Koi Kemudou Kece Sa Lesi
Na noda kaukauwa ni cola itavi ena rawa me toro cake sara me veiraurau vata kei na levu ni cakacaka eda sa kerei me da na qarava.
Kemuni na taciqu lomani, ena bogi nikua au gadreva meu vakayaloqaqataki ira na lewe ni matabete era sa vakila ni sa rui bibi vei ira na nodra itavi ena so na gauna. Oqo na bolebole au a sa vosa oti kina. Meu na tokaruataka tale baleta ni dau yaco tale mai ki na nodra bula o ira au dau lomana ka qaravi ira tiko.
E vuqa vei kemuni ko ni sa raica na nomuni ilesilesi ni matabete ena laki yacova sara mo ni vakasamataka de rawa mo ni tosoya tale ki liu. Ena rawa beka ni yaco ena gauna ko ni a kacivi kina mo ni vosa ena dua na koniferedi ni iteki ena matadra e drau na tamata. Kivua e dua na lewenilotu vou ena rairai gadrevi beka me masu e matadra na tamata se veivakavulici ena dua na kalasi ena imatai ni gauna. Kivei ira eso era na saga tiko beka me ra kila e dua na vosa vou ena koronivuli ni kaulotu. Kevaka e sega ni ko ni gutaki ki liu ena veika oqori, ia e yaco dina sara tiko ena veigaunisala ena dua na siti vou ka kerea o nomuni peresitedi ni kaulotu mo ni vosa vei ira na tamata yadua ka vakadinadinataka na iVakabula kei na Vakalesuimai ni kosipeli
Ko ni na rairai nanuma beka, “Ni sa oti ga na noqu kaulotu, ena rawarawa sara meu matabete yalodina.” Ia ena vica na yabaki ka tarava ko ni sa na moce ga vakalailai ena bogi, ena nomuni tovolea mo ni vukea na watimuni kei na luvemuni lailai, ka saga mo ni laki vuli tale, ka veivuke tiko vei ira na lewe ni nomuni kuoramu ni italatala qase, veivuke me kau nodra iyaya, ka saga mo ni qaravi ira na nomuni qase e liu ena valetabu. Ko ni na rairai dau matadredredre ka vakasamataka tu oqo: “Niu sa qase mai, e sa na sega soti ni levu na cakacaka e gadrevi niu sa lewe ni matabete yalodina tiko. E sa na rawarawa cake.”
Kivei kemuni na qase ko ni matadredredre tiko baleta ko ni kila tiko na veika era umani tu ena veiqaravi ni matabete. Sa ikoya oqo: na levu ga ni nomuni veiqaravi ena yalodina na levu ni veika ena vinakata vei kemuni na Turaga. O ni matadredredre tiko ena marau baleta o ni kila ni na vakalevutaka o Koya na noda kaukauwa me veiraurau kei na iusana bibi.
Na tikina dredre ni ka dina oqori, sa ikoya, ni gadrevi Vua me solia vei kemuni na ikuri ni kaukauwa o ya e dodonu mo ni ulabaleta yani na nomuni kaukauwa taumada ena veiqaravi kei na vakabauta.
Sa vaka na buli ni vakaukauwataki ni masela. E dodonu mo ni vakaoca na nomuni masela, mo ni tara cake kina. Ko ni na vakayagataka na nomuni masela me wawale. Era na qai vakavinakataki ira vakai ira ka ra qaqaco cake mai. Na toro cake ni kaukauwa vakayalo sa isolisoli ni Kalou ni sa rawa me solia ni da cakacaka vagumatua ena Nona veiqaravi. Ena kaukauwa ni Veisorovaki i Jisu Karisito, sa rawa me veisau kina na keda ituvaki. Na noda kaukauwa ni cola itavi ena rawa me toro cake sara me veiraurau vata kei na levu ni cakacaka eda sa kerei me da na qarava.
O ya e vukea meu kila vakavinaka niu raica e dua e cakava me rawarawa tu ga na veiqaravi ni matabete. Au kila ni ra sa lako sivita rawa na veivakatovolei dredre se na veivakatovolei sa tu mai liu. Me da kakua kina ni vuvutaki ira, au sa tu vakarau meu veivuke ke sa dredre vei ira na ilakolako, ni na yaco dina mai.
