Sam Tingting blong Famle Haos Naet
Namba blong magasin ia i gat insaed ol atikol mo ol aktiviti we oli save yusum long famle haos naet. Daon ia i gat 2 eksampol.
“Ol Blesing blong Seminari,” pej 20: Luklukbak long atikol ia bifo taem mo disaed olsem wanem i bes blong yusum ol mesej ia wetem famle blong yu. Sapos yu gat ol yangfala long seminari, stat blong askem olgeta from wanem seminari i impoten long olgeta. Afta, ridim seksen ia we oli singaotem “Stap Kasem Ol Blesing blong Promes.” Leftemap tingting blong ol pikinini we oli yangfala moa blong rere blong go long seminari taem bae oli bigwan inaf. Sapos yu no gat ol yangfala we yia blong olgeta i inaf blong go long seminari, bae yu save ridim atikol ia mo afta, toktok raon long hem long olsem wanem seminari i impoten long ol yut blong tedei.
“Evriwan I Save Blek,” pej 42: Tingting blong singsing “Do What Is Right” (Mekem Wanem I Stret) (Hymns, no. 237) olsem fas singsing. Ridim o talemsot stori blong Blek. Askem ol memba blong famle blong serem wan eksperiens abaot wan taem we oli mas tekem wan strong desisen bitwin ol defren rod blong tekem desisen mo wanem i kamaot long ol desisen taem yumi mekem desisen. Blong endem, ridim kwot we i kam long Presiden Tomas S. Monson.
I Simpol, I Kwaet mo Oli No Save Fogetem
Hem i bin wan famle haos naet we mitufala i no save fogetem, we mitufala i bin gat wetem tufala smol gel blong mitufala, Anjelik, we i gat 6 yia, mo Betani, we i gat 4 yia. Hasban blong mi mo mi, i bin slakem mitufala long jea blong mitufala; mitufala i bin taed mo mitufala i no bin save weaples blong stat long hem. Mekem se tufala gel blong mitufala i tekem step, mo tanem wil blong wok blong famle haos naet, we i givim wok long wanwan long mifala. Wok blong hasban blong mi i blong lidim famle haos naet, Betani blong lukaotem miusik, mi lukaotem ol aktiviti, mo Anjelik i blong givim lesen.
Betani i jusum “I Love to See the Temple” (Mi Lavem blong Luk Tempol) (Children’s Songbook, 95), mo mifala i bin singsing long hem tugeta. Papa i bin givim fas prea. Afta, Anjelik i bin tekem las namba blong Liahona mo i jusum wan atikol long seksen blong ol pikinini. Hem i stap lanem olsem wanem blong rid long skul, mo hem i ridim atikol ia long mifala. Filing we i stap long hom blong mifala i kwaet. Spirit i bin testifae se wanem we hem i bin stap ridim i tru.
Mifala i bin plei long sam gem tugeta, mo mi bin givim las prea. Taem mi bin stap prea, mi no save stop blong talem tangkyu long Papa long Heven from Spirit blong Hem mo lav blong Hem, mo tu, blong blesem hom blong mifala wetem tufala smol spirit ia. Hasban blong mi mo mi i save se responsabiliti blong mitufala i blong kea long tufala mo tijim tufala long saed blong gospel. Blong gat famle haos naet i pat blong tabu responsabiliti ia.
Silvi Pusen, Riyunion