Vakayacori ni iNaki ni iSoqosoqo ni Veivukei

Julie B. Beck

Peresitedi Raraba ni iSoqosoqo ni Veivukei

A tauyavutaki mai vua na Turaga na iSoqosoqo ni Veivukei me tuvalaki ira, vakavulici ira ka vakauqeti ira na Luvena yalewa me ra vakavakarau kina ki na veivakalougatataki e tawamudu.

iVakatakilakila

Julie B. Beck

Kemuni na taciqu, ni sa rairai totoka ka keitou marautaka na mai tiko vata kei kemuni. Sa ka levu dina na neitou lomani kemuni ka vakavinavinakataki kemuni.

Me vaka e dua na Mataveiliutaki Raraba ni iSoqosoqo ni Veivukei, sa neitou kina na veigauna vinaka ni sikovi kemuni wavokiti vuravura ena yabaki sa oti. Keitou a sa veivakaroti kei kemuni mai Jamani, Denmark, Ositereli, kei Qana. Keitou sa masu oti kei kemuni mai Sigapoa, Hong Kong, Idia, kei Siri Lanka. Keitou a laveti ka vuli mai vei kemuni e Brazil, Chile, Puerto Rico, Kenada, kei Amerika.

Keitou reki ni kila ni ko ni sa “cakavinaka tiko,” me vakataki Koya na iVakabula. Sa vakasakiti tiko na nomuni cakacaka. Ia keitou gadreva me keitou tukuna ni se tu tale e levu na ka me caka. Keitou kerea na nona veivakauqeti na Turaga ena nodra vukei na matabete ena taraicake ni matanitu ni Kalou e vuravura. Sa kena gauna mo ni vakayacora me vaka o ni se sega vakadua ni se bau vakayacora, na kemuni inaki na iSoqosoqo ni Veivukei. Sa dodonu me da kila vakamatata na inaki ni iSoqosoqo ni Veivukei, me rawa ni da toso kina i liu ka rawata na ka e gadreva na Turaga.

Au na tekivu ena noqu railesuva eso na itukutuku makawa me baleta na iSoqosoqo ni Veivukei me rawa ni vakamacalataki kina na vu ni kena a tauyavu na iSoqosoqo ni Veivukei. Au na qai vakalekalekataka na itavi e tolu ni marama yadua lewe ni iSoqosoqo ni Veivukei. Me itinitini, au na qai vakamacalataka, na sala e namaka vei keda na Turaga me da vakayacora kina na ilesilesi vakalou sa solia mai vei keda, vakayadudua ka vakakina vakaisoqosoqo.

I. Na Vuni Tauyavu ni iSoqosoqo ni Veivukei

Ena dredre na kena kilai na vuni tiko ni dua na isoqosoqo ni marama ena Lotu kevaka eda sega ni kila vinaka tiko na Vakalesuimai ni kosipeli i Jisu Karisito. Ena nona kila vinaka tu na Turaga na veika rarawa ka ra na yaco mai nikua, a kaya kina vakaoqo vua na nona tamata, o Josefa Simici Lailai, “ka solia vua na ivunau; …

“Me ra vakabauta … na kai vuravura;

“Me vakadeitaki na [Nona] veiyalayalati tawamudu;

“Ia era na vunautaka yani na uto ni [Nona] i vakavuvuli dina ko ira na malumalumu kei ira na tamata wale ki vuravura taucoko.”¹

Ena vakacavari na cakacaka ni Turaga ena “vunautaki yani ki na veimatanitu, veimataqali, duivosavosa kei ira na tamata”² ka vakakina na Nona kosipeli ka tauyavutaki na Nona veiyalayalati tawamudu ena veicakacaka tabu vakalotu ni valetabu.

Me vaka ga na nona a sureti rau o Meri kei Marica na iVakabula ena gauna ni Veiyalayalati Vou³ me rau vakaitavi ena Nona cakacaka, sa vakakina na marama ni itabatamata oqo, ena tu ni nodra ilesilesi lavaki ni vakaitavi ena cakacaka ni Turaga. Tekivu mai na veigauna taumada ni Veivakalesuimai, era a dau bulabula sara na marama ena nodra veivuke ena taraicake ni Lotu ena nodra tokona na veiqaravi ni kaulotu, vakaitavi ena tara ni veivaletabu, kei na tauyavutaki ni veitikotiko ka rawa me ra sokalou vata kina na Yalododonu. Na tauyavutaki ni iSoqosoqo ni Veivukei ena1842 a utura cake vata na nodra kaukauwa na marama ena nodra dui itavi vakai ira ena tarai ni matanitu ni Turaga, me vaka ga na kena a solia vei ira na turaga na nodra dui itavi yadua ena tauyavutaki ni kuoramu ni matabete.

