Valetabu Vakalou, Veiyalayalati Tabu
Sa vanua tabu ka vakalou na valetabu. Sa ivurevure ni kaukauwa kei na qaqa vakayalo. Sa vanua ni ivakatakila.
E vakasinaiti na yaloqu ena reki kei na vakamuduo ena noqu vakasamataka na soqoni duatani ni marama oqo e veiyasai vuravura. Sa dua dina na ka talei na lewena na isoqosoqo vakamarama cecere oqo, kei na noda duavata ena sasaga ni noda vaqaqacotaka na noda vakabauta na Turaga o Jisu Karisito ka vakakina na tarai ni Nona matanitu. Sa noqu masu meu na dusimaki mai vua na Yalotabu ena noqu vosa vei kemuni ena iulutaga vakalou ni sokalou ena valetabu.
Na vanua tabu duadua e vuravura o ya na valetabu. Ena valetabu, era dau ciqoma kina o ira na lewe ni Lotu bula kilikili na veivakalougatataki cecere duadua ka rawa vua e dua me ciqoma ena gauna eda vakayacora kina na veiyalayalati tabu kei koya na Kalou. E vukei keda talega me da vakarautaka vei ira na noda kawa era sa mate yani ka ra se bera ni ciqoma na veiyalayalati e gadrevi me baleta na cakacakatabu vakalotu ni veivakabulai.
Au na vakaraitaka eke na bibi ni kena tara na veivaletabu, na vuni kedra gadrevi na veicakacakatabu vakalotu oqo me baleta noda vakabulai, vakakina na noda vakavakarau me da curuma na valetabu.
Au sa vakadinadinataka ka doka vakalevu sara na solibula era vakayacora e lewe vuqa na lewenilotu me ra yaco rawa yani kina ki na valetabu. Meu wasea mada e dua na italanoa vaka o ya.
Ena 1976, ena neirau a se tiko mai Costa Rica, a kerei watiqu na peresitedi ni kaulotu me vukei koya ena imatai ni ilakolako mai na buturara ni kaulotu ki na dua na valetabu. E okati ena Tabana ni Kaulotu kei Amerika e Loma, o Costa Rica, Panama, Nicaragua, kei Honduras. Na valetabu voleka duadua ena gauna o ya sa ikoya na Valetabu e Mesa Arizona. Ena taura toka e lima na siga ni lako yani ka lima na siga ena lesu mai, ka takosovi e ono na iyalayala ni vanua. Sa dua na ka na solibula vakailavo vei ira e lewe levu ka ra lako. Era volitaka na nodra retioyaloyalo, basikeli, sikeiti, kei na veika tale eso e rawa ni ra volitaka. Keimami a vodo ena rua na basi sega soti ni logaloga vinaka ena siga kei na bogi. Eso vei ira na lewenilotu era vakayagataka vakadua kece na nodra ilavo ena ivodovodo ni basi ka ra kau bisikete walega kei na bata me kedra ivaqa e gaunisala.
Na cava na vuna era vakayacora kina na solibula cecere vakaoqo ena marau kei na yalodina o ira na lewe ni Lotu me ra lako rawa kina ki na valetabu?
Au sega vakadua ni guilecava rawa na sovaraki vakayauyau mai ni Yalotabu ena tolu na siga keitou a tiko mai kina ena Valetabu e Mesa. E tarai au dina vakatitobu na noqu raici ira na lewe ni veimatavuvale ena nodra veimokomoko vata kei na drodro vakayauyau ni wainimata ni oti nodra vauci vata me tawamudu.
Ni mai cava e ruasagavulu kava na yabaki sa mai vakatabui kina na valetabu e San José, Costa Rica. Maliwai ira na tiko rawa ena soqoni sai ira na veimatavuvale ka ra se qai lako vakadua ena dua na ilakolako ki na valetabu. Era a waraka voli tu mai ena yalodina kei na kilikili na gauna vakalou oqo. Ena gauna oqo era sa qai rawa ni lako vakawasoma taucoko ki na valetabu baleta ni sa mai vakatabui walega oqo e dua na valetabu e Panama ka vakakina na kena kacivaki e dua e Honduras.
A sa dau vakaroti ira tu mai na Nona tamata na Turaga me ra tara valetabu. A vakarota vakaoqo vei Mosese na Turaga: “Ia me ra cakava e dua na vale tabu me noqu, meu tiko kina ena kedra maliwa.”1 Na valecavu veikauyaki era a tara oqo e kena inaki me vanua ni sokalou nei Isireli ena nodra ilakolako ki na vanua yalataki. A vakaraitaka vei Mosese na Turaga na kedra itaratara kei na kedra ivakavakayagataki. E dodonu me sa valetabu ni Turaga.
