Se Cava Ga e Yaco Mai, Mo Taleitaka
Na ivakarau ni noda taqeya na veika ca ena rawa ni dua na iwali qaqa me da dau marau tiko ka gugumatua tiko ena bula oqo.
Niu se cauravou lailai au dau taleitaka na qito kau dau vakananuma lesu na veika totoka a yaco ena gauna o ya. Ia e sega ni ra ka vinaka taucoko. Au nanuma sara na gauna keitou a druka kina ena dua na qito kaukauwa. Au sa yalolailai niu sa yaco i vale. A tiko mai vale o tinaqu. A rogoca sara na noqu italanoa rarawa. A vakavulica vei iratou na luvena me ra dau vakabauti ira yadua ka vakai iratou, ka kakua ni beitaki ira eso ena nodratou leqa, ka ratou dau solia na nodratou igu taucoko ena veika kecega eratou saga.
Ni keitou dau vakadrukai, e namaka o koya me keitou tucake ka toso ki liu. Sa mai ka e namaki na ivakasala nei tinaqu o ya. Ia sa mai noqu ivakarau tu ni bula taucoko.
“Josefa” e kaya mai, “se cava ga e yaco mai, mo taleitaka.”
Au dau nanuma tu ga na ivakasala o ya.
Au vakabauta ni nanuma o koya ni bula oqo e tu na kena e vinaka kei na kena e ca kei na gauna sa vaka me sa sega na marau e vuravura. Ia ena loma ni luluqa kei na veika ca, o ira era marau vakalevu e vaka me ra sa kila tu e dua na sala me ra na vuli mai kina ena veigauna ni dredre, era sa kaukauwa cake, vakavukui, ka ra tamata mamarau sa ikoya na veika e kunei kina.
Era tiko beka eso era nanuma ni o ira na Vakaitutu Raraba era sega ni dau rarawa, sotava na dredre, se lomaocaoca. Ke dina mada ga o ya. Me vaka ni o ira kece era dabe tiko ena itutu e cake oqo era sa sotava talega na marau levu, era sa bau vakaivotavota talega ena bilo ni veilecayaki, rarawa, kei na mate. Na Nona vuku na Turaga e sega ni tarova e dua mai na mosi se na rarawa.
Kivei au, sa dolava tu na Turaga na katuba ni lomalagi ka sovaraka mai na veivakalougatataki ki na noqu matavuvale kau sega ni vakamacalataka rawa. Ia me vaka na tamata yadua, e yaco ena so na gauna meu sa sega ni taqeya rawa kina na bibi ni lomaqu. Ena gauna vakaoqori au dau nanuma lesu na gauna malumu ni noqu itabagone ni dau yaco kina meu rarawa niu druka ena vutuvolo.
E lailai sara na ka au kila era sa namaki au tu mai liu. Ia ena gauna au tadrava kina na gauna ni rarawa kei na mosi, e dau voqa lesu mai vei au na vosa nei tinaqu: “Se cava ga e yaco mai, mo taleitaka.”
Eda na taleitaka vakacava na noda siga ni rarawa? E sega ni rawa—ena gauna sara mada ga oqo. Au sega ni vakabauta ni tukuna tiko o tinaqu ni da sega ni rawa ni yalolailai se cakitaka na mosi. Au sega ni vakabauta ni tukuna tiko o koya me da tabaka sobu na dina ni rarawa ena marau lasutaki. Ia au vakabauta na ivakarau ni noda taqeya na veika ca ena rawa ni dua na iwali qaqa me da dau marau tiko ka gugumatua tiko ena bula oqo.
Kevaka me da taqeya vakavuku na veika ca, na noda veigauna dredre ena rawa me veigauna ni rawa ka me yaco kina me dua na gauna ni marau cecere duadua.
Ena veiyabaki sa sivi yani au sa vulica kina e vica na ka a vukea na noqu a vakatovolei kei na gauna dredre. Au gadreva meu na wasea mada vei kemuni.
Me da dau Dredre.
Na imatai ni ka me da cakava o ya me da dau dredre. Ko sa raica beka e dua na draiva cudrucudru, ena gauna a vakacudrui kina ka qai vosa lesu me vaka ga sa vosacataka na tamata o ya na kena irogorogo, nona matavuvale, nona koli, kei ira na nona kawa mai liu me yaco sara vei Atama? Se ko sa sotava beka e dua na isogo ni kovate e dola cala tu ena gauna cala ka vosamuritaki, vosacataki, ka warulaki mai vua e dua a vakamosia na uluna?
E tiko e dua na iwali ena veigauna vaqo—o ya mo dau dredre.
Au nanuma sara na noqu sa vakavodoki iratou na luvei keirau ki na motoka ka gole yani ki Los Angeles. Keitou a lewe ciwa taucoko na vodo tiko, ka keitou dau muria na sala cala. Keitou a sega ni cudru, keitou a veidredrevaki ga. Na gauna ga keitou muri cala kina, e kaukauwa cake na neitou dredre.
