kam strong moa blong mekem samting, blong stap gud, mo blong givim seves we i bitim wanem yumiwan yumi wantem mo bitim wanem paoa blong yumiwan i save mekem.”

Gat tingting blong raetem insaed long jenol blong yu, mo blong serem wetem famle blong yu, ol samting abaot ol taem ia, taem yu bin filim gladhat blong Lod we i stap hilim, i stap helpem, o i stap mekem yu kam strong moa.

Foto pikja i kam long Has Ram