Na Veikacivi Tabu ni Veiqaravi
Na nona qarava e dua na nona itavi ena kauta mai na yalo marau kei na vakacegu.
Au gadreva talega meu vakaraitaka na noqu kidavaki ira era sa kacivi mai me ra vakaitavi ena koniferedi oqo, kei na noqu vakavinavinaka cecekia vei ira era sa mai vakacegui mai na nodramai na nodra dui itavi.Sa na toso tikoga na cakacaka oqo. Keimami lomani kemuni yadudua.
Kemuni na taciqu sa ka dokai dina vei au na gauna oqo meu vosa vei kemuni ena yakavi nikua. Sa dua na ka rekitaki me da raica ni sinai vutucoqa tu na Vale ni Koniferedi mai vei ira na gone kei na qase ka ra taura tu na matabete ni Kalou. Me da kila ni ra soqoni vata tale tikoga e vuravura raraba na ilawalawa vata oqo e kauta mai e dua na yalo ni qaravi itavi. Au masuta me na dusimaka na noqu vakasama ka vakauqeta na noqu vosa na veivakauqeti ni Turaga.
A cavuta na veimalanivosa oqo na Parofita o Joseph F. Smith me baleta na matabete. E kaya kina o koya, “Na Matabete Tabu sai koya na dodonu sa lesia mai na Kalou vua na tamata, me rawa ni tukuna kina na lomana na Kalou… . E ka tabu, ka sa dodonu me ra dau raica vakabibi na tamata. E dodonu me rokovi ka dokai mai vei ira era taura tu.”1
Na bubului kei na veiyalayalati ni matabete e baleti keda kece. Ki vei kemuni o ni taura tu na Matabete i Melikisetiki, sa tukuni kina na veika e gadrevi vei keda me da yalodina ka talairawarawa ki na lawa ni Kalou ka qarava vakavinaka na itavi eda kacivi kina. Ki vei kemuni o ni taura tu na Matabete i Eroni sa tukuni kina na veika me baleta na qaravi itavi ena veigauna mai muri, me ra na vakarautaki ira kina eke ena gauna oqo.
E kaya o Peresitedi Marion G. Romney, e dua na lewe ni Mataveiliutaki Taumada ena dua na gauna e liu: “Na tamata kece e tu vua na Matabete i Melikisetiki e dodonu me na gumatua ka muria vakavinaka na kena ivakavakayagataki na bubului kei na veiyalayalati e sa ciqoma. Na kena sega ni qaravi vakavinaka na itavi e soli mai kina ena basika dina mai kina na cudru rarawa kei na yaluma.”2
E vakuria o Peresitedi Spencer W. Kimball: “Ena voroka e dua na nona veiyalayalati ni matabete ena nona talaidredre ki na ivakaro—ia e vakatalega kina ena nona sega ni qarava vakavinaka na nona itavi. Me vaka na dina ni vosa ko ya, ena voroka na nona veiyalayalati e dua ni sega ni cakava e dua na ka.”3
A vakadikeva toka e dua na italatala rogolevu, “Ena cakacaka vakaukauwa na tamata me baleta na ilavo. Ena cakacaka vakukauwa cake na tamata me baleti ira eso tale na tamata. Ia ena cakacaka vakaukauwa duadua na tamata ni vagolea vakatabakidua na yalona ki na dua na inaki… . E sega vakadua ni dau qaravi vakavinaka na itavi me yacova na gauna e sa qarava kina e dua ena qarava vakalevu cake ena yalomarau, kevaka walega e rawa.”4
Na nona qarava e dua na nona itavi e kauta mai na yalo ni marau kei na vakacegu. E vola kina vakaoqo na serekali:
Au moce ka tadra ni ka rekitaki na bula.
Au yadra ka raica ni bula e itavi.
