Ko Hono Lotua ʻEku Tamaí
“Ko ia ʻoku muimui ʻiate aú, ʻe ʻikai ʻalu ia ʻi he poʻulí, ka ʻe ʻiate ia ʻa e maama ʻo e moʻuí” (Sione 8:12).
ʻOku toko nima e fāmili ʻoku ou kau ki aí, pea ʻoku mau maʻulotu he Sāpate kotoa, tuku kehe pē ʻeku tamaí. ʻOku ʻikai te ne kau ki he Siasí, pea ʻoku fakalotomamahi ʻeni kiate au. Ko ha tamai lelei ʻaupito ia pea ʻokú ne faʻa haʻu ki he ngaahi fakafiefia pe ngaahi polokalama ʻeva kuo fokotuʻutuʻu ʻe he uōtí. Te u saiʻia ke ne haʻu maʻu pē ki ai.
Naʻe akoʻi au ʻe heʻeku faʻeé ʻi he Palaimelí ʻoku fanongo mai ʻa e Tamai Hēvaní ki heʻetau ngaahi lotú pea ʻokú ne fie maʻu ke tokoniʻi kitautolu. Ko ia ne u lotu ke Ne tokoniʻi muʻa ʻeku tamaí ke mahino ki ai hono fuʻu mahuʻinga ʻo e ongoongoleleí ki homau fāmilí.
Naʻe teu ke fai ʻeku sio TV he ʻaho Tokonakí mo e ʻi ai ha meʻa naʻe hoko. Naʻe hū ange ʻeku tamaí ʻo talamai naʻe ʻi ai ha ngaahi meʻa lelei ange ʻe lava ke u fai ʻi heʻeku nofo ʻo sio TV. Naʻá ne pehē mai, “Hangē ko ʻení, ko e hā haʻo lau kapau te u lau atu kiate koe ha foʻi talanoa mālie mei he Liahoná?”
Ko ia naʻá mau tangutu hifo mo hoku ongo kiʻi tuongaʻané peá ne laukonga mai. ʻOku ʻikai te u ʻilo pe naʻe ʻiloʻi fēfē ʻe heʻeku tamaí naʻe tuʻu e ngaahi talanoa ko iá ʻi he Liahoná. Ka ʻoku ou ʻiloʻi naʻe fanongo ʻa e Tamai Hēvaní ki heʻeku ngaahi lotú pea tali mai, ʻo ueʻi e loto ʻo ʻeku tamaí ke ne lau ha meʻa ʻi he makasini ʻa e Siasí.
ʻOku ou fakamālō ki heʻeku Tamai Hēvaní Heʻene fanongo mai ki heʻeku ngaahi lotú.
Tā fakatātaaʻi ʻe Julie F. Young