Seminari insaed long Ol Bus blong Ekuado
Long wan bus longwe, seminari i stap mekem plante samting i jenis long ol yut ia.
Long Is blong Kito, Ekuado, taem yu pasem ol volkenu mo Ol Andes Maonten, ples i godaon wantem long bus blong Amason. Long ples ia, bae yu faenem ol dak bus, plante reva, ol mangki, ol tukon (wan pijin), mo tu ol pink dolfin.
Bae yu faenem tu se i gat wan taon we oli singaotem Puerto Fransisko de Orelana. Hem i stap longwe long evri nara samting long Ekuado. Fiftin yia i pas, i no bin gat tumas pipol long eria ia. Be taem oli faenem oel, i mekem se i gat indastri, man we i lukaotem wok, mo ol memba blong Jos.
Seminari insaed long Wan Smol Branj
Sam long ol yut, olsem Oska R., oli bin ol memba finis taem branj i stat, be plante oli jes ol niu konvet nomo. Wan faea i stap laet insaed long hat blong olgeta. Oska i talem: “Mifala i strong.”
Long Septemba 2010, jes wan yia afta we oli bin krietem, branj i bin statem wan seminari program. “Taem mifala i stat blong kam tugeta sam yia ia pas” Oska i talem, “mifala i bin smol nomo. Mi mi wan yut nomo. Be mifala i gohed blong gro. I no longtaem, mifala i gat 6 pipol, afta 10, mo naoia i gat moa yut.”
From se sam long ol yut oli go long skul long moning mo ol narawan oli go long aftenun, oli bin oganaesem tu taem blong seminari klas—wan long moning we i stat long 8 klok kasem 9 klok, mo wan long aftenun we i stat long haf pas fo i go kasem haf pas faef.
Ating i no gat plante yut insaed long program, be olgeta yut we oli bin kam, seminari i bin jenisim laef blong olgeta.
From Wanem Bae Mi Go?
“Seminari i wan bigfala blesing long mi,” Luis V., wan niu konvet i talem. “Hem i helpem mi blong stap olsem wan gud misinari. Mi bin fesem plante jalenj mo temtesen stat long taem we mi joenem Jos, be mi bin save mekem mi stap strong from se mi save wanem we mi stap mekem, i stret.”
Mo i no Luis nomo we i filim olsem. Ariana J., i talem: “Mi bin wan memba blong Jos i no longtaem nomo i kam be mi bin stap go long seminari stat long taem we mi bin baptaes. Mi mi hapi blong stap go from se mi stap lanem plante tru samting long saed blong gospel blong Jisas Kraes we i stap fulumap hat blong mi wetem hop mo i fulumap maen blong mi wetem save.”
Taem hem i bin go long seminari, hemia i bin helpem Ariana blong stanap strong long gospel. Ariana i talem: “Seminari i help blong mekem spirit blong mi i strong moa mo i helpem mi blong mi rere, blong mekem se wan dei, bae mi save kam wan gud waef, mama, lida insaed long Jos, mo ating wan fultaem misinari.”
Brata blong Ariana, Jerardo, i filim sem samting. Hem i talem: “Mi talem tangkyu from se seminari i kam wan impoten pat blong laef blong mi. Hem i stap mekem mi rere blong go long wan misin wan dei. Long ples ia, mi bin lanem abaot plan blong fasin blong sevem man we God i bin mekem i rere blong mi. Evri klas we mi go long hem, i givim mi hop ia se mi save kasem selestial kingdom, mo i givim mi stret save ia se mi kasem gospel blong Jisas Kraes.”
Jerardo i stap taed long klas samtaem. Hem i mas tekem smol brata blong hem i go long skul fastaem mo afta, kambak kwik long haos blong pikimap sista blong hem blong tufala i save go long seminari. Be hem i oraet long hem.
“Evri samting ia i niu tumas long mi, be mi mi fulap long hapi” Jerardo i talem. “Mi save se mi stap long stret rod we bae i givim mi janis blong luk Papa blong mi long Heven bakegen. Tabu Spirit i givim stret save ia. Mi mas wok had smol moa nomo mo stap gohed kasem en.”
I No Nid blong Mekem Tingting i Fasfas
Long Wolta A., seminari i olsem wan ples we hem i stap fraet smosmol long hem fastaem. “Tingting blong mi i fasfas long fas taem we mi bin go” hem i talem. “Be taem mi go insaed long klas, mi bin filim spesel from se mi filim lav ia we wan i save filim taem hem i stadi long skripja. Mo taem mi finis long klas, mi go mi filim se mi strong moa wetem hapines long hat blong mi from samting we mi bin lanem. Wan long ol bigfala blesing we Papa long Heven i givim long yut, hem i seminari.”
Abel A. we i stap rere blong go long wan misin i talem: “Jos blong Jisas Kraes blong Ol Lata-dei Sent i bin jenisim laef blong mi. Mi stap lanem abaot ol tijing blong ol profet. Mi lavem Josef Smit. Hem i gat strong tingting blong mekem Restoresen blong tru Jos i hapen, nomata long evri problem we hem i bin kasem. Mi wantem gat strong tingting olsem hem.”
Plante long ol yut oli mas mekem ol sakrifaes blong go long seminari. Hem i no isi oltaem, be long ol yut blong Puerto Fransisko de Orelana, Ekuado, hem i gud inaf blong mekem ol sakrifaes ia.
“Taem mi stap tingting se bae mi gohed fored, olsem we skripja i talem,” Abel i stap eksplenem, “mi ting se hem i minim blong putum ol fas samting oli kam faswan long laef. Seminari i wan long ol samting ia. Semmak olsem we hem i bin jenisim laef blong mi, hem i save jenisim laef blong ol nara yut.”
Mo tu, insaed evriwan long ol bus blong Ekuado, Jos blong Jisas Kraes mo seminari program blong hem we i blong ol yut, i stap gohed mo i stap jenisim laef blong olgeta we oli jusum blong tekem.
Seminari i stap mekem ol yut olsem olgeta long Ekuado, oli kam strong moa. Plante long olgeta oli ol niu konvet.
Ol foto oli kam long Josua J. Peki