Au cakacaka, ka raica—
Ni ka rekitaki na itavi.5
E rawa ni yaco mai vakamalua na itavi ni da qarava o keda eda taura tu na matabete na ilesilesi eda lesi kina. E vunautaka na iliuliu maqosa ka yaga o Peresitedi George Albert Smith, “Sa nomu itavi taumada mo kila na veika e vinakata na Turaga, ni oti, ena kaukauwa kei na igu ni nomu matabete tabu mo qai qarava kina vakavinaka na nomu itavi ena kedra iserau na wekamu ka me ra marautaka kina na tamata na muri iko.”6
Na cava na kena ibalebale me da qarava vakavinaka e dua na veikacivi? E kena ibalebale me da tara cake na kena dokai kei na kena bibi, me rokovi ka vakacaucautaki e matadra na tamata kecega, me da vakalevutaka ka vaqaqacotaka, me cila basikata na rarama mai lomalagi me ra raica na vo ni tamata.
Kei na sala cava me qarava kina vakavinaka e dua na veikacivi? Ena nona qarava na veiqaravi e sala vata kaya. Ena qarava vakavinaka e dua na italatala qase na ilesilesi tabaki ni italatala qase ena nona vulica na nona itavi vakaitalatala qase kei na nona cakava. Me vaka ga vua na italatala qase, sa vakakina vua e dua na ivakavuvuli, na bete, na bisopi, kei ira yadua era vakaitutu ena matabete.
E taleva lesu vei keda na dauniserekali ka dauvolaivola o Robert Louis Stevenson, “Au kila na cava na marau, niu sa cakava na veicakacaka vinaka.”
Kemuni na taciqu me da nanuma na ivakasala nei Penijamini na Tui: “Mo ni kila ni ko ni sa qaravi koya tiko na nomuni Kalou, ena nomuni qaravi ira na wekamuni.”7
Me da dolele yani ka vueti ira era gadreva tu na noda veivuke ka laveti ira cake ki na gaunisala cecere ka vinaka cake. Me da vagolea vakalevu na noda vakasama vei ira na matabete kei ira na watidra kei na luvedra era sa luluqa tu vakalotu. Me da vakarorogo ki na itukutuku sega ni vakarogoi mai yalodra. Eda na viavia kila: “Meu tuberi ka liutaki tikotikoga. Meu vulica rawa tu na bula vou koya.”8
Na cakacaka ni veivakabulabulataki e sega ni nodra cakacaka na tamata vakasavuliga se dau tatadra vakasiga. Era tubu tiko na gone, ka ra sa qase cake na itubutubu, ka sega ni waraka e dua na tamata ko gauna. Kakua ni vakadaroya e dua na veivakauqeti; ia cakacakataka, ena qai dolava na Turaga na kena sala.
Ena vuqa na gauna sa dau gadrevi kina na itovo ni bula vakalomalagi ni dauvosota. Niu se bisopi voli au a vakauqeti ena dua na gauna meu sikova e dua na turaga ka bulabula tu vakalotu na watina, ka vakakina o iratou na gone. Na turaga oqo e sega vakadua ni bau rogoca mai na veisureti. Ena dua na siga katakata ni vula ikatakata au a tukituki yani ena katuba lawalawa nei Harold G. Gallacher. Au raici Baraca Gallacher rawa ni dabe toka ena nona idabedabe ka wili niusipepa. “O cei qori?” e taroga mai, ni rai sobu tu ga.
“Na nomu bisopi,” Au sauma yani. “Au lako mai me daru mai veikilai ka vakauqeti iko mo dau lako yani ki na veisoqoni vakalotu vata kei iratou na nomu matavuvale.”
“Sega, au sa rui osooso,” e sauma mai vakasabalia. E sega sara ga ni bau rai cake. Au vakavinavinakata na nona vakarorogo ka biuta mai na nodratou matanivale.
