Pe Na Faaseseina Ea Lo’u Epikopo?
Jeannie L. Sorensen, Kalefonia, ISA
E le’i leva ona vaeluaina la matou uarota, o lea la ina ua talosaga mai le epikopo e fia vaai ia te au, na ou mautinoa lava o le a maua so’u valaauga i le uarota fou. Sa ou galue lava i tamaitai talavou ma e ou te alofa ia i latou. Latou te matua fiafia lava i le talalelei ma o se fiafiaga le aoaoina o i latou. Ou te mautinoa lava o le a faatagaina au e le Alii e faaauau ona aoaoina i latou.
Nai lo lena, na ou te’i, i le faapea mai o le epikopo e finagalo le Alii ou te faiaoga i le Peraimeri. E mautinoa lava na sese o ia! A e ui i lea, na ia faamautinoa mai ia te au, na ia anapogi ma tatalo ma sa ia maua se lagona malosi e uiga i lo’u valaauga. Ou te alofa i tamaiti, ae o le a se mea ou te iloa e uiga i le aoaoina atu o i latou?
Mo le 15 tausaga o le ma faaipoipoga e pau lava lo ma faanoanoaga ma lo’u toalua o le le’i faamanuiaina lea o i maua e le Alii i se fanau. O a ma taumafaiga e vaetama na le faamanuiaina foi ona o ma luitau faalesoifua maloloina.
I le faatuatuaina o le epikopo, na ou taliaina ai le valaauga e faiaoga i le Peraimeri, ae na ou tauivi i lo’u loto. Sa ou ita i le Alii ona o le leai o sa’u tama, ma sa ou le fiafia i lenei valaauga fou.
“Aisea, le Alii e, ua e poloai mai ai ia te a’u i lenei mea?” Na ou mafaufau ai. “I Lou atamai, ua le faamanuiaina ai a’u i sa’u lava fanau. Ua poloaiina ea la i se a a’u e faiaoga i fanau a isi tagata?”
Sa ou tatalo ma tauivi ma fagatua ma le Alii, ma aioi ma o’u loimata mo le malamalama. Na iu lava ina tonu ia te a’u, talu ai ona ua ou taliaina le valaauga, ua tatau loa ona tu’u lo’u manatu faanoanoa mo au lava ia ae fai le mea sili ou te mafaia.
O iina na oo mai ai faamanuiaga. Na vave lava ona ou aoao e alofa i le fanau, ma na latou aoao foi e alolofa ia te a’u. Na ou iloaina ua lava le maoae o lo latou alofa ua fesoasoani ai ia te au e faatumuina le lagona gaogao i lo’u olaga. E lei umi, ae ua le mafai ona ou savali i le faapaologa o le falelotu e aunoa ma ni tamaiti, a itiiti pe toalua e uuina o’u lima ma isi e taofia au mo se opo pe a ou pasi atu. Na uma lena, ae valaauina lo’u toalua e avea ma taitai Sikauti. E lei umi ae ua faatumulia lo ma fale i tamaiti ma le tupulaga talavou.
Na maliu lo’u toalua i le 47 o ona tausaga i le masina o Novema 1986. I lea foi taimi, na toe silafia ai e le Alii le mea na sili atu ona ou manaomia nai lo a’u. I ni nai vaiaso talu ona maliu lo’u toalua, na valaauina ai a’u ou te auauna atu i se misiona faafaiaoga i le Peraimeri i Fresno, Kalefonia, i le paranesi o tagata Laotia. O le lototetele o nei tagata uiga ese ma a latou fanau na aumaia ia te au le malosi e faaauau ai e aunoa ma lo’u toalua.
O se fiafiaga faapitoa le vaai atu i nei tagata talavou na ou faiaoga ai, ua matutua, faia ni misiona, faaipoipo i le malumalu, ma amatalia o latou lava aiga. O le toatele o nei fanau na “vaetamaina” o loo afe mai lava e faafeiloai a’u ma faamatagofie atili lo’u aso, ma e ou te fiafia pe a ou vaai ia i latou i le Malumalu o Fresno i Kalefonia, lea o loo ou galue ai nei.
O la’u auaunaga i le Peraimeri ua avea o se faamanuiaga moni lava o le olaga atoa. Ou te matua faafetai lava ona o o tatou valaauga e faatonuina mai e le Alii a e le o i tatou.