Nai Otootoga o le Lalolagi
Ua tatalaina e le Ekalesia ia Polokalama mo Telefoni Feaveai
Ua tatalaina e le Ekalesia ia polokalama mo telefoni feaveai e fesoasoani ai i tagata e suesue i le talalelei e oo lava pe a o alu malaga. O le polokalama o le Gospel Library ua mafai ai e i latou o loo faaaogaina, ona maka ai tusi, faailoga ai, ma tusi ni faamatalaga a o latou faitauina mai tusitusiga paia, o saunoaga o konafesi aoao, ma tusi lesona o le Aso Sa. O le polokalama o le Mormon Channel ua faasalalau atu ai le alaleo aloaia a le Ekalesia ma o loo aofia ai ma tusitusiga paia, saunoaga o konafesi aoao, ma mekasini a le Ekalesia. Asiasi i le mobile.lds.org mo nisi faamatalaga e uiga i le faaaogaina pea o ia mea.
Ua Toe Tatalaina Le Nofoaga Autu mo Tagata Asiasi Mai i le Malumalu o Los Angeles
Na toe tatalaina le Nofoaga Autu mo Tagata Asiasi Mai i le Malumalu o Los Angeles i le aso 17 o Aokuso 2010, ina ua mae’a le lua tausaga o le toe faafouga. O loo faalauiloa e le nofoaga autu le talafaasolopito o le Ekalesia i Kalefonia i Saute a’o taulai atu i le aoaoga faavae autu o le talalelei. O le maota 12,000-futu-faatafafa (1,100 mita faatafafa) e aofia ai le tele o vaega o faaaliga ma potu mo ata tifaga e lua. O lona totonugalemu ua i ai se faatusa e 11 futu (3.4 mita) o le Keriso, lea e iloa mai fafo o le nofoaga autu o tagata asiasi mai.
E 200 Miliona Isi Faamaumauga Faaopoopo ua Maua nei i Luga o le Initoneti
Ua faalauiloa mai nei e le FamilySearch.org le silia ma le 200 miliona o faamaumauga e mafai ona sailiili ai ia Aokuso 2010, ua oo atu ai nei le aofaiga o faamaumauga ua maua i le saite o le Record Search (saite mo Siliiliga o Faamaumauga) i le 700 miliona. Ina ia maua lea punaoa e faaaoga fua, asiasi i le Pilot.FamilySearch.org po o le beta.familysearch.org. Ua mafai ona maua i ni vaega tetele ia faamaumauga ua faatupulaia, ona o le au faigaluega e ofo fua mai o latou taimi e 350,000 i le lalolagi atoa i le Family Search Indexing, o e o loo faaliliuina ata o faamaumauga iloga ina ia faigofie ai ona sailia faafuainumera.