Na muri cala e sega ni dau ka vou vei keitou. E dua na gauna keitou a muri vaka ki na ceva kei Cedar City, e Utah, ka keitou a laki muri cala tu me rua na auwa ka sotava sara e dua na ivakatakilakila “Sa Kidavaki Kemuni o Nevada”. Keitou a sega ni cudru. Keitou a veidredrevaki, ka vaka me sega ni yaco mai na cudru se na lomararawa. Na neitou veidredrevaki sa neitou balolo ni vakanananu vinaka.
Au nanuma sara na gauna me sa na vakaitau kina e dua vei iratou na luvei keirau yalewa. A maqusa sara ena vakaisulu ka waraki cauravou toka ka sa taqiri sara na lali ni katuba. Sa curu mai e dua na cauravou e qase toka vakalailai, ia a saga o luvei keirau me rakorako. A vakatakilaitaki cauravou vei au kei na watiqu kei iratou na gone, ka dara na nona kote ka curu yani i tuba. Keitou raici koya ni sa vodo ena motoka, ia sa sega ni toso rawa na motoka. Sa qai sobu mai na motoka o luvei keirau, ena yalo madua, ka cici lesu tale ki loma ni vale. Na cauravou oqo ka nanuma o koya me nona itau e dodonu me mai kauta e dua tale na luvei keirau yalewa ka sa vakadonuya oti tu me laki meimei vei koya kei watina.
Keitou sa mani mai veidedrevakitaka tiko. Ka keitou sega ni tarova rawa. E muri ni sa qai yaco dina mai na itau nei luvei keirau, au a sega ni mai tavaki koya niu a se dredre tikoga e valenikuro. Ia oqo au kila ni a rarawa ka madua kina o luvei keirau. Ia a dredrevaka talega o koya, ka keitou se dau veidredrevakitaka tikoga nikua.
Ena dua tale na gauna o temaki mo vosa kudrukudru, saga mo dredre. Ena vakabulabulataki iko ka ra na marautaka vakalevu cake na nodra bula o ira era toka tikivi iko.
Me da Vakasaqara na Veika Tawamudu.
Na ikarua ni ka me da cakava o ya me da vakasaqara na veika tawamudu. Ena rawa mo vakila ni ko vakacacani ni sa curumi iko na veivakaleqai. Ko na kurekure ka vakataroga “A cava na vuna me yaco kina vei au?”
Ia na cowiri ni bula rarawa ena yaco ki na tamata yadua. Ena yaco ga mai, me ra sotava na tamata yadua na rarawa. E sega ni dua e vakuwai kina.
Au taleitaka na ivolanikalou baleta ni vakaraitaki kina na nodra ivakarau na turaga kei na marama dokai me vakataki Eparaama, Serai, Inoke, Mosese, Josefa, Emma kei Brigham. O ira yadua era a sotava na rarawa ka a vakatovolei, vaqaqacotaki, ka vakasavasavataki na kedra ituvaki.
Na noda vulica me da vosota na veika rarawa, mosi, kei na yaluma sa tiki tiko ni noda vuli tara. Na veika kece oqo, ka dau dredre toka me da taqeya rawa ena so na gauna, sa ikoya sara ga na veika me sotavi me vakamakaretaka na vakasama, bulia cake na keda ituvaki, ka vakalevutaka na noda lomani ira na tani.
Me baleta ni a vakararawataki sara vakalevu o Jisu Karisito, sa kila vakavinaka kina o Koya na noda rarawa. Eda sa sotava kina na veika dredre me rawa talega vei keda me na vakalevutaki na noda dauloloma ka kilai ira vakavinaka na tamata.
Me da nanuma na vosa veivakacegui ni iVakabula vua na Parofita o Josefa Simici ni a vakararawataki vata kei ira na nona itokani ena Valeniveivesu butobuto e Liberty: “Ia na luvequ, me vakacegu na yalomu; raica sa lekaleka walega na gauna ni nomu rarawa kei na vutugu;
“Ia kevaka ko sa vosota rawa, ena laveti iko cake na Kalou; raica ko na vakamalumalumutaki ira kecega na nomu meca.”1
Ena rai tawamudu o ya a vakacegui o Josefa mai na vosa oqori, sa vakakina vei keda. Eso na gauna na veika me rawai keda ena yaco me da ulabaleta yani.
Na iVakavuvuli ni Vakaisosomitaki.
Na ikatolu ni ka me da cakava o ya me da kila vakavinaka na ivakavuvuli ni vakaisosomitaki. E dau dolea lesu na Turaga na veika era vakayalia na yalodina. Na veika e dau yali mai vei ira era lomana na Turaga e dau vakaikuritaki vei ira ena Nona sala ga na Turaga. Ena rairai sega beka ni yaco mai ni da sa vinakata, era sa kila na yalodina ni tagi rarawa nikua ena vakaisosomitaki ena tagi vakayauyau ni reki kei na vakavinavinaka.