Eratou a toki ki California na matavuvale na Gallacher ni oti ga vakalailai o ya. A toso na veiyabaki. Niu sa lewe voli ni Kuoramu ni Le Tinikarua, au a cakacaka tiko ena noqu valenivolavola ena dua na siga ni qiri yani na noqu sekeriteri, ka kaya, “E dua na Baraca Gallacher ka a dau vakaitikotiko voli ena nomu tabanalevu e tiko oqo ena noqu valenivolavola e vinakata me vosa vei iko.”
Au sauma mai ka vaka, “Taroga mada kevaka e yacana o Harold G. Gallacher ka a dau vakaitikotiko vata kei iratou na nona matavuvale ena Vissing Place e West Temple kei na Fifth South.”
E qai kaya, “Sai koya sara ga oqori.”
Au a kerei koya me vakacurumi koya yani. Keirau a cakava e dua na veitalanoa vinaka me baleta na nona matavuvale. E kaya vei au, “Au lako mai meu mai kere veivosoti niu a sega ni tucake mai na noqu idabedabe ka dolava vei iko na katuba ena siga ni vula ikatakata o ya ena vica vata na yabaki sa oti.” Au a tarogi koya kevaka e sa bulabula tiko ena Lotu. Ena matadredredre, a sauma mai kina, “Au sa daunivakasala tiko ena matabisopi ni noqu tabanalevu. Na nomu veisureti meu lako mai ki lotu kei na noqu sauma ena sega, a bikai au vakalevu sara kau sa mani lewa meu na cakava kina e dua na ka.”
Keirau a sota tiko vakavica kei Harold ni bera ni qai takali yani. Eratou a vakatawana e vuqa na veikacivi ena Lotu na matavuvale na Gallachers.
A kaya o Peresitedi Stephen L Richards, ka a daunivakasala vei Peresitedi David O. McKay: “Na Matabete e vakavuqa ni dau vakamacalataki ga me “kaukauwa ni Kalou ka lesi ki na tamata.’” E tomana ka kaya: “Au nanuma ni dodonu vinaka na ivakamacala oqo. Ia ni nakiti me cakacakataki au vinakata meu vakamacalataka na Matabete ena vakasama ni veiqaravi, kau dau vakatoka me ‘ituvatuva uasivi ni veiqaravi.’ … Oqo e dua na iyaya ni veiqaravi, ia ko koya e sega ni vakayagataka ena rawa ni vakayalia, ni sa tukuni vakamatata vei keda ena ivakatakila ni ko koya e vakawalena ‘sa sega ni kilikili me tucake’”9
Ena Janueri se qai oti ga oqo, au a vakadinadinataka kina e dua na cakacaka ni veiqaravi bibi ena nona bula e dua na marama ka a dau vakaitikotiko ena noqu tabanalevu ena noqu a veiqaravi voli vakabisopi ena vuqa na yabaki sa oti. Na yacana ko Adele, eratou a vakaitikotiko voli ena dua na gauna balavu ko koya vata kei rau na luvena goneyalewa lelevu e rua e Rose Park ena Salt Lake Valley—e dua vei rau na goneyalewa e lokiloki. O Adele, ni sa dawai voli, sa dau sota kaya vakalevu na dredre ni bula vakailavo, sa dau dredre vakalevu na nona bula.
Au a ciqoma e dua na talevoni mai vua e dua ka qarava tiko na cakacaka ni dua na tabana ni veiqaravi raraba ka vakatokai na Gingerbread House Project, a sureti au ki na kena dolavi na vale nei Adele, na kena vakavoui a taura e rauta ni sivia ga vakalailai na tolu na siga kei na bogi mai vei ira e vuqa na daulomasoli, ka ra cakacaka sega ni saumi ena iyaya ni vale ka soli vakailoloma mai na vica na bisinisi. Ena gauna vata e vakacavari tiko kina na na nona vale, eratou a vakarurugi toka o Adele kei rau na nona goneyalewa ena dua na koro levu rauta ni vica vata na maile na kena yawa ka ratou qaravi tiko kina ena dua na ivakatagedegede cecere ni veivakamenemenei.