Na vakatovolei ni noda kaukauwa ena veiqaravi ni matabete e vakayacori rawa mai na ituvatuva ni Kalou me ra kilikili kaya na Luvena me ra laki bula vata kei Koya me tawamudu. Na Tamada Vakalomalagi e lomani ira na Luvena. Sa solia kivei keda na bula tawamudu, me da bula vata tale kei Koya vakamatavuvale ena lagilagi sa tawamudu. Na ka e gadrevi me da ciqoma kina na isolisoli, sa solia vei keda o Koya e dua na yago, me rawa ni da temaki kina ena ivalavala ca, kei na sala me da vakasavasavataki kina mai na ivalavala ca ka lamata cake ena iMatai ni Tucake Tale. A solia vei keda o Koya na Luvena Daulomani, o Jiova, me noda iVakabula me yaco rawa kina na ka o ya. Sa mai sucu vakatamata na iVakabula, ka temaki ia e sega ni cala, ia e Kecisemani kei Kolikoca a sauma kina na noda ivalavala ca me rawa kina ni da vakasavasavataki. Na veivakasavasavataki oqo ena yaco walega vei ira sa yalodina tikoga vei Jisu Karisito ka veivutunitaka na nodra ivalavala ca, vakasavasavataki ena cakacakatabu vakalotu ni papitaiso, ka vakayacora ka maroroya na veiyalayalati me talairawarawa ki na Nona ivakaro kecega. Ka sa dodonu kina me tiko e dua na meca kaukauwa sara ni noda bula, o ya o Lusefa, vata kei ira na nona ilawalawa, me ra saga vagumatua me ra vesuki ira na luvena yadua na Kalou me kakua ni rawata o koya na marau ni bula tawamudu.
Ena Nona yalololoma kei na veivakabauti cecere, sa digitaka kina o Tamada Vakalomalagi, vata kei na iVakabula e vica na Luvena tagane e vuravura me ra lewena na matabete. Sa tiko vei keda na lewa kei na kaukauwa me da cakacaka ena yaca ni Kalou, me da kauta yani na kosipeli dina i Jisu Karisito kei na kena cakacakatabu vakalotu kivei ira e lewe vuqa na luvena na Tamada Vakalomalagi ena kena levu eda rawata. Ia sa rawa mo ni raica na levu ni noda nuitaka tiko na Kalou. Ka sa rawa mo ni vakila na kena cecere bibi kei na veisaqasaqa eda sotava.
E sega ni veivakurabuitaki ni da vakila noda sa uabaleti tiko ena veigauna eso. Na nomuni vakasama “Au na rawata beka se sega” sa ivakaraitaki ni nomuni sa kila vinaka na ibalebale dina ni lewena na matabete ni Kalou. E dina sara ni sega ni rawa mo ni cakava vakai kemuni ga. Sa dredre sara ka rui bibi ki na nomuni kaukauwa vakatamata vakakina vei au. Na kena kilai oqo sa toka ena yavu ni veiqaravi cecere ni matabete.
Ni gauna e dau sotavi keda kina na yaloluluqa, sa kena gauna me da nanuma kina na iVakabula. E vakadeitaka o Koya me da kakua ni cakava duadua ga na cakacaka oqo. Era sa tu na ivolanikalou me nomuni iloilo ka nanuma kina na veigauna eso ni o ni lomalomarua ena levu ni ka e rawa mo ni cakava.
Me kena ivakaraitaki, e nanuma kina o Peresitedi Thomas S. Monson na vosa ni yalayala ni iVakabula ena nona a masulaki au ena ono na vula sa oti meu yaloqaqa tiko ena noqu ilesilesi ena gauna e vaka me sa dredre kina. Na vosa oqo ni iVakabula, a cauraka o Koya kivei ira na Nona ilawalawa lailai ni matabete ena itabagauna oqo, a vakavotui ki na vakasama ni parofita ena gauna a vakataqara tiko kina na ligana e uluqu: “Ia ko koya sa vakacegui kemudou sa vakacegui au talega, niu sa lako vata tiko kei kemudou. Au na tiko ena yasamudou i matau ka tiko talega e yasamudou i mawi, ia na noqu Yalotabu ena tiko e yalomudou, era na vakavolivoliti kemudou na noqu agilosi ka laveti kemudou cake.”1
Na yalayala e nanuma ka cavuta o ya o Peresitedi Monson a yaco dina vei au. Na yalonuidei sa sosomitaka na vakatitiqa, sa yaco mai na Yalotabu, era a kurabui na dauveiqaravi vakavuniwai, au sa vakabulai tale, kau sa tokoni cake. Ena vuku ga ni nona veimasulaki o ya o Peresitedi Monson sa na rawarawa kina vei au meu nanuma na iVakabula ka nuitaka tiko na Nona yalayala ni o Koya sa dau lako vata tiko kei keda ka tiko e yasada ena Nona cakacaka.
Au kila ni nodra yalayala vei keda na agilosi me ra tokoni keda tiko e ka dina. Sa rawa me da nanuma mada na veivakadeitaki nei Ilaisa vei koya nona dauveiqaravi ni sa yacovi koya na rere. Sa noda na veivakadeitaki o ya ena gauna eda sa vakila ni sa bibi mai kina na noda veiqaravi. E a sotava dina o Ilaisa na veisaqasaqa rerevaki:
“A sa sou ena mataka na nona dauveiqaravi na tamata ni Kalou, ka curu yani, ka raica, sa buku na druadrua ni koro ena ivalu, kei na ose, kei na qiqi ni valu. A sa kaya vua na nona cauravou, Isa noqu turaga! A cava me daru cakava?