E dua na veivakalougatataki ni kosipeli sa ikoya na kila ni sa yaco mai na mate e vuravura oqo, ena laki tomani tale na bula ena yasa kadua ni ilati. E kea ena soli vei keda na veika vou. Sa na sega ni rawa vei mate me muduki keda mai na veivakalougatataki tawamudu a yalataka tu na Tamada Vakalomalagi dauloloma.
Baleta ni sa dauloloma na Tamada Vakalomalagi sa yaco kina na ivakavuvuli ni vakaisosomitaki. Au sa sotava oqo ena noqu bula vakataki au. O Josefa na makubuqu e yalowai tu. E dau mositi koya o tinana kei tamana ni rau mai sotava na mate vaqo.
Erau sa kila ni na sega ni vakataki ira na gone tale eso o Josefa. Rau sa kila vakavinaka na cava ena kauta mai vei Josefa ka vakakina na matavuvale. Ia keitou dau marautaki koya sara. O ira na gone yalowai e dau dredre me ra vakilai ira ia ena veigauna au toka e yasana, e dau mokoti au mai o Josefa. Sa dau tu ga na bolebole, ia e dau vakamarautaki keitou dina.
Erau dau vakauqeti koya na itubutubu me dau qito. Na matai ni nona qito tavi polo, a laki ciqociqo. Ia au sega ni vakabauta me dau gu me ciciva na polo. E duatani tale na ivakarau ni nona qito. Ni dau vukataki yani vua na polo, e dau laiva o Josefa me cawi sara ka qai ucuna mai nona taga e dua tale na polo ka viritaka yani vei dauciqociqo.
Na dredre ni veisusu ni matavuvale vei Josefa, na nodratou solibula sa mai vakaisosomitaki vakayauyau. Ena vuku ni yalo digitaki oqo, erau sa kila na nona itubutubu na veika e baleti ira na gone era malumalumu vakayago. Era sa mai sotava bula na lomasoli kei na yalololoma ni matavuvale, kei na itokani. Era sa mai veimarautaki vata ni sa mai vinaka sara o Josefa. Eratou sa qoroya tiko na nona vinaka.
Nuitaka ga na Tamada kei na Luvena.
Na ikava ni ka me da cakava o ya me da sa nuitaka ga na Tamada Vakalomalagi kei na Luvena, o Jisu Karisito.
“Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura.”2 Na Turaga o Jisu Karisito sa noda ito, dauveivuke, ka dauitataro. E gadreva o Koya me da bula marau. E gadreva o Koya me da rawa ka. Kevaka me da cakava na noda itavi, ena veivuke mai o Koya.
O Koya sa lako sobu mai ki na veika kecega ena vukei keda. Ena vakaceguya ka tokoni keda. Ena vakaukauwataki keda o Koya ena noda malumalumu ka vaqaqacotaki keda ni da sa rarawa. Ena cakava o Koya na ka malumalumu me ka kaukauwa.3
E dua na luvei keirau yalewa, a vakasucu, ka mani tauvimate bibi. Keitou a qai masulaki koya, qaravi koya, ka tokoni koya ena kena uasivi taucoko. Keitou sa nuitaka ni na vakalougatataki ena masu ni veivakabulai, ia sa toso na siga me laki vakavula ka laki vakayabaki sara. E dua na gauna au sa kaya kina vua ni mate oqo ena rawa me sa na tu ga vua ena nona bula taucoko.
Ena dua na mataka au nanuma tiko niu a taura mai e dua na pepa ka tekivu taipataka. Oqo na veika au a taipataka vua: “Oqo na ka vuni: nuitaka ga na Turaga, cakava na nomu vinaka taucoko, ka laiva Vua na kena vo.”
A nuitaka o koya na Turaga. Ia a sega ga ni yali na mate rarawa o ya. E vakayabaki na nona rarawa, ia ni toso na gauna, sa vakalougatataki koya na Turaga, ka sa tekivu me bula vinaka.
Na luvequ oqo, au vakabauta kevaka mada ga me a sega ni bula vinaka tale, ena nuitaka tikoga na Tamana Vakalomalagi ka “laiva Vua na kena vo.”
iTinitini
E dina ga ni sa takali makawa sara o tinaqu ki na kena isau tawamudu, e tu ga vei au na nona vosa. Au se nanuma tikoga na nona ivakasala sara o ya ni a druka na neitou timi ena qito vutupolo. “Se cava ga e yaco mai, mo taleitaka”
Au kila na vuna me na tikoga kina na veibasai ni ka kecega. Ke taqei vakavinaka na veivakaleqai, ena ka ni veivakalougatataki ki na noda bula. Sa rawa me da na taleitaka.
Ni da vakasaqara na marau, ka da vakasaqara na veika sa tawamudu, kila vakavinaka na ivakavuvuli ni vakaisosomitaki, ka toso voleka vua na Tamada Vakalomalagi, sa na rawa kina me da vosota na veika dredre kei na veivakatovolei. Sa na rawa me da kaya vakataki tinaqu, “Se cava ga e yaco mai, mo taleitaka.” Sa noqu ivakadinadina oqo ena yaca i Jisu Karisito, emeni.