Tekem Moa Samting Aot long Jeneral Konfrens
Nomata yumi talem “amen” long en blong las sesen blong jeneral konfrens, lafet long saed blong spirit i no finis long ples ia. Hem i gohed taem yumi stap stadi mo yusum ol tijing we oli kamaot long konfrens ia. Ova long ol yia, ol profet oli bin leftemap tingting blong yumi blong mekem hemia nao. Eksampol, long 1946, Presiden Harol B. Li (1899–1973) i bin askem strong long ol memba blong letem ol toktok blong konfrens oli “ol gaed blong wokbaot blong olgeta mo gaed blong toktok blong olgeta long ol nekis sikis manis we bae i folem.” Hem i bin eksplenem, “Olgeta samting ia, oli ol impoten mata we Lod i luk se i stret blong talemaot long ol pipol ia long taem ia.”1
Long 1988, Presiden Esra Taf Benson (1899–1994) i bin ripitim kaonsel ia bakegen taem hem i bin tijim se: “Long ol nekis sikis manis i kam, konfrens edisen blong yufala blong Ensign i mas stap long saed blong ol tabu standet wok blong yufala, mo yufala i mas lukluk long hem plante taem.”2
Taem hem i stap klosem Oktoba 2008 jeneral konfrens, Presiden Tomas S. Monson i bin talemaot bakegen se i impoten blong stadi long ol toktok blong konfrens. Hem i bin talem: “I gud blong yumi mas tingbaot blong longtaem, wanem nao yumi bin harem long jeneral konfrens ia. Ol mesej ia we oli bin givim, bae oli printim long Ensign mo Liahona magasin blong nekis manis. Mi askem strong long yufala blong yufala i stadi long olgeta mo blong yufala i tingting hevi long ol tijing we oli stap insaed long olgeta.”3
Taem yu stap stadi mo stap tingting hevi long ol mesej blong konfrens, wanem nao yu save mekem blong mekem se oli gat moa mining long laef blong yu? Hemia sam tingting blong helpem yu blong rere blong kasem, mo tekem aksen blong folem ol toktok ia we oli kam tru long insperesen:
Mekem yu rere blong kasem insperesen. Nomata sapos yu stap lukluk, lisin, o ridim ol toktok blong konfrens, yu mas openem hat mo tingting blong yu blong kasem insperesen. Elda Deved A. Bedna blong Kworom blong Olgeta Twelef Aposol i bin tijim se i nomata se wan spika i save tij gud, “wanem i stap long mesej blong hem, mo witnes blong Tabu Spirit i save kasem hat blong wan we i lisin sapos nomo hem we i kasem i letem blong olgeta samting ia blong kam insaed.” Hem i bin eksplenem se insperesen “i nidim blong man i mas wantem long saed blong spirit, tingitng mo bodi, mo i no blong stap kasem olsem samting nating nomo.”4
Ol aedia we oli kam afta, oli save mekem yu rere blong Spirit i tijim yu:
-
Putum sam taem i stap mo krietem wan ples we bae i no gat samting i save kam pulum tingting blong yu, mo wan ples we yu save kasem ol slo toktok long saed blong spirit.
-
Lukaotem help we i kam long heven tru long prea.
-
Raetemdaon ol kwestin blong yu o ol wari blong yu we yu stap lukaotem ol ansa.
Andastanem ol mesej. Ol profet mo ol aposol we oli laef, oli tij, oli eksplenem, oli askem strong, oli givim woning mo oli testifae. Taem yu luklukgud long ol toktok blong olgeta bae i helpem yu blong andastanem mesej blong olgeta fulwan. Hemia sam gudfala fasin blong stadi we bae i wok gud:
-
Askem ol kwestin. Eksampol: Wanem nao Lod i wantem mi blong lanem aot long mesej ia? Olsem wanem toktok ia i leftemap save blong mi long saed blong wan gospel prinsipol o long saed blong wan ves long skripja? Wanem stori nao oli yusum blong tokbaot ol gospel prinsipol, mo wanem nao mi lanem aot long olgeta?
-
Raetem wan aotlaen. Faenemaot gud se wanem nao aotlaen blong spika. Serem toktok long ol defren pat mo raetemdaon wan sot toktok we i eksplenem stamba tingting we i stap long wanwan pat.
-
Faenemaot ol defren samting we oli stap insaed long toktok. Tekem not long ol samting olsem ol doktrin, ol skripja, ol stori, ol woning, ol lis, ol testemoni, ol invitesen blong tekem aksen, mo ol blesing we oli promesem taem wan i obei long kaonsel.
-
Stadi long toktok ia moa bitim wan taem. Hem i nid blong stadi long ol trutok blong gospel moa long wan taem blong kasemgud ful mining blong olgeta mo wanem nao i minim se bae yumi mas mekem. Evri taem we yu stadi, raetemdaon ol niu tingting we yu kasem.
Tekem aksen folem wanem we yu lanem. Sapos we yu stadi long ol toktok wetem prea, bae yu luk olsem wanem bae yu yusum ol mesej ia long laef blong yu. Bae yu save olsem wanem blong mekem ol gudfala jenis taem yu askem ol kwestin olsem: Wanem nao Lod i wantem mi blong mekem wetem ol samting we mi lanem? Mo Wanem nao mi bin lanem we bae i helpem mi long famle, wok, o koling blong mi long Jos? Raetemdaon ol fiing we yu gat blong mekem se yu no fogetem olgeta. Taem yu stap mekem olsem, bae yu gat insperesen blong laef folem ol tijing, mo bae yu kasem ol blesing we oli promesem.
Jeneral Konfrens i taem we Lod i talemaot tingting blong Hem long yu, tru long ol wokman blong Hem. Presiden Spensa W. Kimbol (1895–1985) i bin tijim, “I no gat toktok we oli raetem, o i no gat buk moa, be ol tabu standet wok blong Jos nomo oli mas gat wan gudfala ples insaed long ol sef blong laebri blong hom—i no from oli raetem i gud tumas, i no from toktok blong hem i save winim tingting blong man, be hem i from ol tingting we oli stap insaed we i poenem rod we i go long laef we i no save finis.”5