Valaau I Ou Faiaoga o Aiga
Diana Loski, Penisilevania, ISA
I le tele o tausaga ua tuanai atu, a o laiti lava le ma fanau e toafa, na talia ai e lo’u toalua se galuega i se isi setete ae ou nofo pea sei mae’a aoga mo le tausaga a le ma fanau matutua e toalua. E lei leva ona tofi mai ni faiaoga fou o aiga mo i matou, o e na maua le avanoa e asia faalua ai lo matou aiga ao le’i siitia ese atu lo’u toalua.
I se tasi o po ina ua maea ona faamomoe tamaiti, na ou faalogo ai o tagi le ma teineitiiti pepe i lona potu. Ina ua ou siiina o ia i luga, na ou iloa ai lona fiva tele. Na ou mafaufau e ave o ia i le falemai, ae i le siakiina faatopetope o la matou inisiua fou na faailoa mai ai e na o tagata e aumau i le setete o Idaho e aoga ai —o le setete lea o loo faigaluega ai nei lo’u toalua. A o matou uma o loo avea lava ma tagatanuu i le setete o Uosigitone.
Na tupu ae lo’u popole ina ua ou fuaina le fiva o la ma tama teine ua —105 tikeri Farenaite (41 tikeri C). Na vave ona ou tootuli ifo i le tatalo ma aioi atu ma le malosi mo se fesoasoani. Na oo mai se tali ou te manatu e le ono oo lava i ai so’u mafaufau: “Valaau ou faiaoga o aiga.”
Ua faasolo ina tuai le taimi, ma ua ou iloa o nei alii e toalua, o Tuagane Halverson ma Bird, ua mautinoa lava ua malolo mo le po. Ae, na ou tago lava i le telefoni ma valaau atu ia Tuagane Bird, ma ta’u vave atu ia te ia le tulaga faaletonu. I totonu o le lima minute, i le 11:00 p.m., ua i le faitotoa i luma o’u faiaoga o aiga—i o la suti ma fusiua.
E oo atu i le taimi lea ua mumu alafau ma mata o le ma pepe, ma ua piipii lona lauulu i le afu. Na tagi o ia i le tiga, ae na to’a lava ia Tuagane Bird ma Halverson a o la siiina o ia. Ona, faaee lea o o la lima i luga o lona ulu, ma tuuina atu ia te ia se faamanuiaga ma ta’u atu ia te ia i le suafa o le Faaola ia malolo.
Ina ua pupula o’u mata ina ua mae’a le faamanuiaga, na ou tau le talitonu i le mea na ou vaaia. Na ataata ma feminoia’i solo la’u tama e fia alu i lalo e taalo. Ua leai sona fiva!
“Na mafai ona ou lagonaina lona malu a o ma faamanuiaina o ia,” o le tala lea a Tuagane Bird ia te au a o matou vaavaai uma atu ma le ofo i la’u tama. E lei umi a e o ese atu i laua, a e ou ala ai pea mo se taimi umi ma se pepe sa manao e ala ma taalo. E le’i afaina lea ia te au.
Na mavae ni tausaga se tele talu mai lena po na faamanuiaina ai la’u tama e ni agelu se toalua, na tino mai i faiaoga o aiga. E le’i umi ae matou siitia atu i Idaho ma ua le toe maua ai se fesootaiga ma i laua, ae ou te faafetaia pea faiaoga o aiga agalelei se toalua o e na o mai i le tuneva o le po i le feau a le Alii.