Ni oti o ya, a qai tara na valetabu e Jerusalemi o Solomoni na Tui ka vakayagataka na veiyaya ni taravale vinaka duadua e kilai rawa.2
Ena gauna ni Nona ilesilesi e vuravura, sa dau raica tu mai kina na Turaga ni valetabu me sa dua na vanua vakalou ka vakavulica na kena rokovi.
Era a tara valetabu talega vua na Turaga na Nifai e Amerika. Era a soqoni vakavolivolita tu na valetabu ena nona rairai mai vei ira o Karisito ni oti Nona Tucaketale.3
Ni sa vakalesui mai na Lotu ena itabatamata oqo, a vakaroti ira na Yalododonu na Turaga me ra tara e dua na valetabu: “Raica dou cokonaki kemudou; dou vakarautaka na veika sa yaga vei kemudou; dou tara e dua na vale; io me vale ni masumasu, vale ni lolo, ka vale ni vakabauta, vale ni vuli, vale ni vakarokoroko ka vale ni caka dodonu; io na vale ni Kalou.”4
Me kena isau, era tara na Valetabu e Kirtland na Yalododonu ena solibula sega ni vakataratutu. Era a vakalesui mai ki na valetabu vakalou oqo na veidola ni matabete ka rairai talega mai kina vaka-iKoya na iVakabula.5
Ena gauna oqo, e sa 128 taucoko tu na valetabu era sa vakayagataki tiko e vuravura raraba ka ra sa tara tale tiko eso.
Eda sa vakasalataki me da tara valetabu me rawa ni ra vakayacori na veicakacakatabu vakalotu me baleti ira na bula ka vakakina o ira na mate. Era okati ena veicakacakatabu vakalotu oqo na inisitori, edaumeni, vakamau, vauci, papitaiso me baleti ira na mate, kei na veitabaki
Era vakarautaka vei keda na cakacakatabu vakalotu ni inisitori na veivakalougatataki yadua ni bula oqo ka vakakina na kena mai muri.
Era umanaki ena edaumeni na veiyalayalati tabu. E okati kina na ciqomi ni veivakasala, kaukauwa mai lagi, kei na yalayala ni veivakalougatataki ka vakatautaki ena noda yalodina ki na veiyalayalati eda vakayacora.
A vakamacalataka vakaoqo na edaumeni o Peresitedi Brigham Young:
“Na nomu edaumeni sa ikoya mo ciqoma na veicakacakatabu kece vakalotu ena vale ni Kalou, ka ra yaga vei iko ni ko sa biuta na bula oqo, ka ra na vakatara vei iko mo lesu tale ki na iserau nei Tamada … ka mo rawata mai kina na nomu bula vakalou tawamudu.”6
Na cakacakatabu vakalotu ni veivauci, me vaka na vakamau e valetabu, vauci vata ni matavuvale me tawamudu.
Na veiyalayalati eda vakayacora vata kei ira na veicakacakatabu vakalotu oqo ena valetabu e yaco me veivakadonui ni curu ki na iserau ni Kalou. Na veiyalayalati oqo era laveti keda me ulabaleta yani na noda iyacoyaco ni kaukauwa kei na rai. Eda veiyalayalati me da vakaraitaka kina na noda yalodina ena taraicake ni matanitu. Eda yaco me tamata ni veiyalayalati ena noda sa yalayala kivua na Kalou. Era na noda kece na veiyalayalati yalataki oqo ena noda yalodina ki na veiyalayalati oqo.
E vale ni vuli na valetabu. E vuqa vei ira na ivakasala era soli mai na valetabu era ivakaraitaki ka vulici ena Yalotabu. E kena ibalebale oqo ni da sa vakavulici mai lagi. Na veicakacakatabu vakalotu kei na veiyalayalati era ivakaraitaki kaukauwa kei Karisito kei na Nona Veisorovaki. E tautauvata ga na ivakasala eda ciqoma, ia ena vakatuburi na noda kila na ibalebale ni veicakacakatabu vakalotu kei na veiyalayalati ena noda lakova vakawasoma na valetabu ena yalo ni via vuli kei na via kila na veivakavuvuli tawamudu era vakavulici kina.
Na sokalou ena valetabu e vakarautaka na veigauna vinaka ni nodra qaravi na mate ena vakayacori ni veicakacakatabu vakalotu ni veisosomitaki me baleti ira. Ena rawa me vakayacori na cakacaka ni tuvakawa mai vua e dua ga sa rawa ena taudaku ni valetabu, ia ena rawa ni vakayacori walega ena loma ni valetabu na veicakacakatabu vakalotu me baleti ira na tubuda era sa mate.