Mai na kena a tauyavutaki, sa roboti vuravura taucoko na iSoqosoqo ni Veivukei ka sa vakatokai me “isoqosoqo ni marama levu duadua e vuravura, vakaiwiliwili ka vakakina ena veika kecega.”⁴Eda kila kina mai vua na Parofita o Josefa Simici ni sa tiki bibi ni Vakalesuimai na iSoqosoqo ni Veivukei ka vakakina ni a sa tu taumada mai liu ena Lotu e dua na isoqosoqo ni marama vaka o ya.⁵ E vakavulica o Peresitedi Joseph F. Smith ni iSoqosoqo ni Veivukei a “tauyavu vakalou, vakadonui vakalou, tuvalaki vakalou, ka tabaki vakalou mai vua na Kalou,”⁶ “me vaka na ivakaro mai lomalagi,”⁷ me vukea na Turaga ena nodra” tucake tale mai na mate na tamata … ka rawata na bula tawamudu.”⁸

Ena iSoqosoqo ni Veivukei, sa tu kina na nodra ilesilesi vakaitamera ka bibi na marama ena Lotu, “okati kina na veiqaravi e valetabu kei na vakavulici ni kosipeli.”⁹ Me kena ikuri, na iSoqosoqo ni Veivukei me vukea na marama ena “teivaki kei na vakatuburi ni … dua na ivakadinadina me baleti [Jisu] Karisito kei na Kosipeli,”¹⁰ “vakaqaqacotaki ni matavuvale kei na vale,”¹¹ kei na “vakayacori vakavinaka na nodra veitavi vakamatavuvale.”¹² Sa tu na nona itavi me vakayacora “na nodra gagadre na dravudravua, na tauvimate kei na vakaleqai,” ia a kaya o Peresitedi Joseph F. Smith ni sa iusutu ni nona cakacaka “sa ikoya me wanonova matua na veika vakayalo [kei na vakabulai] … ni marama kece lewe ni Lotu.”¹³

Me kena ivakaleka, na itavi ni iSoqosoqo ni Veivukei ka tauyavutaka na Turaga, sai koya me tuvalaki ira, vakavulici ira, ka vakauqeti ira na Luvena yalewa me vakarautaki ira ki na veivakalougatataki ni bula tawamudu. Au na via tokaruataka o ya. Sa iusutu ni iSoqosoqo ni Veivukei me vaka a tauyavutaka kina na Turaga sai koya na nodra, tuvalaki, vakavulici ka vakauqeti na Luvena yalewa na Turaga me ra vakarautaki kina ki na veivakalougatataki ni bula tawamudu.

II. Na Noda iTavi

Ena vakayacori ni inaki ni iSoqosoqo ni Veivukei, sa lesia kina na marama yadua ena iSoqosoqo ni Veivukei na Turaga ka vakakina o ira taucoko na lewena me ra:

Tubu cake ena vakabauta kei na yalododonu yadudua.
Vakaqaqacotaka na matavuvale kei na vale.
Qarava na Turga kei ira na Luvena.

Era tokona ka vakaukauwataki rau na rua tale oqo na veitavi yadudua oqori. Ni da vakatubura na noda vakabauta, ena vakaqaqacotaka na noda matavuvale na isau ni noda igu oqori. Ni da qarava na Turaga kei ira na Luvena, ena tubu vakakina na noda vakabauta kei na noda yalododonu. E qaqaco vinaka sara tu na isema ni tolu na itavi oqo. Me da tekivu ena imatai ni itavi.

