Na Lesu ki na Bula Dodonu
Oqo na gauna me da tucake kina ko ikeda yadua ka vakarewataka e dua na drotini ki vuravura ka kacivaka na lesu tale ki na bula dodonu.
Ena koniferedi raraba sa oti, au a kacivi mai vei Peresitedi Monson meu peresitedi raraba vou ni Goneyalewa. Niu tu ena kena iserau e dua na parofita ni Kalou ka soli vei au na veivakabauti tabu oqo, au sa yalataka kina niu na veiqaravi ena yaloqu taucoko, noqu kaukauwa taucoko, noqu vakasama taucoko, kei na noqu igu taucoko. Ni se bera na veikacivi oqo, e dau dua tiko na noqu peleti lailai ka ceuti tu kina e dua na ibole vakaoqo, “Au rawa ni kitaka na veika dredre.”1 Na peleti lailai ka tu kina na ibole rawarawa o ya e vakayaloqaqataki au. Ia ena gauna oqo kevaka meu na veisautaka na ibole o ya, ena vakaoqo: “Ena kaukauwa ni Turaga, au rawa ni kitaka na ka kecega.”1 Ena kaukauwa oqori au vakararavi kina nikua ena noqu tu ena itutu ni vunau tabu oqo.
Ena Epereli sa oti, ni se qai oti ga ena rua na siga na koniferedi raraba, keitou a dabe kina ena imatai ni neitou bose na mataveiliutaki ka se qai tokoni vou. Keitou a taubale cake ki na delai Ensign Peak, ia ni keitou raica sobu yani na bucabuca e ra, keitou raica na valetabu ka taliva ena rarama ni matanisiga na agilosi o Moronai. E matata vei keitou yadua. Na sasaga ni neitou mataveiliutaki sa ikoya na valetabu. Ka matata talega na neitou itavi. Sa dodonu me keitou “veivuke ena nodra vakarautaki na goneyalewa yadua me ra kilikili me ra cakava ka maroroya na veiyalayalati tabu ka ciqoma na veicakacaka tabu vakalotu ni valetabu.”2
Na valetabu sa inaki ni veika kece eda cakava ena Lotu.3 Na valetabu na vuna era biuta tu kina na nodra veivale tudei na tubuda ivuvu ni Lotu ka lako mai ki na ra. Oqori na vuna era a sotava kina na dravudravua kei na mate. Na veiyalayalati ni Valetabu era vakavuna ni, dina ga ni ra sa bulu ga ena tolo ni sala na gonelalai, a rawa ga vei ira na ivuvu oqo me ra lagata:
Eso era vakayalia na veika kecega, ia era lako mai ki na bucabuca vata kei na veika kecega, e dina—na veicakacaka vakalotu ni valetabu, kei na yalayala ni bula tawamudu vakamatavuvale.
Ni oti ga e rua na siga ena nodra yaco yani na Yalododonu ena Bucabuca e Salt Lake, eratou a kabata cake na Ensign Peak o Brigham Young kei ira na nona ilawalawa. Eratou vakarewataka ena delana o ya e dua na drotini— e dua na itavoi dromodromo ka vesu ena dua na ititoko me ivakatakarakara ni dua na itawake se ivakatagedegede ki na veimatanitu.5 O ira na Yalododonu me ra rarama, me ra ivakatagedegede. Ena Epereli sa oti, ena dela ni Ensign Peak, keitou a vakarewataka talega kina na marama e tolu e dua na drotini keitou a cakava mai na dua na ititoko kei na dua na iubi ni ulu koula vaka-Peru. Oqo na noda ivakatakilakila, na noda ivakatagedegede ki na veimatanitu—sa kacivaka na noda drotini na “lesu ki na bula dodonu.”
