Lavem, Lukaotemgud, mo Mekem I Kam Strong Moa

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.

Fet, Famle, Help

Olsem Sevya, ol visiting tija oli tijim man wan afta narafalawan (luk long 3 Nifae 11:15). Yumi save se yumi gat sakses long ministri blong yumi olsem ol visiting tija taem ol sista blong yumi oli save talem se: (1) ol visiting tija blong mi oli stap helpem mi blong gro long saed blong spirit; (2) Mi save se visiting tija blong mi i kea bigwan long mi mo famle blong mi; mo (3) sapos mi gat problem, mi save se visiting tija blong mi bae i tekem aksen mo i no wet se bae mi askem.¹

Olsem wanem nao, yumi, olsem ol visiting tija, yumi lavem, lukaotemgud, mo mekem wan sista i kam strong moa? Wanem i kam afta, hem i ol naen tingting we yumi save faenem long japta 7 blong buk ia, Daughters in My Kingdom: The History and Work of Relief Society (Ol Gel insaed long Kingdom blong Mi: Histri mo Wok blong Rilif Sosaeti) blong helpem ol visiting tija blong oli lukaotemgud ol sista blong olgeta:

Prea evri dei from hem mo famle blong hem.
Lukaotem insperesen blong save hem mo famle blong hem.
Visitim hem oltaem mo lanem olsem wanem hem i stap long laef, mo lanem olsem wanem blong mekemgud long hem mo mekem hem i kam strong moa.
Stap kontaktem hem oltaem tru long ol visit, ol telefon kol, ol leta, ol imel, ol teks mesej, mo ol simpol aksen blong kaen fasin.
Gritim hem long ol miting blong Jos.
Helpem hem taem hem i gat wan imejensi, sik, o ol narafala bigfala nid.
Tijim hem abaot gospel wetem ol skripja mo ol Visiting Tijing Mesej.
Givim insperesen long hem taem yu stap olsem wan gudfala eksampol.
Givim ripot long wan Rilif Sosaeti lida abaot seves blong olgeta mo gudfala laef long saed blong spirit mo bodi blong sista ia.

I Kamaot long Ol Skripja

Luk 10:38–39; 3 Nifae 11:23–26; 27:21

I Kamaot long Histri blong Yumi

“Visiting tijing i kam olsem wan tul blong help blong ol Lata-dei Sent woman raon long wol, blong oli yusum blong lavem, fidim, mo givim seves—blong “tekem aksen folem ol sore ia we God i planem i stap insaed long hat blong yumi,’ olsem we Josef Smit i bin tijim.”²

Wan sista we i jes kam wido i bin talem samting ia abaot ol visiting tija blong hem: “Tufala i bin lisin. Tufala i bin mekem mi harem gud. Tufala i bin krae wetem mi. Mo tufala i bin putum han blong tufala raon long mi. …Tufala i bin helpem mi long taem we mi stap long bigfala hadtaem mo gat bigfala trabol long tingting, long ol fas manis we mi bin stap miwan.”³

Blong help wetem ol wok blong wol ia i wan wei tu blong stap givhan. Long Oktoba jeneral konfrens blong yia 1856, Presiden Brigham Yang i bin anaonsem se ol hankat paeonia oli bin lus long bigfala sno (435–595 km) longwe. Hem i bin askem blong ol Lata-dei Sent long Sol Lek Siti blong sevem olgeta mo blong “lukluk stret long ol samting ia we oli nidim we yumi singaotem se i blong bodi o blong wol ia.”⁴

Lusi Mesevi Smit i bin raetemdaon se ol woman oli bin tekemaot ol wom andasket mo stokin blong olgeta stret insaed long tabenakol mo oli hivimap olgeta insaed long ol wagun (kat we hos i pulum) blong sendem olgeta i go long ol paeonia we oli bin stap kolkol tumas. Afta, oli bin putum wanples ol samting blong silip mo ol klos blong olgeta we oli kam wetem smol samting nomo. Taem ol hankat kampani oli kasem ples, i gat wan bilding long taon ia we oli “fulumap wetem ol kaekae blong olgeta.”⁵

Wan Afta Narawan, i kam long Wolta Ren, mo Jos Histri Miusium i glad blong serem