1. Tubu Cake ena vakabauta kei na yalododonu yadudua. Me da vakayacora na noda itavi ena ituvatuva ni Turaga, sa dodonu me da vakatubura na noda vakabauta kei na yalododonu yadudua. E gadrevi na vakabauta ena noda lewena na Lotu, ka na dau veivakani tiko ena noda bula taucoko na levu ni “gugumatua, yalovosota, yalomalua, kei na vosota vakadede.”¹⁴ Ena noda iyau soliwale raraba, e tu kina na nodra ivakaraitaki vakasakiti na marama ena Lotu ni gauna eliu. Era a dau vakasavi mai na veivale ka vakacacani o ira na marama ivuvu ena vuku ni nodra vakabauta. Eso tale era drobula mai na bukawaqa kei na waluvu. Era takosova na veiwasawasa ka taubaletaka e udolu vakaudolu na maile, ena nodra vorata na duka, tauvimate, ka vakakina na lauqa ena nodra vukea tiko na taraicake ni maranitu ni Kalou e vuravura. E vuqa era buluti ira na watidra, luvedra kei ira na nodra itubutubu, kei ira na tacidra lalai ena ilakolako oqo. Na cava era vakayacora kina na ka oqo? Era vakayacora baleta ni kama tiko e lomadra na yameyame ni nodra vakabauta. Era sega ni vakasaqara na marama vakasakiti oqo na isulu vivinaka, gauna ni vakasavuliga, veivale vakaitamera e vuravura, se levu cake na iyau. Me vakataki kemuni, era a vakadeitaka ka tu na nodra ivakadinadina ni dina na kosipeli vakalesuimai nei Jisu Karisito ka vakakina ni gadreva na Turaga me ra vakayacora na nodra itavi ena vakatetei ni Nona matanitu e vuravura. Na vaqarai ni yalododonu yadudua sa ka ni sasaga ni veisiga me ra vakataki koya kina na iVakabula ena veivutuni, vulici ni ivolanikalou, masumasu, talairawarawa ki na ivunau kei na vakaqarai ni veika “e vinaka, totoka, rogo vinaka, se daudokai.”¹⁵

2. Vakaqaqacotaka na matavuvale kei na vale. Na ikarua ni noda itavi sa ikoya na vakaqaqacotaki ni matavuvale kei na vale. Era sa warolaki ka vakamalumalumutaki na veimatavuvale ena veivakarau veilaboci kei na ivakavuvuli lasu. O koya gona, ke da vakawati se sega ni vakawati, qase se gone, sa noda itavi me da sabaya ka bulataka na veidina ka laurai ena “Na Matavuvale: Ai Vakaro ki Vuravura Raraba.”

Eratou veivakasalataki vakaoqo na Mataveiliutaki Taumada, “Se vakacava sara na kedra kilikili se donu na veika tale eso se veitaviqaravi cava ga, me ra kakua sara ni sosomitaka na nodra itavi ni ilesilesi-vakalou ka rawa ni ra vakayacora vata vakavinaka duadua ga na itubutubu kei ira na lewe ni matavuvale.”¹⁶ O ira na gone era sucu mai ena gauna oqo era sa tubu cake tiko ena dua na vuravura ka sa tubu vakalevu tikoga kina na ivalavala ca. E dodonu me nodra idrodro mai na ca era sotava tiko e veisiga na noda veivale.

Na iSoqosoqo ni Veivukei e dodonu me tauyavutaki, tuvai vakadodonu, ka qarava na nodra vakaqaqacotaki na veimatavuvale ka vakakina na kena vukei na noda veivale me ra ivakavakaruru vakalou mai na vuravura. Au a kila rawa oqo ena vuqa na yabaki sa oti niu a se qai vakamau walega. O irau na noqu itubutubu, ka keitou a tiko veitikivi, erau a vakaraitaka mai ni rau sa na toki tiko ki na dua tale na yasa ivuravura. Au a dau vakararavi tu ena ivakaraitaki ni veivakamamautaki, vuku ka veivakayaloqaqataki nei tinaqu. Ia oqo e sa na yali tiko me dua na gauna balavu. Oqo ni se bera sara na vakau ivola ena biau livaliva (e-mail), misini ni vakau ivola (fax machines), talevoni veikauyaki (cell phones), itaba Veilawa, ka se berabera vakalevu sara kina na vakau ni ivola. Dua na siga ni bera nona lako, keirau a veitagicaki tiko au a taroga sara, “O cei ena qai tinaqu?” A vakasama sara vakamatau o Nau, ka qai kaya cake mai vei au, ena Yalotabu kei na kaukauwa ni ivakatakila ka dau yaco mai vei ira na mataqali marama vakaoqo, “Kevaka au sega ni lesu tale mai, kevaka o na sega ni raici au tale, kevaka sa sega ni rawa meu vakavulici iko ena dua tale na ka, vakaogai iko ena iSoqosoqo ni Veivukei. Ena tinamu na iSoqosoqo ni Veivukei.”