“A sa kaya ko koya, kakua ni ko rere: ni ra sa lewe vuqa era sa tiko kei kedaru, ka lewe lailai era sa tiko kei ira.
“A sa masu ko Ilaisa ka kaya, Kemuni Jiova mo ni vakayadrata mada na matana, me rai rawa ko koya. A sa vakayadrata na matana na cauravou ko Jiova; a sa rai ko koya, ka raica sa oso na ulunivanua ena ose, kei na qiqi bukawaqa era tiko vakavolivoliti Ilaisa.”2
Me vakataki koya na dauveiqaravi o ya nei Ilaisa, era sa lewe levu era sa tiko vata kei kemuni ka lailai era sa saqati kemuni. Eso era na tiko vata kei kemuni ko ni na raica e matamuni. Ena tokoni kemuni cake na Turaga ka na kaciva eso me ra tu vata kei kemuni. O ya na vuna e tiko kina na noda veikuoramu. O ya na vuna era raica yani kina na iliuliu ni kuoramu na mata kei na yaloka ni mata ena soqoni ni kuoramu. O ya na vuna e sega walega ni vakatulewa tiko o bisopi ena kuoramu ni bete. Sa vakaraica sara tikoga na matadra na bete. Era na vaka tu oqori o ira na nomuni bisopi se peresitedi ni kuoramu ni italatala qase se peresitedi ni kaulotu. Ka na tu me vukei kemuni ka kaciva eso tale me tucake vata kei kemuni. Ena rairai kacivi beka e dua na itokani vinaka me cakacaka vata kei kemuni ni ko ni sotava na leqa.
Sa vakaraitaka tiko kina e rua na ka me da vakayacora. Na imatai o ya me da kila ka kidavaki ira sa talai ira mai na Turaga me ra vukei keda. Na kena ikarua o ya me da raica ni itavi yadua sa gauna donu me da vakayaloqaqataka e dua. E dua na peresitedi ni kaulotu a talanoataka vei au e dua na daukaulotu a lesia o koya ki na sivia na 12 se 13 na itokani. A kaya vei au, “O ira yadua na itokani o ya era sa voleka ni lesu tale ivale se vakasukai lesu. Ia a sega ni dua vei ira e lako tani.”
Ena gauna au a qai tukuna kina e muri na ka veivakurabuitaki oqo vua na itokani ka a vakabulai ira e vuqa era sa bikai vakabibi, au a ciqoma na kena isau ena kurabui ka vakavulici au. Sa ikoya oqo: “Au sega ni vakabauta ni dina na italanoa oqori. A sega ni guce vakadua e dua na noqu itokani ena dua na gauna.”
Sa vakauqeti kina e dua na peresitedi ni kaulotu me tala na agilosi dina, ena veigauna yadua sara. Sa rawa me da namaka na talai yani ni veivuke ena gauna donu me raici kina na nona kaukauwa ka tokoni keda cake. Sa rawa me da namaka tiko me talai keda yani na Turaga me da laki veivakauqeti.
Mai na veika au sa sotava au rawa ni kaya eke na iwalewale ni veivuke kevaka o sa talai. Ni oti toka ga na noqu kacivi ki na Kuoramu ni Le Tinikarua, a qiriti au mai o Peresitedi Faust, na daunivakasala ena Mataveiliutaki Taumada. A kerei au meu gole yani ki nona valenivolavola. Ena noqu lako au a lomatarotaro se cava e vuni nona via raici au.
Ni oti na vosa ni veivakacaucautaki, a raici au mai ka kaya, “Sa yaco beka mai?” Au a kidroa ka mani tomana mai o koya, “Au a wanonovi iko tiko ena veisoqoni. E vaka vei au ko sa sega ni rawata rawa na nomu ilesilesi, ni ko sega ni kilikili kaya vakavuku, ka sega ni ko taqea rawa na nomu veikacivi oqo.”
Au a kaya ni yacovi au na lomalomarua, me vaka ga au sa cumuta na lalaga. Au sa namaka tiko me na veivakadeitaki mai o koya. Au a kaya vua noqu vakavinavinakataka na nona wanonova tiko na noqu leqa kau a kerea na nona veivuke. Ia au a kurabui ena nona vosa ni loloma, kei na veivakadeitaki. A kaya mai, “Kakua ni tarogi au. Taroga Vua.” A qai dusi cake ki lomalagi. Ia, ni oti e vica na yabaki au sa tu oqo ena valenivolavola o ya. Niu dau curu yani kina au rai cake ka nanuma na nona veituberi ena nona ivakaraitaki me vukei ira era sa vakaicolacola bibi ena veiqaravi ni Turaga. Vakasaqara e dua na sala me ra talai kina ena yalonuidei ki Vua. Kevaka me ra muria na nomuni ivakasala, era na raica ni ra sa rawata na kaukauwa era gadreva tiko ka vuabale tale.