Na bula dodonu e dua na ka e gadrevi taumada ena kena curumi yani na valetabu ni Turaga kei na kena ciqomi na veituberi ni Yalotabu. Na bula dodonu “sa ikoya e dua na ivalavala ni vakasama kei na itovo ka yavutaki ena ivakatagedegede cecere ni savasava.”6 E umani kina na bula savasava kei na itovo savasava. Na bula dodonu e tekivu e yaloda kei na noda vakasama. E susugi cake e vale. Sa ikoya na kena cokocokoti vata e udolu vakaudolu na vakatulewa kei na ivalavala. Na bula dodonu sa ikoya e dua na vosa eda sa sega soti ni rogoca vakalevu ena isoqosoqo ni gauna oqo, ia na vosa vaka-Latina na virtus e kena ibalebale na kaukauwa. O ira na marama kei na turaga bula dodonu era taukena e dua na ivakarau ni bula dokai sega ni dau kilai kei na kaukauwa e loma. Era yalodei baleta ni ra kilikili kaya na veituberi ni Yalo Tabu. Sa veivakasalataki o Peresitedi Monson: “O iko mo tutaka na dina, kevaka sara mada ga o na tu duadua kina. Me tu vei iko na yaloqaqa savasava mo rarama me ra vakamuria na tani. E sega ni dua na veitokani e vakamareqeti cake mai na savasava ni lomamu, na nomu bula savasava—ka sa dua na ka lagilagi mo kila ni o tu ena vanua o lesi kina ka savasava ka dei na yalomu ni o kilikili mo vakayacora vakakina.”7
De baleta beka ni da sa vakawelei tiko ena noda nanuma ni sa oti na gauna ni bula ena ivakatagedegede cecere ka sa sega ni sala vata se bibi soti ena bula ni gauna oqo? Me vaka e se qai vakavoqataka lesu walega vei keda o Elder Hales, ena iVola i Momani a sa toka vinaka sara toka ga o Leonitai ena dela ni dua na ulunivanua. Sa “gole vakatabakidua na nodra vakasama,” o koya vata kei ira era vakarorogo vua, “ena dua na inaki tudei” ni ra na sega ni siro sobu mai na ulunivanua. E tovolea walega vakava na tamata ilawaki qaseqase ko Amalikaia, e toro cake na doudou ni kena imatai mai na kena ikarua ki na kena ikava, me rawa ni “lako tani mai na ulunivanua” 8 o Leonitai. Ia ni sa vakamuria na yalayala lasu nei Amalikaia, sa qai “vagagai tiko vakamalua” 9 o Leonitai me yacova ni sa mate. E sega ni vagagai walega, ia e “vakalalai.” E rawa beka ni o koya oqo na ka e yaco tiko nikua? E rawa beka ni taumada eda vosota, oti qai taura, e muri qai mokota na itovo tawakilikili era vakavolivoliti keda tu?10 E rawa beka ni baleta ni da sa rawai mai vei ira na ivakaraitaki lasu kei na itukutuku veirawai ka vakavuna na noda guilecava na keda ivakatakilakila ni da luvena yalewa ka luvena tagane na Kalou? Eda sa vagagai tale tiko beka ga vakamalua? Na cava tale beka e veicavilaki vakalevu cake mai na nodra vakayarayarataki na itabagone ni itabatamata vakaturaga oqo me ra sega ni cakava e dua na ka se me ra vakaogai ira tiko ga ena vakau itukutuku ka sega ni kila na dina ka tu ena dua na ivola ka a volai me baleti iko kei na nomu gauna mai vei ira na parofita ni Kalou—Na iVola iMomani? Na cava tale beka e veicavilaki vakalevu cake mai na noda vakayarayarataki ira na marama, qase kei na gone, o iko vata kei au, me daru sa rui kauwaitaki kedaru ga vakalevu, na kedaru irairai, na nodaru isulu, na ibulibuli ni yagodaru kei na kena levu, ka daru sega kina ni raica na kedaru ivakatakilakila vakalou kei na dina ni rawa ni daru veisautaka na vuravura ena nodaru ivakaraitaki ni bula dodonu? Na cava tale beka e veicavilaki vakalevu cake mai na noda vakayarayarataki ira na tagane—gone kei na qase, ka tu vei ira na matabete tabu ni Kalou—me ra sarava na iyaloyalo vakasisila dau veivagarogaroi ka ra sa kauwaitaka kina na yago ka sega na vakabauta; era sa tiloma na ca ka sega ni vakatawa na bula dodonu? E tukuna na iVola i Momani na kedra italanoa e 2000 na tamata gone yaloqaqa ka solia vei ira na yaloqaqa kei na yalodei, na nodra bula dodonu kei na savasava me ra taqomaki ira kina na nodra itubutubu, na veiyalayalati kei na vakabauta ni nodra matavuvale. Na nodra bula dodonu kei na yalodina me ra “dina tiko ga e veigauna kece” sa veisautaka na vuravura!11
Au vakabauta dina sara ni dua na goneyalewa se cauravou, ka liutaki ena Yalotabu e rawa ni veisautaka na vuravura, ia na kena rawa ni caka vakakina, sa dodonu me da lesu tale ki na bula dodonu. E dodonu me da vakaitavi ena vakavakarau. Me vaka e kaya na daucici ena cicibalavu o Juma Ikangaa ni oti na nona qaqa ena Cicibalavu mai New York: “E sega ni vakaibalebale na gagadre ni qaqa, kevaka e sega kina na gagadre ni vakavakarau” 12 Oqo na gauna ni vakavakarau ena noda vakaivakarautaka na noda bula. Oqo na gauna me da yaco me da “kilikili kaya na matanitu.”13 Oqo na gauna me da vakadavora kina na noda kosi ka vakanamata ki na kena icavacava. Na lesu ki na bula dodonu sa yaga me tekivu ena dui yaloda yadua kei na noda veivale.
