Ngaahi Hoʻatā Fakafāmili ʻi ʻApí
Irma de Mackenna, Silei
Lolotonga ʻeku ʻi he lotú he ʻaho ʻe taha, naʻe talamai ai ʻe ha taha ʻo e kau fefiné ʻene ongoʻi taʻelatá. Ko ha uitou foki au ʻo hangē pē ko iá pea naʻá ku nofo tokotaha pē. Fakafokifā kuó u maʻu ha fakakaukau: fēfē ka ma fakataha he ngaahi ʻaho Mōnité ʻo fai haʻama efiafi fakafāmili ʻi ʻapi? ʻE lava ke ma fakaafeʻi mai foki mo e kau fefine ʻoku nofo tautautoko tahá.
Ne fai ʻeku kiʻi fakatotolo ʻo ʻiloʻi ha kau fefine ʻe toko valu ʻi homau uōtí ʻe lava ʻo kau mai. Ko e kau uitou ʻe toko ono, teʻeki mali e toko taha, pea naʻe ʻikai ke Siasi e husepāniti ʻo e toko taha.
Ne u maʻu ha fakangofua mei heʻeku pīsopé peá u aleaʻi leva ke fai haʻamau ngaahi “hoʻatā” fakafāmili ʻi ʻapi fakataha. (Naʻa mau fakahoko ʻeni lolotonga e ʻahó koeʻuhí ko homau tokolahi ne ʻikai lelei ʻemau sió pea ʻikai ai ke mau fie maʻu ke ʻalu holo he poʻulí). Ne mau fetongitongi pē ʻo fakataha ʻi he ʻapi takitaha mo fai ʻemau kiʻi lēsoni nounou. Mahalo ko e meʻa mahuʻinga taha naʻe maʻu hení ko e ongoʻi moʻoni ʻo e feohi fakakaumeʻa ko ia ʻokú ne haʻi fakataha kimautolu ko ha ngaahi tokoua ʻi he ʻofá.
ʻOku mau tatali kotoa mo e loto-vēkevete ki heʻemau “ngaahi hoʻatā” fakafāmili ʻi ʻapí. ʻOku mau ongoʻi fiefia ke ako fakataha ʻa e ongoongoleleí, pea ʻoku mau fiefia ʻi he feohi fakakaumeʻa fakaʻofoʻofa ʻokú ne fakamālohia ʻemau tuí mo ʻemau ʻofa ki he ʻEiki ko Sīsū Kalaisí.