Mai le Talitonu i le Iloa

Saunia e Chiao-yi Lin

O le talitonu e moni le Tusi a Mamona ua na o le amataga lea.

Sa ou feiloai muamua i faifeautalai o le Au Paia o Aso e Gata Ai i se fale faatali nofoaafi i le 19 o o’u tausaga. Sa ou iloa lava sa i ai se mea faapitoa e uiga i nei tamaitai talavou, ma sa ou lagonaina se uunaiga e talanoa ia i laua. O lea na ou alu atu ai ma fesili po o a la mea sa fai i Taiuani. Sa la fai mai o i laua o faifeautalai ma amata loa ona talanoa mai e uiga i le talalelei. A o faagasolo nisi o a matou feiloaiga, sa ou aoao ai ia Iesu Keriso, Lana talalelei toefuataiina, ma le Tusi a Mamona. O le autu mulimuli o nei aoaoga—o le Tusi a Mamona—na mafua ai ona ou auai i le Ekalesia.

E mafai ona ou manatua pea le mea na ou oo i ai ina ua ou tatalo e uiga i le tusi. Ina ua uma sa’u faitauga o le tusi i se tasi po, sa ou tapunia le tusi, tootuli, ma ole atu i lo’u Tama Faalelagi pe moni. Sa ou lagonaina le siomia o a’u e se palanikeke mafanafana, o se mea ou te le’i lagonaina i malumalu a le lotu Puta lea sa ou auai atu i ai i lo’u olaga atoa. Sa ese lava lenei lagona. Sa ou iloa sa i ai se tagata sa faafofoga mai. O lena taimi sa suia ai a’u mai le talitonu e moni le Ekalesia i le iloaina e moni, ma filifili ai loa ou te papatiso.

O loo faaauau pea ona faamanuiaina e le Tusi a Mamona lo’u olaga talu mai lena taimi. Sa faamanuiaina ai au a o avea o se faifeautalai.

O loo faamanuiaina ai foi au i o’u valaauga. A o ou faiaoga i le inisitituti, sa ou iloa ai o le Tusi a Mamona sa tusia mo o tatou vaitaimi.¹ Ae a o sauniuni a’u lesona, sa ou iloa ai, o lena faamatalaga e le gata ina moni i lona tulaga faalauaitele, ae e moni foi mo tagata faapitoa i tulaga faapitoa i taimi faapitoa. Mo se faataitaiga, o nisi taimi a o ou sauni e aoao atu, e oo mai i lo’u mafaufau foliga o se tasi o tamaiti sa ou faiaoga ai, ma ou iloa ai se mea e faapitoa e tatau ona ou aoao atu mo le manuia o lena tagata. E masani ona oo mai ia te au ituaiga uunaiga faapena ma e faamautuina pe a talanoa mai se tamaitiiti aoga ia te au pe a uma le vasega e faailoa mai o le lesona o le mea tonu lava lea sa ia manaomia.

Ma le mea mulimuli, ma atonu foi o le vaega aupito taua lea, o le Tusi a Mamona ua taialaina lo’u olaga patino. Ou te manatua lou liliu atu i tusitusiga paia a o ou sauni e faamuta se mafutaga o se tafaoga faamasani. Sa matuai ou lagonaina le ita. Ae o se fuaiupu sa ou faitau ai i le, 2 Nifae 10:20, sa tautala sao mai lava i lo’u loto ma na aumai ai ia te au se lagona toamalie: “O lenei foi, ou uso pele e, ina ua foaiina mai e lo tatou Atua finagalo alofa, le malamalama e faapea ona tele e uiga i nei mea, ia tatou manatua o ia ma tuu ese a tatou agasala, ae le punonou o tatou ulu, aua ua le tuulafoaiina i tatou; a e ui i lea, ua tulia i tatou nai le nuu o tatou tofi; a e peitai, ua taitaiina i tatou i le isi nuu e sili, aua ua faia e le Atua le sami mo tatou ala, ma ua i ai i tatou i le motu i le moana.”

O le manatuaina o le Alii, e pei ona fautuaina mai e lena fuaiupu, na aumai ai ia te au le lototele ma le faamoemoe. E mafai ona ou faalagolago i le “malamalama e faapea ona tele” o le talalelei ua tuuina mai e le Atua ia te a’u, ma e mafai ona ou mautinoa sa le “tuulafoaiina” au. Sa i ai mea lelei i luma atu.

Sa avea o se faamanuiaga maoae le talitonu i upu a faifeautalai a o ou sailiili i le Ekalesia. Ae e sili atu le maoae o le iloaina o le moni o le talalelei, ae maise lava o le mana o le Tusi a Mamona, ia te au lava ia. Ua ou iloa o loo soifua le Atua ma e aoao tuusa’o mai ma patino o Ia ia i tatou e ala i tusitusiga paia.