Au sa tu e kea ena gauna e yaco yani kina na limosini ka kauti iratou yani o Adele kei rau na luvena goneyalewa. E okati ena ilawalawa ka waraki iratou tu yani e sega walega ni o ira na nodratou matavuvale kei na itokani ia o ira talega e vuqa na matai ka ra a cakacaka tiko ena bogi kei na siga ena cakacaka o ya. E kune votu ni ra marautaka na vua ni cakacaka ka ra vinakata me ra raica na cava ena yaco vei iratou o Adele kei rau na luvena yalewa.
Eratou a sobu mai na motoka na marama oqo, ka vesu tu na matadratou. Sa dua na gauna ka talei ena gauna sa sereki kina na ivesu ni matadratou ka ratou vuki o Adele kei rau na luvena yalewa ka raica na nodratou vale vou. Eratou kurabui vakalevu ena cakacaka vakasakiti sa mai rawa o ya, ka oka kina na kena vakavoui na matanivale, vakalevutaki na vale, ka dua na delavuvu vou. E rairai vou ka sega ni dua na ka e vakamelei rawa e tautuba. Sa sega na ka eratou cakava rawa ka ratou sa tagi ga.
Au a tomani Adele kei iratou na kena vo ena neitou curu yani ki vale ka qoroqoro ena veika sa mai qaravi me vakarairaivinakataki ka vakavinakataki cake kina na lomanivale. Sa boro na lalaga, ka veisau na iubi ni buturara. Sa vou na iyaya ni lomanivale, vou na ilatilati, kei na iubi. Sa vakaisosomitaki na kovate e valenikuro; sa vakavoui na dela ni kovate dabe kei na iyaya vakalivaliva. Sa veisautaki sara ga vakadua mai cake ki ra na vale taucoko, e savavuka na veirumu yadua ka totoka. Eratou sa vakadrukai vakaidina o Adele kei rau na luvena yalewa. Ia e luluvu ka tarai talega vakakina na matadra o ira era a cakacaka vagumatua me ra vakavouya na vale. E tonawanawa na wai ni matadra ena nodra vakadinadinataka na marau era sa kauta mai ki na nodratou bula ko Adele kei rau na luvena yalewa. E sega walega ni a vakamamadataki na nona icolacola e dua na dawai, ia e vica vata tale na bula a tarai ena ivalavala o ya. Era yaco kece me ra tamata vinaka cake ena nodra vakaitavi ena sasaga o ya.
O Peresitedi Harold B. Lee, e dua na qasenivuli cecere ena Lotu, e solia vei keda na ivakasala rawarawa ni kilai oqo me baleta na matabete: “Mo ni kila ni dua e sa taura na matabete, sa yaco o koya me itini ni Turaga. E dodonu me raica na nona ilesilesi me vaka ni sai lesilesi mai vua na Turaga.”10
Ia, e so vei kemuni e dau mamaduwa beka se nanuma ni sega ni ganiti koya me na qarava vakavinaka na nona ilesilesi. Nanuma tiko ni cakacaka oqo e sega ni nodaru walega. E cakacaka ni Turaga, ia ni da sa cakava tiko na cakacaka ni Turaga, sa na ganiti keda na veivuke ni Turaga. Nanuma tiko na Turaga ena bulia na daku me rawa ni colata na icolacola e vakataqari kina.
