Tekem Taem blong Storian mo Lisin

I Kam long Rosmeri M. Wiksom

Praemeri Jeneral Presiden

I kamaot long wan toktok blong stek konfrens satelaet brodkas long Sol Lek Siti, we i tekem ples long 24 Oktoba 2010.

Hadwok blong yumi we yumi wantem mekem blong pasem toktok long wan moa gud wei bae i blesem ol famle blong yumi long taem we i no save finis.

Pikja

Rosmeri M. Wiksom

Long wan wol we i stret evriwan, bae evri pikinini bae i gobak long haos afta long skul, mo i faenem se i gat wan plet blong joklet kuki we oli jes bekem i stap, i gat wan bigfala glas blong kolkol melek i stap, mo i gat wan mama we i rere blong tekem taem blong storian mo lisin abaot wanem pikinini blong hem i mekem long dei. Yumi no stap laef long wan wol we i stret evriwan, mekem se yu save lego ol kuki mo melek, sapos yu wantem, be yu no save lego blong “tekem taem blong storian mo lisin.”

Twantenaen yia i pas, Presiden Jemes E. Faost (1920–2007), Seken Kaonsela long Fas Presidensi, i bin toktok bigwan se ol famle oli gat smol taem nomo tugeta. Tingbaot hemia —29 yia i pas finis—hem i talem long taem blong jeneral konfrens: “Wan long ol stamba problem long ol famle tedei i we yumi no stap spendem tumas taem tugeta. … Taem tugeta, i wan taem we i impoten tumas—taem we yu nidim blong toktok, blong lisin, blong leftemap tingting, mo blong soem olsem wanem blong mekem ol samting.”¹

Taem yumi stap spendem taem tugeta, mo toktok wetem ol pikinini blong yumi, yumi kam blong save gud olgeta mo oli kam blong save gud yumi. Ol fas samting we yumi putum, ol tru filing blong hat blong yumi, bae i kam pat blong storian blong yumi wetem wanwan pikinini.

Wanem nao hem i nambawan mesej we i kamaot long hat blong yu we bae yu jusum blong serem wetem pikinini blong yu?

Profet Moses i tijim yumi long Dutronome:

“Mo yufala i mas lavem hem long olgeta tingting blong yufala, mo long olgeta laef blong yufala, mo long olgeta paoa blong yufala.

“Yufala i no stap fogetem ol tok ya we mi mi stap givim long yufala tede.

“Oltaem yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.” (Dutronome 6:5–7; oli ademap italik).

Bae mi ademap wan moa: “Mo taem yufala i stap kakae long tebol blong kakae, tugeta.”

Sapos yumi wantem blong famle blong yumi oli stap tugeta blong oltaem, yumi statem wok ia tedei. Blong stap spendem taem blong storian wetem ol pikinini blong yumi, hem i wan invesmen we yumi mekem long famle blong yumi we i no save finis, taem yumi stap tekem rod we i go long laef we i no save finis tugeta.

Wan mama we i kam long Ilinoa, YSA, i bin serem olsem wanem hem i bin tekem taem blong stap storian wetem ol pikinini blong hem:

“Taem ol pikinini blong mifala oli bin smol, mi bin stap gat fasin ia blong lukluk sam televisen program we mi laekem tumas. … Be, ol program ia oli stap kamaot long semfala taem we ol pikinini oli stap go long bed.

“… Kasem wan taem we mi luksave se mi bin putum ol program blong mi oli kam faswan long lis blong mi, mo ol pikinini blong mi oli stap kam daon evriwan long lis. Blong wan smol taem mi bin traem blong ridim ol stori wetem TV i on i stap, be mi bin save long hat blong mi se hemia i no bes samting blong mekem. Taem mi stap tingting hevi long hem ol dei mo ol wik we mi bin westem long fasin blong mi blong luk TV, mi stat blong filim nogud mo mi disaed blong jenis. Hem i bin tekem smol taem blong winim tingting blong mi se mi save ofem TV nomo.

“Afta samples long tu wik we mi no onem televisen, mi filim se hevi trabol ia i kamaot long mi. Mi luksave se mi filim gud moa, olsem we mi klin moa, mo mi bin save se mi bin mekem stret joes.”²

Taem blong go silip i wan stret taem blong storian.

