Toktok Taem
“Bae mi ona long papa mo mama blong mi, mo bae mi mekem pat blong mi blong mekem famle blong mi i kam strong moa” (Ol Gospel Standet blong Mi).
“Okei evriwan. Bae yumi gat toktok taem, Mama i singaot.
Josi i bin stap wet from toktok taem ful dei. Evri naet, Josi mo tufala smol brata blong hem, Ben mo Wes, oli kam tugeta long famle rum wetem Mama mo Papa, blong tokbaot wanem i stap gohed long laef blong olgeta.
Tedei long naet, Papa i bin talem se bae hem i helpem Josi blong praktis long toktok blong hem blong talem ol anaonsmen long moning. Blong ridim ol anaonsmen long moning i bin wan spesel janis long skul blong Josi. Tumoro, Josi bae i plei wan smol pat long singsing we hem i laekem, mo bae i gotru long ol spika blong skul mo bae hem i yusum wan maek blong anaonsem ol aktiviti blong dei, mo wanem i stap long kakae long lanj taem.
Josi i ron i go long famle rum, i glad tumas blong praktisim toktok blong hem.
“Hemia nao anaonsa blong yumi!” Papa i talem taem Josi i jiam long jea kolosap long hem. “Yu filim olsem wanem abaot tumoro?”
“Mi glad mo mi fraet smol. Mi fraet se bae mi mestem wan samting long fored blong ful skul,” Josi i talem.
“From hemia nao yumi stap praktis,” Papa i talem. “Gohed mo ridim toktok long pepa blong yu, mo bae mi lisin long ol ples we yu save mekem gud moa.”
“Tangkyu Papa,” Josi i talem.
Hem mo Papa i bin luklukbak long toktok long pepa ia plante taem we Josi i nomo save tingbaot. Afta nao Josi i stanap mo i talemaot toktok blong hem wan las taem long fored blong famle blong hem. Mama mo Papa i klapem han. Ben i givim hem faef, mo Wes i smael mo klapem han.
Josi i go long bed, i hapi mo i trastem hemwan.
Long nekis dei, evri samting i go gud. Nating we hem i bin fraet smol, Josi i bin smael taem hem i harem miusik blong hem i plei tru long ol spika blong skul. Hem i bin glad se hem i bin praktisim toktok blong hem wetem Papa mo hem i bin ridim slo mo klia, mo hem i no mekem mistek.
“Yu bin mekem wan gudfala wok,” Misis Blek i talem, we hem i asisten prinsipol.
Long en blong dei blong skul, Josi i stanap long laen blong tekem bas. Wan bigfala boe i tanem raon mo askem hem, “Yu yu gel ia we i ridim anaonsmen tedei?”
Josi i smael. Hem i talem: “yes.”
“From wanem nao yu jusum singsing ia?” boe ia i askem. “Hem i wan singsing we i no taf. Yu spolem gud moning anaonsmen.” Afta, hem i singaotem hem long wan nem we i no stret mo hem i bin laf wetem ol fren blong hem.
Josi i bin sidaon hemwan long fored blong bas. Hem i filim bel blong hem i nogud.
Taem Josi i gobak long haos, hem i faenem Mama we i stap plei wetem Wes.
“Mama, mi save se i no toktok taem yet, be mi save askem sapos yumitu save toktok naoia,” Josi i talem.
“Yes, Josi,” Mama i talem. “Wanem i rong? Wan samting i go rong long moning anaonsmen?”
Josi i se: “No. Evri samting i stret gud. Olsem, mi ting se i olsem, kasem taem we wan boe i talem long mi se mi jusum wan singsing we i no taf. Hem i singaotem mi long sam nogud nem tu.”
Mama i kilkilim graon long saed blong hem. Josi i wokbaot i go mo sidaon. Mama i hagem hem. Josi mo Mama i toktok abaot evri samting we i bin hapen long dei ia, mo tu abaot gud toktok blong Misis Blek.
Mama i talem: “Mi sori tumas we boe ia mo ol fren blong hem oli talem strong toktok long yu, be i luk olsem se ol nara pipol we yu respektem, olsem Misis Blek, oli bin glad tumas wetem wei we yu bin ridim anaonsmen. Papa mo mi i glad long yu tu. Yu bin wok had mo yu bin mekem gud!”
Josi i bin hagem Mama bakegen. “Tangkyu Mama,” Josi i bin talem. “Mi harem gud nao.” Josi i bin glad se eni taem nomo i save kam olsem toktok taem.
Ol pikja oli kam long Jared Bekstran