E dina ni dau veivakarerei ena so na gauna na valenivuli, e so na veivakavulici mana cake sara e dau vakayacori ena taudaku ni valenivuli se valenilotu. Au nanuma vinaka tiko ena gauna ni vulaitubutubu ena vica na yabaki sa oti, era sa nanamaki tiko na matabete i Eroni mai na noqu tabanalevu kei na dua tale na tabanalevu voleka ki na dua na soqo me vakananumi kina na vakalesui mai ni Matabete i Eroni. Ena soqo oqo keimami a vodo basi kina me ciwasagavulu na maile ki na vualiku ki Clarkston, ena ibulubulu mai Utah. Ena totoka ni vanua o ya, keimami a soqoni ira vata mai na itabagone ki na ibulubulu kei Martin Harris, e dua vei iratou na iVakadinadina e Lewe Tolu ni iVola i Momani. Ni keimami vakavolivolita na vatu jasipa totoka ka vakatakilakilataka na kena ibulubulu, sa qai wilika mai o Elder Glen L. Rudd, na bisopi ni tabanalevu tale kadua ena gauna o ya, na itukutuku ni bula nei Martin Harris mai na iVola i Momani na nona ivakadinadina kei na nodrau o Oliver Cowdery kei David Whitmer. Era a vakarorogo kece tu vakadua na cauravou, ni ra kila ni ra a tucake tu ena kena ibulubulu e dua ka sa raica e dua na agilosi ka sa raica na peleti ena matana dina. Era a tara ena vakarokoroko na vatu jasipa ka ivakatakilakila ni bulubulu ka vakasamataka vakatitobu na vosa era sa rogoca kei na veika era sa vakila.
Oti keimami sa qai lako yani vakalailai ki na dua na ibulubulu ni ivuvu ni lotu. E koto ena ivakatakilakila na yaca John P. Malmberg ka koto kina na qaqanisere:
Sa takali e dua na rarama mai neitou vale.
Sa galu na domo keitou dau lomana.
Sa lala e dua na tikina e yaloi keitou
Ena sega ni rawa me vakatawani.
Keimami veitalanoa vata kei ira na cauravou me baleta na sorovaki ka, me baleta na tutaki ni dina. Na itavi, na veiqaravi kei na loloma era a vakavuvulitaki ena yasa ni vatu ni ibulubulu oya. Ena mata ni vakanananu au rawa ni raica na nodra tara mai na nodra itavoi na cauravou me qusi kina e dua na wainimata. E rawa ni rogoci na kukuceruceru ka ivakadinadina ni sa tarai na yalo ka vakotori na yalayala. Au vakabauta ni ra a lewa kina na itabagone yadua me ra ivuvu ni lotu—me ra liu ka vakaraitaka na sala vei ira na kena vo me ra muria.
Keimami a vakacegu yani me vaka e dua na ilawalawa ki na dua na vanua ni gade, keimami laki marautaka kina e dua na ivakasigalevu. Ni bera ni keimami lesu mai ki vale keimami a mai cegu ena rara ni Valetabu totoka e Logan. Oqo e dua na siga katakata toka. Au a sureti ira na cauravou me ra vakadodo ena rara ka raica cake na lomalagi karakarawa, ka veiciriyaki vakatotolo voli ena bati ni cagi ka liwavi ira toka na veio vulavula. Keimami qoroya na totoka ni ivuvu ni valetabu oqo. Keimami veitalanoataka na veiyalayalati tawamudu. E vulici na lesoni. E tarai na yalo. Sa laurai ni veiyalayalati kei na yalayala e sega ni ka vakavosa walega. Sa curuma ka vakadeitaki ena veiyalo gone oqori na bula kilikili me curumi kina na katuba ni veivaletabu. E vagolei na vakanananu vua na Turaga; sa vakilai voleka sara na Nona tiko voli. Na Nona veisureti malumu, “Muri au mai,” a rogoci ka vakilai.
Ki vei ira kece era lomasoli ena rogoci ni veikacivi tabu ni veiqaravi sa yaco mai na yalayala, “Koi au na Turaga, au sa yalololoma ka lomani ira era sa rerevaki au, ia sa ka ni marau meu vakalagilagi ira era sa qaravi au ena yalo sa dina ka dodonu me yacova na ivakataotioti.”11
Na noqu masu ni yalodina me na rauti keda taucoko na yalayala vakalou oqori, ena yacai Jisu Karisito, na noda iVakabula, Emeni.