Hileman i bin tokbaot ol strong soldia blong hem se, “Mo oli bin talemaot long mi ol toktok blong ol mama blong olgeta, oli talem: Mifala i no gat [tu] tingting, [mifala i save fulwan] se ol mama blong mifala [oli] bin save.” (Alma 56:48).

Hem i “ol toktok blong ol mama blong olgeta” we i bin tijim olgeta. Taem oli bin storian wetem ol pikinini blong olgeta, ol mama ia oli bin tijim toktok blong God.

Blong Stap Holemtaet Komunikesen blong Yuwan

Plante gud samting i kamaot taem man i toktok o storian, mo enemi i save gud long paoa blong toktok we man i talem. Hem i laekem tumas blong daonem spirit we i kam long ol hom blong yumi taem yumi toktok, lisin, leftemap tingting blong wanwan long yumi, mo mekem ol samting tugeta.

Setan i traem, be i no winim blong stopem Restoresen blong gospel blong Jisas Kraes long dispensesen ia taem hem i bin traem blong stopem impoten toktok bitwin Josef Smit mo God Papa, mo Pikinini blong Hem, Jisas Kraes.

Toktok blong Josef i talem: “Wantaem, sam kaen paoa i holemtaet mi, i winim mi fulwan mo i strong tumas long mi mo i stopem tang blong mi blong mi toktok” (luk long Joseph Smith—History 1:15).

Enemi bae i laekem blong fasem ol tang blong yumi—eni samting blong stopem yumi blong talemaot laod ol filing blong hat blong yumi, long fes blong wanwan long yumi. Hem i wantem tumas blong man i stap longwe, mo samting we i pulum tingting; hem i laekem tumas blong mekem noes; hem i laekem kaen toktok we i no stret long man we yu stap toktok long hem—eni samting we i save blokem yumi blong harem gudfala saon blong voes, mo filim ol gudfala filing we i kam taem man i toktok i lukluk tufala long ae blong tufala.

Stap Lisin long Hat blong Ol Pikinini blong Yumi

Blong stap lisin, i impoten i semmak long fasin blong stap toktok. Elda Jefri R. Holan blong Kworom blong Olgeta Twelef Aposol i bin talem: “Sapos yumi lisin wetem lav, bae yumi no nid blong tingting long wanem blong talem. Bae i kam long yumi … tru long Spirit.”³

Taem we yumi lisin, yumi luk insaed long hat blong olgeta we oli stap raon long yumi. Papa long Heven i gat wan plan long wanwan long ol pikinini blong Hem. Traem tingting se bae i olsem wanem sapos yumi save kasem wan smol pat blong plan blong wanwan long ol pikinini blong yumi. Bae i olsem wanem sapos yumi save olsem wanem blong mekem presen blong olgeta long saed blong spirit i kam antap moa? Bae i olsem wanem sapos yumi save olsem wanem blong pusum wan pikinini blong i kasem ful paoa blong hem? Bae i olsem wanem sapos yumi save olsem wanem blong helpem wanwan pikinini blong hem i aot long fet we i olsem hemia blong wan pikinini, i go long wan testemoni?

Olsem wanem nao bae yumi save?

Yumi save stat blong lanem olsem wanem nao blong lisin.

Wan Lata-Dei Sent papa i bin talem: “Mi mekem plante samting i gud moa taem mi lisin long ol pikinini blong mi bitim we taem mi toktok long olgeta. … Sloslo, mi bin lanem se ol pikinini blong mi oli no wantem ol ansa blong mi we mi rere finis long hem, we mi pruvum wetem taem, mo ol waes ansa blong mi. … Long olgeta, blong oli save askem ol kwestin mo tokbaot problem blong olgeta i moa impoten bitim blong kasem ol ansa blong mi. Plante taem, taem oli finis blong toktok, sapos mi bin lisin blong wan longfala taem mo mi bin lisin gud, oli no nidim ansa blong mi. Oli faenem ansa blong olgeta finis.”⁴

Hem i tekem taem blong lukluk nomo long ol samting we oli moa impoten. Blong toktok, lisin, mo leftemap tingting, i no hapen kwiktaem. Yu no save mekem i hariap, o putum wan stret taem from—bes taem, hem i hapen long semtaem we i stap go. Oli hapen taem we yumi mekem ol samting tugeta: wok tugeta, krietem samting tugeta, mo pleiplei tugeta. Oli hapen taem yumi tanemof ol media, putumdaon ol samting blong wol we i pulum tingting blong yumi, mo taem we yumi lukluk nomo long wanwan long yumi bakegen.