Ena dau solia tikoga mai na Turaga ena nomuni bula na veika mo ni vakaukauwataki, vakayaloqaqataki, ka gugumatua kina. E kila vinaka tu o Koya na kena yaga vei kemuni mo ni qaravi Koya kina. Eso era sa rairai yaco oti mai, me vaka vei au, ni ko ni tu vata kei ira na lewe ni matabete ka cauraka ena domolevu: “Ia koi kemudou kece sa lesi mo dou qarava na cakacaka ni Kalou, mo dou qaravi Koya e na yalomudou taucoko, na nomudou kaukauwa taucoko kei na nomudou nanuma kecega; io me kunei ni dou sa sega ni cala ena mata ni Kalou ena siga mai muri.”3
Ni ko ni sa yalodina ki na ivakatagedegede cecere oqo, sa tara cake tiko kina na Turaga e dua na veivakabauti kei na veivakaukauwataki vei kemuni me na vakatikori ni ko ni sa gadreva ena veigauna kei na veivanua ko ni sa kacivi kina ena dua na inaki e cecere cake mai na nomuni gagadre yadua. Au a vakila na ka oqo ena dua na siga totoka ni vula itubutubu ena loma ni dua na rara. Au sa lesi meu taqomaka na noqu vanua. E se bera ni yaco na ivalu, ia au sa vakau yani ki na dua na veitaqomaki sega ni kilai ena gadrevi kina na noqu kaukauwa taucoko, ka rairai soli bula kina. Au a laveta na ligaqu imatau vata kei ira na tamata meu yalataka niu na taqomaka na noqu vanua ena “yalodina kei na solibula” ka “sa noqu lewa vakataki au oqo, sa sega kina na vakatitiqa se meu vakaiulubale; kau na vakayacora ena yalodina na noqu itavi au sa na lesi kina; Ni sa vukei au kina na Kalou.” 4
Au sega ni vakabekataka ni kaukauwa me vakayacori kina na yalayala o ya, kau a maroroya, a vakatikori tu vei au mai na gauna au a se dikoni tiko kina. Ni se qai vica toka ga na yabaki ni noqu matabete, au a dau tiko ena vica na gauna ka vakayacani ena gauna o ya me “veitalatala ni daukaulotu.” Era sa lewe levu ena gauna oqo era sa laki veiqaravi ka ra vosa ga vakalekaleka ena soqoni ni sakaramede ni bera nodra gole. Ia na soqoni taucoko sa baleta na daukaulotu era sa na biubiu tiko. E dau rogoci kina na sere totoka. Au se dau vakila tikoga na voqa ni domodratou na lewe va na daukaulotu oti ni ratou na lagata:“Au na lako ke ko ni lewa, Jisu,” ka voqa mai na vosa ni yalayala, “Meu kaya na nomuni vosa Jisu,” ka kena itinitini, “Meu dina tu vei kemuni.”5
E a vakayavalati na yaloqu ena siga sa oti yani o ya me vaka ena siga edai ena dua na veivakadeitaki ni sa dina sara na yalayala me baleti au ka vakakina vei keda kece ena noda veiqaravi ni matabete. Eda na kune marau ni da lakova na veivanua sa talai keda kina na Turaga. Ena soli vei keda na ivakatakila me da tukuna na Nona vosa ka sureti ira na Luvena na Tamada Vakalomalagi me ra veisautaki ena Veisorovaki ka kilikili me ra gole ki vale ka laki bula vata kei Koya. Au vakila kina me vakaoqo ni noda veiqaravi ena yalodina ena vakatara o Koya me na veisautaka na yaloda me veiganiti kei na noda veitokani kei Koya ka qaravi Koya me tawamudu.
Au sa vakadinadinataka vei kemuni ni gauna eda solia taucoko kina na noda kaukauwa ena veiqaravi ni matabete, ena solia vei keda na Turaga na yaloqaqa taucoko eda sa gadreva kei na veivakadeitaki ni sa na lako vata tiko kei keda ka ra na tokoni keda cake na agilosi.
Au sa vakadinadinataka ni da sa kacivi mai vua na Kalou. Sa ikoya oqo na Nona Lotu dina ka sa vakatikori tu vei kemuni na Nona matabete sa tawamudu. Au sa ivakadinadina ni sa taura tu o Peresitedi Thomas S. Monson na idola taucoko ni matabete ka sa veiqaravi tiko kina ena vuravura taucoko edaidai. Ena yaca i Jisu Karisito, emeni.