A kila tu o Nau ni kevaka au tauvimate, era na qaravi au na marama, vakakina na gauna au vakasucu kina, era na vukei au. Ia na ka a nuitaka vakalevu duadua o tinaqu sa ikoya me ra na noqu iliuliu veivakaukauwataki vakayalo, o ira na marama ena iSoqosoqo ni Veivukei. Sa vakatekivu meu vuli vakalevu sara mai vei ira na marama vakaitutu ka yalodina oqo.

Eratou a tauri ilesilesi vakaperesitedi ni iSoqosoqo ni Veivukei ena noqu tabanalevu e tolu na marama duidui ena veiyabaki ka rau a yali tu kina na noqu itubutubu. A sureti au o Alta Chamberlain meu vakavulica na vakayagataki ni gauna ka vakakina na vakaraici ni vale vei ira na vo ni marama, e baleta beka nona raica niu gadreva meu vakavinakataka na kila oqo. A vakauqeti au o Jeanne Horne meu vakacavara vakavinaka na noqu vulica vinaka sara vakaiau ena imatai ni gauna na iVola i Momani. A solia vei au na imatai ni noqu ilesilesi ena volau ni tawaikava o Norma Healey ka vakavulica talega vakalevu cake vei au na veiqaravi. Eratou a kila tu na inaki ni iSoqosoqo ni Veivukei o iratou na marama vakasakiti oqo.

3. Qarava na Turga kei ira na Luvena. Na ikatolu ni itavi ni marama kece ena Lotu sa ikoya me ra qarava na Turaga kei ira na Luvena. E matalia vei au ena loma ni veiyabaki ka yali tiko kina o tinaqu, au a veiqaravi voli kina vaka-peresitedi ni Lalai ni tabanalevu e muri au a peresitedi ni Goneyalewa ni tabanalevu. Au a lewe ni matabose ni tabanalevu, ena ruku ni veiliutaki ni matabisopi. A vakavulica vei keimami o Peresitedi Boyd K. Packer ni “me vaka ga na kena vakaukauwataka na Matabete Cecere [na nodra veiqaravi na mataveitacini ena Matabete i Eroni], sa vakakina na noda yalodina ena veiqaravi sega ni nanumi koya vakaikoya [ena iSoqosoqo ni Goneyalewa kei na Lalai] sa vakakina na noda veiqaravi ena yalodina ena iSoqosoqo ni Veivukei.”¹⁷ Eda sega ni vakagalalataki mai na mataveitacini ni iSoqosoqo ni Veivukei ena noda vakaitavi ena dua tani tale na mataisoqosoqo. Ena vuku ni noda sega ni dau curu yani ka curu mai ena iSoqosoqo ni Veivukei, eda sa semati vakadua tu kina ki na veitavi ni iSoqosoqo ni Veivukei ka vakalougatataki ena veigauna vinaka kece ena noda ivakaraitaki vinaka, ka da ivakatawa ni sipi vakasinaiti tu ena vakabauta kivei ira na luvei Tamada.

Sa tu ena veilesi ni iSoqosoqo ni Veivuke eso sara na veigauna vivinaka ni veiqaravi e dela ivuravura, ka rawa me ra vakayacora kece sara na marama. Ena noqu vakalakova tu na veiyasa ivuravura, au raica rawa ni udolu vakaudolu vei kemuni e sega tu na watimuni se luvemuni ia o ni tobu uasivi tu ni vakabauta, taledi kei na yalodina. Ena sega ni dua tale e kune me vinaka cake mai vei kemuni me mai cakacaka ena veivaletabu, vakadaukaulotu, ka vakavulica na itabatamata ka ra sa tubu cake tiko mai oqo, ka vukei ira era buturaki sobu tu. E gadrevi iko na iSoqosoqo ni Veivukei.

Au kurabuitaki ira talega na itabagone kei na nomuni icegu oi kemuni o ni se qai yaco tikoga mai ki na iSoqosoqo ni Veivukei mai na veiparokaramu ni Goneyalewa. Au sa raica na gu ni yalomuni me vakavatukana na nomuni sasagataka na vinaka e vuravura. Sa dau vakavuqa noqu vakasamataka na veika e rawa me yacovi ena cakacaka ni tuvakawa, me kena ivakaraitaki, kevaka mo ni wasea kei ira na marama qasecake (vakaiau) na nomuni kila torocake vakacakacaka. Sa na sega ni rawa kina vei keimami me keimami itatarovi ni nomuni icegu kei na igu vagone ena neimami kerei kemuni mo ni dabe tu ga, ka saravi ira na kila tu vakacakacaka ena nodra navunavuci, vakarautaki ka tuvalaki taucoko na cakacaka ni iSoqosoqo ni Veivukei.

