Pe Mafai Ona Ou Tuua le Tina o Lo’u Tina Matua?
Hugo Fabián Lallana, Córdoba, Atenitina
Ina ua atoa lo’u 21 tausaga, sa ou manao e auauna atu faamisiona. Sa lagolagoina e le tina o lo’u tina matua o Margarita Sippo de Lallana la’u faaiuga e ui o lona uiga o le a tuua ai na o ia. Sa ia tausia a’u talu mai lo’u laitiiti, ma sa ou popole po o ai o le a vaaia o ia a o o’u talai.
Sa papatisoina i ma’ua i le 1978, ina ua 11 o’u tausaga ae 73 tausaga o le tina o lo’u tina matua. E le’i leva ae ua ma le toe o i sauniga lotu, peitai na o mai ni uso ma ni tuagane mai le Ekalesia sa popole mai, e saili i ma’ua.
Sa amata ona ou toe toaga, ma sa tulimatai e le matou uarota lo’u faauuga. “O le a i ai se tatou tiakono!” o la latou tala fiafia lea. I taimi lena, sa leai ni Perisitua Arona o la matou uarota. Sa avea au ma peresitene o le korama a tiakono aua e leai lava nisi tiakono. Sa ou mafaufau pe aisea ua latou tuuina mai ai ia te au sea valaauga, peitai na iu ina ou malamalama o loo aoaoina a’u e taitai o le uarota i tiutetauave faaleperisitua. O se taunuuga la, sa ou taumafai ina ia ou faamaoni.
Peitai, sa tumau pea le le toaga o lo’u tina matua, ma sa na o ni nai taimi sa auai i sauniga lotu. Peitai sa ia lagolagoina la’u fa’aiuga e faamisiona aua na ia iloa i lona loto e moni le talalelei.
Ina ua tuuina i totonu a’u pepa o le misiona i le tausaga e 1990, o le toatele o faifeautalai mai Cordoba na valaauina e talai i Misiona a Atenitina Buenos Aires i Matu po o Saute. Na ou mautinoa o le a valaauina a’u i se tasi o ia misiona e lua ma lē mamao ese ai mai le tina matua o lo’u tina.
Mulimuli ane, ina ua valaau mai lo’u peresitene o le siteki, sa fai mai o ia e manaomia so’u tusifolau aua ou te alu i Kolumipia! E ui i le tumau pea o o’u popolega, sa uunaia a’u e le tina o lo’u tina matua ou te alu. Ina ua le o toe mamao ona ou alu lea, sa ia folafola mai o le a ia toe foi i le lotu i le Aso Sa e sosoo ai ma o le a alu i le malumalu a e ou te le’i foi mai. Na faigata ona talitonuina lenei mea peitai na faafaigofie ai ona ou tuua o ia.
A o ou i ai i la’u misiona, na ia faia lava e pei ona ia folafola mai. E ui sa i lona vaitausaga o le 80, ae na le gata ina auai o ia i ana sauniga lotu uma, ae sa taunuu foi i le taimi e tatau ai. Ma na saunia o ia ma alu atu i le Malumalu o Buenos Aires i Atenitina.
Ina ua mavae se malaga i le pasi e 12 itula i le po atoa e toe foi mai ai mai lena malaga muamua i le malumalu, na taunuu le tina o lo’u tina matua i le falelotu o la matou uarota i le taeao o le Aso Sa i le 8:30, ae toeitiiti amata le sauniga Lotu. Na fai atu lo matou peresitene o le siteki o, Rúben Spitale ia te ia, “Ta o e momoli oe i le fale e fai sau malologa.”
“Leai,” o lana tali lea. “Ou te alu i le lotu.” Ma na ia faia lava.
Ina ua ou toe fo’i mai mai la’u misiona, na faatolu ona ma o faatasi i le malumalu a o le’i maliu o ia i le tausaga e 2000. Ona o la’u misiona, na faamanuiaina uma ai i ma’ua. Pe ana ou nofo i le fale, ou te mautinoa e le oo mai nei faamanuiaga.