Na cava beka eda rawa ni cakava o keda yadua me tekivu kina na noda lesu ki na bula dodonu? Na sala kei na parokaramu ni veituberi ena baleti keda yadua. Au sa cakava na noqu parokaramu ni vakavakarau mai na idusidusi eso ena ivolanikalou: “Mo qarauna me savasava tikoga na nomu vakanananu;”14 “Kukuva toka na [nomu] veiyalayalati;”15 “Tudei tu ena vanua tabu;”16 “Kakua ni domona [na] iyau vakavuravura;”17 “Mo ni vakabauta ni sa dodonu mo ni veivutuni;”18 “Dau nanumi Koya ka muria na ivunau sa solia vei ira;”19 Ia, “a ka kecega e vinaka, na ka e totoka, se rogorogo vinaka, se daudokai … gadreva na veika oqori.”20 Ena gauna oqo me vakatauvatani kei na veigauna sa oti, sa gauna me da rogoca kina na kaci nei Moronai me da “yadra ka tucake” ka “taura matua na isolisoli vinaka kecega, ia dou kakua ni taura na isolisoli ca, se na ka tawasavasava.”21
Ena dua na gauna lekaleka sa oti au a tiko rawa ena nona vakalougatataki e dua na makubui keirau yalewa vou duadua. Sa dua na irairai savasava vei au na nodra tu wavokita na gonelailai oqo, na watiqu o ira na luvei keirau tagane kei ira e vuqa tale na daulomani. Sa dua na ka na kena totoka ni vakaisulu vuavula taucoko tu—ka sega sara ga ni bau mosi vakalailai ni vakayacani vei rau na buna! Ia na ka e tarai au vakalevu na veivakalougatataki e solia na tamana, na luvei keirau tagane o Zach. E vakalougatataki Annabel Elaine lailai me na kila na kena ivakatakilakila ni luvena yalewa na Kalou, ni na dau muria na nodra ivakaraitaki na tinana na buna kei na tuakana, ka me na sotava na bula marau ena nona bulataka e dua na bula dodonu ka vakarau me cakava ka maroroya na veiyalayalati tabu eso ni valetabu. Ena gauna bibi oqori au masuta kina me ra na vakavolivoliti, vaqaqacotaki ka taqomaki mai vei ira na matabete bula dodonu na goneyalewa yadua, sega walega ena gauna ni sucu kei na veivakalougatataki, ia ena bula taucoko.
Ena soqoni tabu ni koniferedi sa oti ena nona kacivaka o Peresitedi Uchtdorf na nona tokoni na noda parofita vou kei na Mataveiliutaki Taumada, au sarava na nodra tucake na ivavakoso matabete taucoko. Au vakila na nomuni igu kei na nomuni kaukauwa vakabete. O kemuni na ivakatawa ni bula dodonu. Oti sa qai luvuci na lomaqu ena nona kaya, “Me ra tucake mada na goneyalewa?” Au raica toka mai na noqu idabedabe, ni ko ni sa duri ka tucake vata kece. Nikua ena sega tale beka ni dua na kaukauwa levu cake ni bula dodonu e vuravura. Mo ni kakua sara ni beca na kaukauwa ni nomuni ivakaraitaki dodonu.
Au vakadinadinataka ni rawa na lesu tale ki na bula dodonu ena vuku ni nona ivakaraitaki na iVakabula kei na “dodonu tawa vakaiyalayala ni Nona isoro cecere ni veisorovaki.”22Au vakadinadinataka ni sega walega ni da na vakaukauwataki me da rawa ni cakava na veika dredre, ia me da cakava na ka kecega. Oqo na gauna me da tucake kina ko ikeda yadua ka vakarewataka e dua na drotini ki vuravura ka kacivaka na lesu tale ki na bula dodonu. Me da bula me rawa kina ni da iyaya ni kena vakarautaki na vuravura me baleta na ikarua ni Nona Lako Mai, “ia ni sa rairai mai ko Koya eda na tautauvata kaya … vakasavasavataki me vaka sa savasava sara ko koya.”23 Ena yacai Jisu Karisito, emeni.