Nao, hemia i wan had samting blong mekem. Taem yumi stop mo tanemof evri samting, yumi mas rere long samting we bae i kam afta. Long fastaem, ples we i kwaet i wan samting we i defren evriwan; i mekem se yu filim se yu westem taem. Yu mas save wet longtaem, wet smol taem, mo afta stap glad. Givim ful tingting long olgeta we oli stap raon long yu taem yu askem ol kwestin abaot olgeta mo afta, stat blong lisin. Ol papa mo mama, tokbaot wan samting we pikinini blong yu i gat intres long hem. Laf abaot ol samting we i pas finis—mo drim abaot fiuja. Samtaem, wan storian olbaot bae i go finis olsem wan storian we i gat mining.

Putum Stamba Tingting we I No Save Finis I Kam Faswan

Long las spring, taem mi bin stap visitim klas blong ol yang woman, tija i bin askem klas blong raetemdaon 10 fas samting blong laef. Kwiktaem, mi stat blong raet. Mi mas talem se fas tingting blong mi i stap wetem “Namba 1: klinim dro blong pensel long kijin.” Taem lis blong mifala i fulwan, lida blong Yang Woman i bin askem mifala blong serem wanem we mifala i bin raetemdaon. Abi, we i jes kasem 12 yia, i bin sidaon long saed blong mi. Hemia nao lis blong Abi:

Go long hae skul.
Kam olsem wan we i save dikoretem insaed long ol rum.
Go long wan misin long India.
Go mared insaed long tempol mo wetem wan riten misinari.
Gat faef pikinini mo wan haos.
Sendem ol pikinini blong mi long misin mo hae skul.
Kam wan bubuwoman we i stap givim kuki.
Givim ful lav long ol apu pikinini blong mi.
Lanem moa abaot gospel mo stap glad long laef.
Gobak laef wetem Papa long Heven.

Mi talem, “Tangkyu Abi. Yu bin tijim mi abaot wan visen blong plan we Papa long Heven i gat long mifala evriwan. Taem yu save we yu stap wokbaot long wan rod, nomata wanem narafala smol rod moa i mas kam, bae yu oraet i stap. Taem rod blong yu i stap lukluk nomo long nambawan gol—we i blong kam olsem wan god mo gobak long Papa long Heven, bae yu kasem ples ia.”

Weaples nao Abi i tekem kaen tingting ia blong gat wan stamba tingting we i no save finis? I stat insaed long ol hom blong yumi. I stat insaed long famle blong yumi. Mi bin askem hem, “Wanem nao yu mekem insaed long famle blong yufala blong putum ol fas samting blong wok from?

Hemia nao ansa blong hem: “Mifala i stap ridim ol skripja, be mifala i stap stadi tu long buk ia, Prijim Gospel blong Mi.” Afta, hem i ademap, “Mifala i stap storian fulap—long taem blong famle haos naet, long taem blong kakae long tebol, mo insaed long trak taem mifala i stap draev.”

Nifae i bin raetem: “Mifala i tokbaot Kraes, mifala i glad long Kraes, mifala i prij long saed blong Kraes.” From wanem? “Blong mekem se ol pikinini blong mifala i save gat save long wanem ples oli save lukluk long hem blong kam klin aot long ol sin blong olgeta” (2 Nifae 25:26).

Blong toktok, lisin, mo leftemap tingting blong wanwan, mo blong mekem ol samting tugeta olsem wan famle, bae i mekem yumi kam kolosap moa long Sevya blong yumi, we i lavem yumi. Hadwok blong yumi we yumi wantem mekem blong pasem toktok long wan moa gud wei—stret long taem naoia— bae i blesem ol famle blong yumi long taem we i no save finis. Mi testifae we taem yumi tokbaot Kraes, yumi stap glad tu long Kraes mo long presen blong Atonmen. Ol pikinini blong yumi bae oli kam blong save “wanem ples oli save lukluk long hem blong kam klin aot long ol sin blong olgeta.”