III. Vakayacori ni iNaki

Eda rawa ni vakayacora na cakacaka ni Turaga ena Nona sala ena noda vakasaqara, ciqoma ka cakacaka ena ivakatakila yadudua. Eda na sega ni rawata vinaka ke sega na ivakatakila yadudua. Eda na sega ni druka, kevaka eda muria na ivakatakila yadudua. E vakarota vei keda o Nifai na parofita ni na vakaraitaka vei keda na Yalo Tabu “na veika kece [me da] kitaka.”¹⁸A sa parofisaitaki tu mai ni gauna e muri oqo ena sovaraka mai na Turaga na Yalona vei ira na Nona vada.¹⁹ Ena rawa oqo kevaka eda vakatara me da tu vakadua ka vakanomodi me rawa ni da rogoca kina na domo ni Yalotabu. E vakavulica o Elder Neal A. Maxwell ni na rawati na ivakatakila me baleta na noda ilesilesi eda kacivi kina ka vakakina me baleta na noda dui bula yadudua “e ka ni noda vakasama… . Na ivakatakila e sega ni vaka na tabaki ni ibulukau, ia e noda sasaga vakaikeda, vakawasoma na kena vukei mai na lolo, vulici ni ivolanikalou, kei na vakanananu yadudua.

“Me kena iusutu, e gadreva na ivakatakila e dua na ivakatagedegede ni buladodonu yadudua, me rawa kina ni dau drodro yauyau tu ga mai kina vei koya sa yalododonu.”²⁰

IV. iTinitini

A vakaraitaka vakaoqo ena vica na yabaki sa oti o Peresitedi Spencer W. Kimball “e se sega ni taucoko tiko na taurivaki ni dua na kaukauwa me vaqaqacotaka na veimatavuvale e Saioni ka tara na matanitu ni Kalou ena isoqosoqo oqo—ka na sega tikoga me yacova ni rau sa liaca ruarua, o ira na marama kei na matabete na raivotu ni iSoqosoqo ni Veivukei.”²¹ A tauyavutaki mai vua na Turaga na iSoqosoqo ni Veivukei me tuvalaki ira, vakavulici ira ka vakauqeti ira na Luvena yalewa me ra vakavakarau kina ki na veivakalougatataki e tawamudu. Sa neitou navunavu me keitou tokoni ira na marama ena Lotu, ena nodra dui itavi vakai ira, ena neitou vakadeitaka ni na veivuke na veitaviqaravi kece eda vakaitavitaki keda kina, ena vakatuburi ni nodra vakabauta, yalododonu yadudua, vakaqaqacotaki ni nodra matavuvale kei na nodra veivale, ka qarava na Turaga kei ira na Luvena.

Na sala duadua ga eda na rawata rawa kina na ka oqo, sa ikoya mai na noda vakasaqara, ciqoma ka cakacakataka na noda dui ivakatakila yadudua. Na kaukauwa dina me baleta na mataveitacini marama wavokiti vuravura raraba oqo e sa tu sara ga vua na marama yadua. Dina ga ni da na dau raici keda tu ga me da ka malumalumu ka rawarawa wale tu ga, ia eda wasea vata kece tu e dua na iyau vakaturaga soliwale, ka da rawa ni rawata na vakabauta ka tautauvata kei na nodra na marama vakabauta uasivi era sa liu yani vei keda. Sa tu na noda itavi bibi ena veivuketaki ni tarai ni matanitu ni Kalou kei na vakarautaki ni lako mai ni Turaga. Sa dina sara ni na sega ni rawa ni rawata na Turaga na Nona cakacaka ke sega ni ra vukei Koya na luvena yalewa. Ena vuku ni ka oqori, sa kerea kina na Turaga me da soli keda vakalevu cake. E namaki keda me da vakayacora na inaki ni iSoqosoqo ni Veivukei ena kena ivakarau ka se sega ni se bau vakayacori vakadua kina. Au marautaka niu vakadinadinataka na dina ni kosipeli vakalesuimai nei Jisu Karisito ka vakakina na parofita bula nikua ka liutaka tiko na Nona cakacaka. Ena yaca i Jisu Karisito, emeni.