Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga.O nai faataitaiga nei.
“Ia Punouai i Galuega o Talafaasolopito o Aiga,” i. 8: E mafai ona e saunia se tamai atigi pusa mo tagata taitoatasi o le aiga e teuteuina ma faaaogaina e teu ai ata, tusi talaaga, ma isi faamaumauga.
O Le a Se Mea Fou o i le Polokalama o le Alualu i Luma o le Tagata Lava Ia?, i. 34, ma le “O Le Perisitua Arona—E Sili Atu Nai Lo Le Mea E Te Manatu I Ai,” i. 37: O polokalama fou o le Alualu i Luma o le Tagata Lava Ia ma le Tiute i le Atua ua faamalosia ai le autalavou e mafaufau i ai ma faasoa atu mea ua latou aoaoina. Afai e i ai ni talavou i lou aiga, e mafai ona e talosagaina i latou e fuafua se lesona o le afiafi faaleaiga e faatatau i se gaoioiga o le Tiute i le Atua po o le Alualu i Luma o le Tagata Lava Ia e lei leva ona latou faamaeaina.
E Faapefea ona Ou Fausia se Faavae Faaleagaga?, i. 62: Ia tuu nai maa laiti e fepiitai ma le isi i totonu o se apa e le sao mai ai se vai. I totonu o se isi apa faapena, ia sasaa i ai se faaputuga oneone. Ia sue mai ni meafaitino e suitulaga i fale. Ia tuu le tasi “fale” i luga o maa ma le tasi i luga o le oneone. Ona faatumu lea o apa taitasi i le vai. O le “fale” i luga o le oneone o le a goto a o le “fale” i luga o maa o le a tu pea. Ia talanoaina le auala e mafai ai e se faavae faaleagaga malosi ona faatumauina i tatou i taimi o matagi o le olaga (tagai Helamana 5:12).
O Le Lesona na aoao mai e se Tamai Taifau
A o laiti le ma fanau, sa ou ave i latou i se faleoloa o fagafao e maua mai ai se fasi pepa mo se ia auro e maua fua. E lua itula mulimuli ane ae matou o ese mai ma se tamai taifau, na faatauina i le tupe a le fanau lava ia. O le po lena na matou tuu ai le tamai taifau i le potu ta lavalava e moe ai. I le taeao na gasu uma le potu. Na faamoemoe o le fanau e tapenaina le potu, ae sa latou manatu ua mamafa tele. “E le mafai ona matou faia!” sa latou fetagisi tautala ai.
O lena po na talanoaina ai i le matou afiafi faaleaiga le mataupu o le taunuuga o filifiliga. “Ina ua outou faatauina mai le taifau,” na fai atu ai lo latou tama, “tou te lei mafaufau lava e uiga i le taunuuga. O lea ua avea nei le taifau ma se vaega o lo tatou aiga, ma e tatau ona faia lo outou tiutetauave mo ia.” Sa matou talanoaina le auala e mulimuli mai ai pea taunuuga i soo se filifiliga matou te faia, ma sa ma faamalosia i latou ina ia latou faia e le aunoa ia filifiliga amiotonu.
E lei leva atu nei ona mate le taifau i le 14 ai o tausaga talu ona avea o se vaega o lo matou aiga, ae o lesona o le olaga na ia fesoasoani e aoao mai ia i matou, o le a tumau pea.
Jill Grant, Victoria, Ausetalia