Na valetabu sa vale ni Turaga. E dusimaka vakakina o Koya na sala ni kena ivakavakayagataki, na veicakacakatabu me vakayacori kina, kei na veivakatagedegede ka vakatarai keda meda curu ka sokalou kina.
A kaya vakaoqo vei Mosese na Turaga, “Mo luvata tani na nomu ivava mai na yavamu, ni sa qele tabu na tikina ko sa tu kina.”7 Eda wilika ena Same, “Ko cei ena cabe cake ki na ulunivanua i Jiova? se ko cei ena tu e na nona yasana tabu?
“O koya sa liga savasava ka sa yalosavasava, o koya sa sega ni vagolea cake na yalona ki na ka walega ka sa sega ni bubului vakailasu.”8 Io me kakua sara ni vakatarai me curu kina e dua na ka tawasavasava, me vakadukadukalitaka na nomuni vale.9
Sa digitaki bisopi kei na peresitedi ni iteki na Turaga me nodrau itavi na vakadonuya na nodra kilikili kaya na tamata yadua me ra ciqoma e dua na ivolatara ni curu ki na valetabu. E dodonu me da dau dina vei rau na noda bisopi kei na peresitedi ni iteki ena nodrau vakatarogi keda ni bera ni rau solia vei keda e dua na noda ivolatara ni valetabu. Na isolisoli eda na kauta yani ki na icabocabo ni soro sa ikoya na loma e savasava kei na yalo e bibivoro. Na bula kilikili yadudua sa ikoya na ka e gadrevi me rawati kina na veivakalougatataki ni valetabu.
Eda vakavakarau ena noda muria na ivunau kei na sagai ni muri na loma ni Kalou. Kevaka o ni se bera ni curu ki na valetabu, ni tekivu vakavakarau ena gauna oqo, baleta mo ni sa tu vakarau tu ka kilikili kaya ni yaco mai na kena gauna donu.
Ena gauna eda sa lako kina ki valetabu, me da vakasavasavataka noda vakasama kei na lomada ena veivakasama kei na veika eda vakila ka ra sega ni salavata kei na veika vakalou eda sotava ena valetabu. Me da vakaisulu vakamatau talega ka me rakorako ka donu na noda isulusulu. Na noda isulusulu kei na keda irairai ena ilakolako vakalou oqo ena vakaraitaka na noda rokova ka doka na Turaga kei na Nona vale vakalou. Ena noda curu yani ivaletabu, eda veisau sara ki na isulu vulavula, ka vakatakilakilataka na savasava kei na dodonu. Sa da qai vakarau tu me da vakaitavi ena vakanomodi ni sokalou e valetabu. Na veivakalougatataki tawamudu oqo e sa vakarautaki tu vei ira kece era sa kilikili kaya me ra ciqoma.
Na cava e dodonu me ra vakayacora na marama ena Lotu me ra rawata kina na veivakalougatataki ni valetabu?
Mai vei ira na Nona parofita, sa sureti ira tu kina na Turaga o ira era se sega ni ciqoma na veivakalougatataki ni valetabu, me ra vakayacora na veika e gadrevi me rawa ni ra ciqoma rawa kina. Sa sureti ira era sa ciqoma oti na veivakalougatataki oqo o Koya me ra dau lesu vakawasoma me ra marautaka tale kina na veika era a sotava me ra laki vakarabailevutaka kina na nodra rai kei na kila me baleta na Nona ituvatuva tawamudu.
Me da bula kilikili kaya me dua na noda ivolatara ni valetabu. Me da gole yani ki valetabu ka vauci ira na noda matavuvale me tawamudu. Me da dau lesu tale ki valetabu ena veigauna taucoko sara e rawa me da gole kina. Me da solia vei ira na noda lewe ni matavuvale era sa mate na gauna vinaka me ra ciqoma kina na veicakacakatabu vakalotu ni bula vakalou. Me da marautaka na kaukauwa vakayalo kei na veivakatakila eda ciqoma ena noda lakova vakawasoma na valetabu. Me da yalodina ka vakayacora ka maroroya na veiyalayalati ni valetabu me rawa ni da ciqoma kina na taucoko ni veivakalougatataki ni Veisorovaki.
Au vakadinadinataka vei kemuni ni sa vanua tabu ka vakalou na valetabu. Sa ivurevure ni kaukauwa kei na qaqa vakayalo. Sa vanua ni ivakatakila. Sa vale ni Turaga. Ena yaca tabu ni noda iVakabula ka Dauveivueti, o Jisu Karisito, emeni.