Punouai i le Galuega o Talafaasolopito o Aiga

Atonu ua na oe lava le tagata o le Ekalesia i lou aiga ma e fou i galuega o talafaasolopito o aiga. Pe masalo foi na i ai nisi o lou aiga na faia le tele o galuega o talafaasolopito o aiga ma le malumalu mo ou tuaa. Po o le a lava lou tulaga, o loo tele lava auala e mafai ai ona fai sou sao i lenei galuega taua.

Afai e te le mautinoa le mea e amata ai, amata i le mea e sili ai lou iloa: o oe lava ia. O le mea moni lava, o le talafaasolopito o aiga e le na o tagata e pele ia te oe ua maliliu. E faatatau foi i le pu’eina mai o lou lava talafaasolopito a o e ola ai. O nisi nei o auala e mafai ona e amata ai:

Saili se tamai pusa teuoloa ma tuu i totonu au faamaumauga taua: o lou pepa fanau, tipiloma, faailoga, api o talaaga, ata—soo se mea e faatatau i lou olaga.
Afai e te faaaogaina se masini e mafai ona faia ai ni kopi o ata, mafaufau e toe kopi ia ata tuai ina ia maua ai ni kopi o ata taua ia e mafai ona faaaoga i le komepiuta.
Teu se api o talaaga o mafaufauga musuia, lagona, ma mea na tutupu i lou olaga.
Faatalanoa tagata o lou aiga ina ia faamaumau talaaga o o latou olaga. Amata i le tagata o lou aiga e aupito i matua o loo soifua. Fai ni fesili faapenei: Na faapefea ona maua lou igoa? O a ni aga masani a lou aiga a o e laitiiti ma le gasologa o le olaga? O a ni mea e mafai ona e ta’u maia ia te a’u e uiga i ni taleni faapitoa po o ni uiga o lou aiga? O le tuufaatasia o talafaasolopito a isi o le a avea ma oa taua o le aiga mo augatupulaga a sau.
Lesitala mo se faitotoa i le www.New.FamilySearch.org ma ta i totonu faamatalaga tau gafa na e aoina mai e uiga ia te oe lava ia ma tagata o le aiga. O le a fesoasoani ia te oe aoaoga i luga o le initoneti i lea laasaga ma lea laasaga.
Afai e mafai, alu i le malumalu e faatino sauniga mo ou tuaa.

Afai e i ai ni au fesili e uiga i galuega o talafaasolopito o aiga, o le a mafai ona fesoasoani le faufautua o talafaasolopito o aiga a lau uarota po o le paranesi.